បន្ទាយមានជ័យ៖ សហគមន៍ប្រើប្រាស់ទឹកនៅស្រុកភ្នំស្រុក ខេត្តបន្ទាយមានជ័យបានទទួលការផ្សព្វផ្សាយនិងការផ្ដល់បច្ចេកទេសឮអំពីប្រើប្រាស់ប្រព័ន្ធស្រោចស្រពកសិកម្ម​ទំនើប​ឬ​តាមបែបឌីជីថល ពីក្រុមការងារបច្ចេកទេសនៃក្រសួង​ធនធាន​ទឹកនិង ឧតុនិយម។ការផ្សព្វផ្សាយនេះ ខណៈគម្រោង​សាងសង់ប្រព័ន្ធស្រោចស្រពទំនើបកំពុងអនុវត្តដោយក្រសួងធនធានទឹកនិង ឧតុនិយម និងមានកិច្ចសហការពី​ដៃគូអភិវឌ្ឍន៍​វិស័យធារាសាស្ត្រ ។

ក្នុងជំនួបជាមួយសហគមន៍កាលពីចុងសប្ដាហ៍នេះឯកឧត្តម ឈុន ពុទ្ធារិទ្ធ អគ្គនាយកបច្ចេកទេសនៃក្រសួងធនធាន​ទឹកនិង​ឧតុនិយមបានបញ្ជ្រាបចំណេះដឹងនេះទៅដល់កសិករ។

បន្ថែមចំណេះដឹងនេះអ្នកឧកញ៉ា ឡេង ហួរ អ្នកសហការ​បច្ចេកទេសខាងប្រព័ន្ធធារាសាស្ត្រទំនើបនេះបានលើកឡើង ពី​ប្រព័ន្ធស្រោចស្រព​កសិកម្ម​ទំនើបឬតាមបែបឌីជីថលថា បានគ្រប់គ្រងការប្រើប្រាស់ទឹក តាមតម្រូវការនិងមានប្រព័ន្ធ​ស្រោច​ស្រពលើការងារបង្កបង្កើនផលដែលបញ្ជាបិទបើក​ដោយស្វ័យប្រវត្តិតាមប្រព័ន្ធទូរសព្ទដៃឬគ្រប់គ្រងទិន្នន័យលើប្រព័ន្ធធារាសាស្ត្រកសិកម្មមានលក្ខណៈបច្ចេកទេសទំនើបកម្មដោយកុំព្យូទ័រនោះ ។អនុវត្តបែបនេះបានកាត់បន្ថយ ការ​ចំណាយពេលវេលា កម្លាំងពលកម្ម និងថវិកាចំណាយ​ច្រើនក្នុងការងារបង្កបង្កើនផល មកចំណាយអស់តិចតែទទួល បានទិន្នផលខ្ពស់។

ចំណែក លោក ជូ បុត្រ អភិបាលស្រុកភ្នំស្រុកក្នុងនាមអាជ្ញាធរ និងប្រជាពលរដ្ឋក៏ដូចប្រជាកសិករគាំទ្រដំណើរការសាងសង់​ប្រព័ន្ធស្រោចស្រពកសិកម្មតាមបែបឌីជីថល ដែលបានផ្ដល់​ផល​ប្រយោជន៍ដល់កសិករ៕
ដោយ៖ គៀន ច័ន្ទហ៊ីន