ទឹកជំនន់នៅចិន មនុស្ស ៦នាក់ស្លាប់ និងជិត ៧ពាន់នាក់រងផលប៉ះពាល់
ប៉េកាំង៖ ប្រព័ន្ធផ្សព្វផ្សាយរដ្ឋចិនបានចេញផ្សាយកាលពីថ្ងៃព្រហស្បតិ៍ថា យ៉ាងហោចណាស់មនុស្សចំនួន ៦នាក់បានបាត់បង់ជីវិត នៅពេលមានភ្លៀងធ្លាក់ខ្លាំង បានបង្កជាទឹកជំនន់ជន់លិចភាគនិរតីនៃប្រទេសចិន។
![](https://asset.ams.com.kh/central/media/2024/07/photo_2024-07-11_16-44-47-1024x682.jpg)
ទីភ្នាក់ងារព័ត៌មានរដ្ឋស៊ីនហួរបានរាយការណ៍ថា ភ្លៀងធ្លាក់យ៉ាងគំហុកបានវាយប្រហារស្រុក Dianjiang ក្បែរទីក្រុង Chongqing ចាប់តាំងពីយប់ថ្ងៃពុធ ដល់ព្រឹកថ្ងៃព្រហស្បតិ៍ នេះបើយោងតាមប្រភពពីមន្ត្រីស្រុក។ ទីភ្នាក់ងារដដែលបន្តថា មនុស្សជិត ៧,០០០នាក់បានរងផលប៉ះពាល់ដោយសារព្យុះភ្លៀង ហើយមនុស្ស ១៧០នាក់ត្រូវបានប្រាប់ឱ្យជម្លៀសខ្លួនជាបន្ទាន់។ ទឹកភ្លៀងមានកម្ពស់ជិត ៣សង់ទីម៉ែត្រ ត្រូវបានវាស់នៅផ្នែកខ្លះនៃស្រុក Dianjiang ដែលជាកម្រិតអតិបរមាប្រចាំថ្ងៃខ្ពស់បំផុត ចាប់តាំងពីកំណត់ត្រាបានចាប់ផ្តើម។
![](https://asset.ams.com.kh/central/media/2024/07/photo_2024-07-11_16-44-50-1024x682.jpg)
បើតាមទីភ្នាក់ងារស៊ីនហួរ ខេត្តហូណាន ប្រទេសចិន បានជម្លៀសមនុស្ស ៧,៦៨០នាក់ជាបន្ទាន់ ដោយសារតែការបាក់ទំនប់ទឹកនៅស្ទឹង តុងធីង។ មូលហេតុនៃការបាក់ទំនប់នេះ ត្រូវបានអាជ្ញាធរមូលដ្ឋានអះអាងថា បណ្តាលមកពីភ្លៀងធ្លាក់ក្នុងកម្រិតខ្ពស់មិនធ្លាប់មានជាប្រវត្តិសាស្រ្ត។ ភ្លៀងធ្លាក់ខ្លាំងចន្លោះថ្ងៃ១៦ ខែមិថុនា ដល់ថ្ងៃទី៣ ខែកក្កដា គឺជាកម្រិតធ្ងន់ធ្ងរបំផុតក្នុងតំបន់ ឆាងសា, ឆាងទ័រ, យៀកយ៉ាង និងស៊ាំងថាន គិតចាប់តាំងពីកំណត់ត្រាចាប់ផ្តើមសរសេរក្នុងឆ្នាំ១៩៦១។
![](https://asset.ams.com.kh/central/media/2024/07/photo_2024-07-11_16-44-54-1024x682.jpg)
គួរបញ្ជាក់ថា ចិនកំពុងស៊ូទ្រាំនឹងរដូវក្តៅដែលបង្កឱ្យមានអាកាសធាតុក្តៅខ្លាំង និងភ្លៀងធ្លាក់ខ្លាំងពាសពេញភាគខាងកើត និងខាងត្បូងនៃប្រទេស ខណៈភាគខាងជើងក៏បានទទួលរងការវាយប្រហារពីរលកកម្ដៅជាបន្តបន្ទាប់ផងដែរ៕ ប្រភព៖ AFP ប្រែសម្រួលដោយ៖ ឈឹម ទីណា
![](https://asset.ams.com.kh/central/media/2024/07/photo_2024-07-11_16-44-57-1024x682.jpg)
![](https://asset.ams.com.kh/central/media/2024/07/photo_2024-07-11_16-44-59-1024x682.jpg)