សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា បានទទួលជួបសវនាការជាមួយ ឯកឧត្តម តូ ឡឹម ( To Lam) ប្រធានរដ្ឋ នៃសាធារណរដ្ឋសង្គមនិយមវៀតណាម នៅវិមានរដ្ឋសភា នាព្រឹកថ្ងៃទី១៣ ខែកក្កដា ឆ្នាំ២០២៤ ក្នុងពេលដែល ឯកឧត្តម បានដឹកនាំគណៈប្រតិភូជាន់ខ្ពស់អញ្ជើញមកបំពេញទស្សនកិច្ចផ្លូវរដ្ឋនៅព្រះរាជាណាចក្រកម្ពុជា។

នៅក្នុងជំនួបសម្តែងការគួរសមនេះ សម្តេចប្រធានរដ្ឋសភា និង ឯកឧត្តមប្រធានាធិបតីវៀតណាម បានសម្តែងការពេញចិត្តចំពោះ ទំនាក់ទំនងមិត្តភាព សាមគ្គីភាពជាប្រពៃណី និងភាពជាដៃគូដ៏ស្អិតល្មួតរវាងប្រទេសទាំងពីរ ដែលបានស្តែងឱ្យឃើញនូវភាពធន់ រឹងមាំ និងយូរអង្វែង ផ្អែកលើការជឿទុកចិត្តគ្នា សំដៅជំរុញការអភិវឌ្ឍ ដើម្បីផលប្រយោជន៍រួមជូនប្រជាជន និងប្រទេសទាំងពីរ។

សម្តេចប្រធានរដ្ឋសភា មានក្តីសោមនស្សរីករាយ និងបានស្វាគមន៍យ៉ាងកក់ក្ដៅចំពោះវត្តមាន លោក តូ ឡឹម ជាមួយជំនឿយ៉ាងមុតមាំថា ដំណើរទស្សនកិច្ចនេះនឹងនាំមកផលប្រយោជន៍ថ្មីៗបន្ថែមទៀត ដល់ប្រជាជននិងប្រទេសទំាងពីរ។ សម្តេចប្រធានរដ្ឋសភា បានសម្តែងនូវការអបអរសាទរជូន ឯកឧត្តម តូ ឡឹម ដែលទទួលបានការតែងតាំងជាប្រធានរដ្ឋ នៃសាធារណរដ្ឋសង្គមនិយមវៀតណាម។ ជាមួយគ្នានេះ សម្តេចរដ្ឋសភាធិបតី ឃួន សុដារី បានស្នើដល់ ឯកឧត្តមប្រធានរដ្ឋ ជួយជំរុញ និងលើកកម្ពស់ពាណិជ្ជកម្មឆ្លងដែនរវាងប្រទេសទំាងពីរ ដើម្បីឈានទៅសម្រេចបាននូវគោលដៅរបស់យើង គឺទំហំពាណិជ្ជកម្មឱ្យបានលើសពី ១០ ពាន់លានដុល្លារក្នុងឆ្នាំនេះ ឬឆ្នាំបន្ទាប់។

ជាការឆ្លើយតប ឯកឧត្តម តូ ឡឹម បានសម្តែងនូវអំណរគុណដែលរដ្ឋសភាកម្ពុជាបានទទួលបដិសណ្ឋារកិច្ចជូនឯកឧត្តម និងគណៈប្រតិភូ ប្រកបដោយភាពកក់ក្តៅជាទីបំផុត។ ឯកឧត្តមប្រធានរដ្ឋវៀតណាម បានវាយតម្លៃខ្ពស់ពីការរីកចម្រើនគួរឱ្យកត់សម្គាល់របស់កម្ពុជា ហើយមានសុទិដ្ឋិនិយមថា កម្ពុជាអាចនឹងឈានទៅសម្រេចបានគោលដៅឆ្នាំ២០៣០ ក្លាយជាប្រទេសមានចំណូលមធ្យមកម្រិតខ្ពស់ និងឆ្នាំ២០៥០ ជាប្រទេសមានចំណូលខ្ពស់។ ឯកឧត្តមប្រធានរដ្ឋ បានសម្តែងការអបអរសាទរកម្ពុជា ដែលសម្រេចបានជោគជ័យនូវការបោះឆ្នោតជាបន្តបន្ទាប់ ដែលនេះបង្ហាញពីមាគ៌ាដឹកនាំដ៏ឈ្លាសវៃ ប្រកបដោយគតិបណ្ឌិតរបស់ សម្តេចតេជោ ហ៊ុន សែន និងថ្នាក់ដឹកនាំបន្តវេនរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នាពេលបច្ចុប្បន្ន។ ឯកឧត្តម បានបញ្ជាក់ថា ជោគជ័យនិងសមិទ្ធផលរបស់កម្ពុជាស្តែងចេញពីការជឿទុកចិត្ត និងការស្រលាញ់គាំទ្ររបស់ប្រជាជនកម្ពុជាមកលើបក្ស និងរាជរដ្ឋាភិបាលយ៉ាងពិតប្រាកដ។

ឯកឧត្តមប្រធានគណៈប្រតិភូ បានអបអរសាទរ និងវាយតម្លៃខ្ពស់ ដែលរដ្ឋសភាកម្ពុជានិងវៀតណាម បានចុះអនុស្សរណៈយោគយល់គ្នាកាលពីឆ្នាំ២០២៣ ក្នុងគោលដៅលើកកម្ពស់កិច្ចសហប្រតិបត្តិការរវាងរដ្ឋសភានៃប្រទេសទំាងពីរ ពិសេសការផ្លាស់ប្តូរដំណើរទស្សនកិច្ច ដែលបានធ្វើឡើងយ៉ាងសកម្ម និងគ្រប់កម្រិត ក្នុងការបម្រើផលប្រយោជន៍ឱ្យគ្នាទៅវិញទៅមក។

សូមបញ្ជាក់ថា ភាគីទំាងពីរ បានផ្តល់សារៈសំខាន់ជាខ្លំាងដល់ទំនាក់ទំនងជាប្រពៃណីរវាងកម្ពុជា វៀតណាម និងឡាវ ប្រៀបដូចជាមុំចង្រ្កាន ដែលមិនអាចខ្វះបាន ហើយដែលបានពួតដៃគ្នា ជួយគ្នាទៅវិញទៅមកនៅគ្រប់កាលៈទេសៈ។ នៅក្នុងនោះ ឯកឧត្តមប្រធានរដ្ឋវៀតណាម បានថ្លែងអំណរគុណដល់កម្ពុជា ក្រោមព្រះរាជបូជនីយកិច្ចដឹកនាំរបស់អតីតព្រះមហាក្សត្រ ព្រះករុណា ព្រះបាទ សម្តេចព្រះនរោត្តម សីហនុ ព្រះបរមរតនកោដ្ឋ ព្រះអង្គបានជួយគំាទ្រដល់ប្រទេសវៀតណាមនៅក្នុងការដណ្តើមឯករាជ្យជាតិ និងការបង្រួបបង្រួមទឹកដីកាលពីអតីតកាល។

ជាមួយគ្នានេះ សម្តេចមហារដ្ឋសភាធិបតី ក៏បានថ្លែងអំណរគុណដល់ប្រទេសវៀតណាម ដែលបានជួយរំដោះប្រទេសនិងប្រជាពលរដ្ឋកម្ពុជាចេញពីរបបប៉ុលពត និងបានបន្តគំាទ្រដល់ការអភិវឌ្ឍរបស់កម្ពុជាលើគ្រប់វិស័យរហូតមក។ សម្តេចរដ្ឋសភាធិបតីក៏បានថ្លែងអំណរគុណដល់រដ្ឋាភិបាល បក្ស និងរដ្ឋសភាវៀតណាម ដែលបានផ្តល់ជំនួយសាងសង់អគាររដ្ឋបាលថី្មនៃរដ្ឋសភាកម្ពុជា ដែលសំណង់នេះគ្រោងនឹងបញ្ចប់ហើយអាចនឹងសម្ពោធដាក់ឱ្យប្រើប្រាស់នាចុងឆ្នាំ២០២៤នេះ៕
ដោយ៖ពលជ័យ
រូបភាព៖រដ្ឋសភា