ជួបចៃដន្យជាមួយជាងទុំ អ្នកធ្វើ “ត្រដោក” សម្រាប់អបអរពិធីបើកការដ្ឋានព្រែកជីកហ្វូណន តេជោ
បាត់ដំបង៖ស្ថិតនៅមិនឆ្ងាយប៉ុន្មានពីទីប្រជុំជនក្រុងបាត់ដំបង ប្រមាណជា៥-៦គីឡូម៉ែត្រ ពីទីរួមខេត្តបាត់ដំបង ក្នុងដំណើរដោយចៃដន្យបានមកពើបជួបប្រទះ “ជាងទុំ” ដែលកំពុងតែ កាន់កាំបិតបន្ទោះផលិត”ត្រដោកឫស្សី” ដោយផ្ចិតផ្ចង់យ៉ាង ប៉ិនប្រសប់នៅក្នុងលំនៅដ្ឋានផ្ទាល់ របស់លោកស្ថិតនៅ ភូមិតាកុក ឃុំនរា ស្រុកសង្កែ ខេត្តបាត់ដំបង។
ជាង ទុំ មានសម្បុរស្រអែម និងរាងស្តើងខ្ពស់។លោកពុំមានក្បាលពោះទេ។ជួបប្រាស្រ័យជាមួយយើង ដោយការសួរនាំបណ្តើរជាមួយ”ជាងទុំ” ជាឈ្មោះដែលអ្នកភូមិទីនេះទម្លាប់ហៅលោកជាប់មាត់ងាយស្រួលចាំ និងបានហៅ តៗតាមគ្នា។តែឈ្មោះពិត របស់លោក គឺ ហែម ភារម្យ ។
ស្ថិតក្នុងពាក់កណ្តាលវ័យទៅហើយ”ជាងទុំ”បានរៀបរាប់ត្រួសៗប្រាប់ទូរទស្សន៍អប្សរាថា “ត្រដោកឫស្សី” ដែលកំពុងតែផលិតនៅពេលនេះគឺមិនមែនជាអាជីពឬក៏មុខរបរប្រចាំថ្ងៃរបស់លោកនោះទេ តែនេះជាការពឹងពាក់ម្តងម្កាលនិងធ្វើជូនមិត្តភក្តិដែលមកពឹងពាក់តែប៉ុណ្ណោះ ហើយក៏ជាតម្រូវការចាំបាច់ផងដែរ ទើបលោកឆ្លៀតចំណាយពេលវេលាធ្វើវា។
លោក ហែម ភារម្យ ហៅ “ជាងទុំ” បានបន្ថែមថា តាមពិតមុខរបរពិតប្រាកដរបស់លោក គឺជាជាងឈើធ្វើផ្ទះ តុ ទូ កំប៉ិកកំប៉ុកដើម្បីរកចំណូលផ្គត់ផ្គង់ជីវភាពប្រចាំថ្ងៃក្នុងគ្រួសារតែប៉ុណ្ណោះ។ លោកបន្តថា ការធ្វើត្រដោកនេះទៀតសោត ក៏ជាការពឹងពាក់ពីលោក ភួង សិទ្ធិ ប្រធានមន្ទីរសង្គមកិច្ចខេត្តបាត់ដំបងដែលជាមិត្តភក្តិ។លោក ភួង សិទ្ធ បានយកដើមឫស្សី៣-៤ដើម មកពឹងពាក់ឱ្យលោកជួយធ្វើ ត្រដោក ត្រៀមសម្រាប់គោះអបអរសាទរពិធីបើកការដ្ឋានព្រែកជីកហ្វូណនតេជោ នៅថ្ងៃទី៥ ខែសីហាឆ្នាំ២០២៤ខាងមុខ។
ក្នុងដៃកាន់ជាប់នូវដើមប្ញស្សីដែលបម្រុងនឹងកាត់ជាកំណាត់ៗជាងទុំ បាននិយាយប្រាប់យើងថា លោកធ្វើ”ត្រដោកឫស្សី”ដោយមើលគំរូរបស់គេនិងសុំឱ្យផ្តល់ដើមឫស្សីតែប៉ុណ្ណោះ។តែប្រសិនមានអ្នកត្រូវការផ្សេងទៀត លោកនឹងធ្វើជូន ដោយគិតកម្រៃពលកម្ម គឺធ្វើត្រដោកមួយតម្លៃប្រាំពាន់រៀល ។ឯដើមឫស្សីលើម្ចាស់អ្នកកុម្ម៉ង់។
ចំណែកលោក ភួង សិទ្ធិ ប្រធានមន្ទីរសង្គមកិច្ច អតីតយុទ្ធជន និងស្តារនីតិសម្បទាខេត្តបាត់ដំបង និងជាម្ចាស់ត្រដោក ដែលបានពឹងពាក់”ជាងទុំ”ជាមិត្តភក្តិរាប់អានក្នុងភូមិផងជិតខាងគ្នា បានរំលេចបន្ថែមថា នៅសល់មិនដល់កន្លះខែទៀតទេ ព្រែកជីកប្រវត្តិសាស្ត្រដែលមិនធ្លាប់មានពីមុនមក នឹងបើកការដ្ឋានសាងសង់នៅថ្ងៃទី៥ខែសីហាខាងមុខ។លោកបន្តថា នេះជាការបង្កើតសមិទ្ធផលថ្មីដែលប្រជាកម្ពុជាត្រូវតែចូលរួមអបអរសាទរ ។ក្នុងនេះមានប្រជាជននៅខេត្តបាត់ដំបងផងដែរ។
គប្បីជម្រាបថា ថ្មីៗនេះរាជរដ្ឋាភិបាល បានណែនាំរួចមកហើយដើម្បីអបអរសាទរថ្ងៃបើកការដ្ឋានជីកព្រែកជីកហ្វូណនតេជោ ក្រោមអធិបតីភាពដ៏ខ្ពង់ខ្ពស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា គឺគ្រប់ក្រសួង ស្ថាប័ន ទាំងថ្នាក់ជាតិ និងថ្នាក់ក្រោមជាតិ តាមគ្រឹះស្ថានសាធារណៈនិងឯកជន ព្រមទាំងជនរួមជាតិគ្រប់ៗរូបទូទាំងប្រទេស រួមគ្នាធ្វើការវាយគង គោះជួង វាយរគាំង ទូងស្គរ ទះប៉ោតនិងគោះត្រដោក តាមគ្រប់មធ្យោបាយដែលខ្លួនមាន នាវេលា ម៉ោង៩:០៩នាទីព្រឹក ថ្ងៃទី៥ ខែសីហាឆ្នាំ២០២៤ខាងមុខ នៅគ្រប់ទីកន្លែងសាធារណៈសំខាន់ៗ ទីស្ដីការក្រសួង ស្ថាប័នថ្នាក់ជាតិ អង្គភាពរដ្ឋបាលរាជធានី ខេត្ត ក្រុង ស្រុក ខណ្ឌ ឃុំ សង្កាត់ គ្រប់ទីវត្តអារាម មណ្ឌលវិបស្សនា អាស្រម សាលាបុណ្យវិហារសាសនា ស្នាក់ការ ស៊ូរ៉ាវ សាលារៀនរដ្ឋ និងឯកជននិងទីប្រជុំសហគមន៍។
ដោយឡែកក្នុងខេត្តបាត់ដំបង ឯកឧត្តម សុខ លូ អភិបាលខេត្ត បានណែនាំដល់គ្រប់អាជ្ញាធរ ក្រុង ស្រុក ឃុំ សង្កាត់ និងបណ្តាមន្ទីរ ស្ថាប័ន អង្គភាពនានា ក្នុងភូមិសាស្រ្តរដ្ឋបាលខេត្តឱ្យអនុវត្តនូវសារាចរណែនាំរបស់រាជរដ្ឋាភិបាល៕
អត្ថបទនិងរូបភាព៖ អ៊ុក សំអាន
