ផ្ទះថ្មីទី៩៣របស់សាខាកាកបាទក្រហមខេត្តសៀមរាប ត្រូវបានប្រគល់ជូនស្ត្រីមេម៉ាយថែមទាំងពិការនៅស្រុកពួក
សៀមរាប៖ដោយធ្វើដំណើរតាមគោយន្តកាត់តាមផ្លូវលំក្នុងលង្វែកទ្រូងព្រៃ លោកជំទាវ ទុយ ជិ ប្រាក់សោភ័ណ អនុប្រធានគណៈកម្មាធិការសាខាខេត្តសៀមរាបនិងមន្រ្តីក្រុមការងារបានអញ្ជើញចុះប្រគល់ផ្ទះទី៩៣ ជាអំណោយសាខាកាកបាទក្រហមកម្ពុជា ជូនអ្នកស្រី ឡាច ពៃ ជាស្រ្តីមេម៉ាយពិការជើង មានជីវភាពក្រីក្រ រស់នៅភូមិរហាល ឃុំដូនកែវ ស្រុកពួកខេត្តសៀមរាប។ក្នុងឱកាសនេះក៏មានការចែកអំណោយដល់ចាស់ជរាប្រុសស្រីចំនួន៥០នាក់ផងដែរ។
អាន ក្នុងពិធីកាលពីព្រឹកថ្ងៃទី១២ ខែកក្កដា ឆ្នាំ២០២៤ អ្នកមីង ឡាច ពៃ អាយុ៤៧ឆ្នាំ ជាស្រ្តីមេម៉ាយពិការជើងខាងស្តាំ រស់នៅជាមួយកូនស្រីម្នាក់ឈ្មោះចាន់ តារា អាយុ១៣ឆ្នាំរៀនថ្នាក់ទី៧នៅអនុវិទ្យាល័យប៊ូយ៉ុងដូនកែវ បានឱ្យដឹងថា គ្រួសារអ្នកស្រីមានជីវភាពក្រីក្រ ។ពុំមានដីស្រែ, គ្មានមុខរបរ ។សព្វថ្ងៃរស់នៅដោយអង្កររបបរបស់កូន ជាសិស្សក្រីក្រឧបត្ថម្ភដោយសប្បុរសជនកូរ៉េ ២៥គីឡូក្រាមក្នុងមួយខែ និងបណ្ណក្រ១ ដែលទទួលបានប្រាក់មូលនិធិសមធម៌ របស់រាជរដ្ឋាភិបាលមួយខែចំនួន១៥៦.០០០រៀល។អ្នកស្រីបន្តថាមុនទទួលបានផ្ទះថ្មី អ្នកស្រីនិងកូនរស់នៅក្នុងខ្ទមកម្សត់ផ្ទាល់ដីជាអតីតរោងគោទំហំ៣,៥ម៉ែត្រគុណនឹង៤,៥ម៉ែត្រ ដំបូលប្រក់កៅស៊ូតង់ ជញ្ជាំងបាំងស្លឹកត្នោតតែមួយជ្រុង ខាងគ្រែសម្រាកតែប៉ុណ្ណោះ ។
ក្នុងឱកាសនៃការប្រគល់ផ្ទះសង់ថ្មីលោកជំទាវ ទុយ ជិ ប្រាក់សោភ័ណ បានរំលឹកថាដោយមើលឃើញពីការលំបាករបស់ស្រីពិការនិងបានព្យាយាមឱ្យកូនបានរៀនសូត្រផង សាខាកាកបាទក្រហមកម្ពុជាខេត្តសៀមរាប ក្រោមការដឹកនាំប្រកបដោយការគិតគូរនិងអាណិតអាសូរដោយគ្មានការរើសអើងរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានសាងសង់ផ្ទះថ្មីទី៩៣ នេះជូនអ្នកស្រី ឡាច ពៃ ។ដោយមានលក្ខខណ្ឌសមហេតុផលខាងអាជ្ញាធរជាតិអប្សរាក៏បានឯកភាពឱ្យសាងសង់ផ្ទះនេះ។ផ្ទះមានទំហំ៦ម៉ែត្រ គុណនឹង ៦ម៉ែត្រ មានពីរបន្ទប់ ,ដំបូលប្រក់ស័ង្កសីភ្លឺក្បឿង ជញ្ជាំងស្មាតបត បាតក្រាលការ៉ូ មានកម្ពស់ផុតពីដី០.៥០ម៉ែត្រ និងចាក់សាបជុំវិញទទឹង០.៥០ម៉ែត្រ ។
លោកជំទាវបន្តថា ចំណាយលើការសាងសង់ផ្ទះចំនួន ៣ ៨០០ ដុល្លារអាមេរិក ដែលជាថវិកាបរិច្ចាគរបស់ឯកឧត្តមបណ្ឌិត ហ៊ី វីរៈ និងលោកជំទាវ យី សុភា ព្រមទាំងបុត្រាបុត្រី ។ដោយឡែកក្នុងពិធីប្រគល់ផ្ទះក៏មានអំណោយមួយចំនួនសម្រាប់ម្ចាស់ផ្ទះមាន អង្ករ៦០គីឡូក្រាម មីមួយកេស ឃីតពីរកញ្ចប់ ត្រីខមួយយួរ ទឹកត្រីមួយយួរ ឆ្នាំង ចាន ស្លាបព្រា ធុងទឹកតូច ធុងធំ ធុងទឹកកក និងសម្ភារមួយចំនួនព្រមទាំងថវិកាបួនសែនរៀល។ចាស់ជរាប្រុសស្រីទាំង៥០នាក់ទទួលបានអង្ករ អំបិល មី យឺតមួយកញ្ចប់ត្រីខ និងថវិកាមួយចំនួន៕
ដោយ៖ ប៊ុន រដ្ឋា