(ភ្នំពេញ)៖ លោក Maty Hauck គ្រូបង្វឹកកីឡាចំបាប់ជម្រើសជាតិអាមេរិក និងជាអ្នកជំនាញទទួលខុសត្រូវបច្ចេកបច្ចេកទេសរបស់សហព័ន្ធកីឡាចំបាប់ពិភពលោក បានមកអង្គេតការណ៍ នៅកម្ពុជារយៈពេល ៨ថ្ងៃ ។

កញ្ញា កាង ណុចបវរ អគ្គលេខាធិការ សហព័ន្ធកីឡាចំបាប់កម្ពុជា បានថ្លែង​គូស​បញ្ជាក់ថា ការមកដល់កម្ពុជា របស់ លោក Maty Hauck នេះ គឺតាម​រយៈ គណកម្មាធិការជាតិអូឡាំពិក ក្រោមកិច្ចសហការពីសហព័ន្ធកីឡាចំបាប់​កម្ពុជា។

កញ្ញា បានពន្យល់ថា ការមកដល់កម្ពុជារបស់ អ្នកជំនាញទទួលបន្ទុកផ្នែក​អភិវឌ្ឍន៍បច្ចេកទេស សហព័ន្ធកីឡាចំបាប់ពិភពលោកនេះ គឺមានរយៈ៨ថ្ងៃ ចាប់ពីថ្ងៃទី១៨ ដល់ថ្ងៃទី២៥ ខែ កក្តដា ឆ្នាំ២០២៤ ដោយរយៈពេល៨ថ្ងៃនេះ លោកមានបេសកម្មចុះចែករំចែក បច្ចេកទេសដល់កីឡាករកីឡាការិនីជម្រើស​ជាតិកីឡាចំបាប់កម្ពុជា និងទៅចែករំលែកបច្ចេកទេសទៅតាមបណ្តាក្លឹបចំបាប់​នានា តាមបណ្តាខេត្ត​ ដែលស្ថិតនៅក្រោមចំណុះរបស់សហព័ន្ធកីឡាចំបាប់​កម្ពុជា។

កញ្ញា អគ្គលេខាធិការ បានបញ្ជាក់ទៀតថា តាមគម្រោងក្នុងជំហ៊ានដំបូងនេះ គាត់មកកាន់កម្ពុជារយៈពេល៨ថ្ងៃ និងត្រឡប់ទៅវិញ ហើយ នៅខែ តុលា ឆ្នាំ២០២៤ខាងមុខ នឹងត្រឡប់មកកម្ពុជាម្តងទៀត ដោយបណ្តុះបណ្តាល​គ្រូបង្វឹក​វ័យកីឡាចំបាប់វ័យក្មេងតាមបណ្តាក្លឹបរាជធានីខេត្ត និងបណ្តុះ​ចៅ​ក្រុមអាជ្ញាកណ្តាល ដើម្បីបង្កើនចំណេះដឹងអភិវឌ្ឍន៍កីឡាចំបាប់ឱ្យមានធន​ធាន​កាន់តែរីកចំរើន ពិសេស គឺបណ្តុះសមត្ថភាពគ្រូបង្វឹក និងកីឡាកីឡាករ​កីឡាការិនីឆ្ពោះកីឡាយុវជនអាស៊ីឆ្នាំ២០២៩ ដែលកម្ពុជាទទួលធ្វើ​ជាម្ចាស់ផ្ទះ​។

ក្រៅពីនោះ លោក ក៏នឹងជួយអភិវឌ្ឍន៍សមត្ថភាពកីឡាករកីឡាការិនី​ជម្រើស​ជាតិចំបាប់កម្ពុជា តាមរយៈការផ្តល់ជូននូវបច្ចេកទេសថ្មីៗ ត្រៀមសម្រាប់ចូល​រួម​ការប្រកួតកីឡាចំបាប់ក្នុងសាលនៅប្រទេសថៃ នាខែ វិច្ឆិកា ឆ្នាំ២០២៤​ផងដែរ ។

សូមបញ្ជាក់ ការមកដល់កម្ពុជារយៈពេល៨ថ្ងៃរបស់លោក Maty Hauck គឺជាការមកអង្កេតការណ៍មុន និងលោកត្រឡប់មកកម្ពុជាម្តងទៀតនៅខែ តុលា ឆ្នាំ២០២៤ ហើយ ការមកម្តងទៀត លោក មានភារៈកិច្ចជួយកម្ពុជា​ជា​ច្រើន ក្នុងនោះមាន អភិវឌ្ឍន៍ផ្នែកបច្ចេកទេសជូនគ្រូបង្វឹកកីឡាចំបាប់​វ័យក្មេង​កម្ពុជារាជធានី ខេត្ត ក្រោមអាយុ១៥ឆ្នាំ បណ្តុះបណ្តាល​ជំនាញ​ចៅ​ក្រមអាជ្ញា​កណ្តាល និង ផ្តល់ចែករំលែកផែនការហ្វឹកហាត់សម្រាប់គ្រូបង្វឹក ដើម្បីបង្វឹក​ជម្រើសជាតិឱ្យមានគុណភាព ៕

រូបភាព ៖ ជីម ភារ៉ា
អត្ថបទ ៖ ជាវ ចន្ធូ