ជំនាញជលផលខេត្តកំពង់ចាមបង្ក្រាបបទល្មើសនេសាទ, ចំណែកជនល្មើសគេចខ្លួនបាត់
កំពង់ចាម៖ ខណៈកម្ពុជាកំពុងស្ថិតក្នុងរដូវបិទនេសាទ ខណ្ឌរដ្ឋបាលជលផលកំពង់ចាម កាលពីព្រឹកថ្ងៃទី១៧ខែកក្ដដា ឆ្នាំ២០២៤សហការជាមួយអាជ្ញាធរស្រុកកំពង់សៀម កម្លាំងអធិការដ្ឋាននគរបាលស្រុក និងកម្លាំងសហគមន៍នេសាទវិហារធំ បានចុះពិនិត្យ និងបង្រ្កាបបទល្មើសជលផល ជាក់ស្ដែងចំនួនបីករណី ដោយធ្វើការរុះរើនិងកាប់បំផ្លាញចោលវត្ថុតាង នៃបទល្មើសជលផល នៅនឹងកន្លែងកើតហេតុ ។
ប្រភពបញ្ជាក់ថា ការបង្រ្កាបស្ថិតនៅចំណុចកំពង់ខ្លាញ់ ,ចំណុចបឹងអញ្ចាញនិង ចំណុចជ្រោយតាព្រោង នៃស្រុកកំពង់សៀម ។ឧបករណ៍ដែលបង្ក្រាបបានរួមមានលូស្បៃមុងសរុប ចំនួនប្រាំបួនមាត់, របាំងស្បៃមុងសរុបប្រវែង ៣១៤ម៉ែត្រ ,បង្គោលសរុប ចំនួន១០៥ដើម ,ទូកស្មាច់មួយ និងចាក់លែងកូនត្រីចម្រុះទម្ងន់ ៣,៥គីឡូ។
ក្រោយបង្ក្រាបកម្លាំងជំនាញជលផលបានដឹកជញ្ចូនឧបករណ៍នេសាទខុសច្បាប់ទាំងនេះមកដុតបំផ្លាញចោល ។រីឯជនសង្សយ័ បានដឹងខ្លួនជាមុនរត់គេចខ្លួនបាត់៕
ដោយ៖លី ពៅ
