(ភ្នំពេញ)៖ ដើមត្នោតត្រូវបានចាត់បញ្ចូល ជាប្រភេទរុក្ខជាតិនិមិត្តរូបជាតិ នៃប្រទេសកម្ពុជា ។ ដើមត្នោតគេអាចកែច្នៃធ្វើជាសម្ភារៈប្រើប្រាស់បានច្រើន យ៉ាងណាស់ ហើយក្រៅពីនេះវាក៏ផ្តល់ផ្នែកអាហារដល់យើង ច្រើនបែប ដែរដូចជាទឹកត្នោត និងផ្លែត្នោត សុទ្ធតែអាចប្រើធ្វើជាអាហារបានទាំងខ្ចី និងទុំ។

ដើមឈើដ៏មានតម្លៃមហាសាលមួយនេះ ក្នុងការដាំគឺគេឱ្យទុក ចន្លោះពីដើម​មួយទៅដើមមួយមានចម្ងាយ ៤ ម៉ែ​ត្រ ដើម្បីឲ្យដើមត្នោតលូតលាស់ធំធាត់​បានលឿន និងហុចផលបានល្អផង។

ឯកឧត្តម ខ្វៃ អាទិត្យា មន្រ្តីអ្នកនាំពាក្យក្រសួងបរិស្ថានបានឱ្យដឹងថា៖យុទ្ធនាការដាំត្នោតតាមមូលដ្ឋាននឹងត្រូវបានគេរៀបចំឡើងនៅថ្ងៃទី ២១ ខែកក្កដា ឆ្នាំ២០២៤នៅក្នុងឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ។កូនត្នោតចំនួន១០ ០០០ដើមនឹងត្រូវបានគេដាំក្នុងពិធីនេះ ហើយ កាលពី​ថ្ងៃសុក្រ ទី១៩ ខែកក្កដា ឆ្នាំ២០២៤ ត្រូវបានគេដឹកដល់ទីតាំងរួចហើយដែរ ដើម្បីត្រៀមដាំ។

ឯកឧត្តមបញ្ជាក់ថាកូនត្នោតទាំងនេះជាអំណោយរបស់ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន​ និងជាប្រធានក្រុមការងារថ្នាក់ជាតិចុះមូល​ដ្ឋាន​ខេត្តត្បូងឃ្មុំ ដែលការដាំនេះគឺ សម្រាប់ដើម្បីបុព្វហេតុបរិស្ថាន សម្បត្តិ​វប្បធម៌ និងធម្មជាតិ នៃមាតុភូមិកម្ពុជា ជូនកូនចៅជំនាន់ក្រោយ។

ឯកឧត្តមបណ្ឌិត អ៊ាង សុផល្លែត ធ្លាប់បានថ្លែងថា ការរៀបចំដាំកូនត្នោត សម្រាប់ទុកជាប្រយោជន៍ក្នុងសហគមន៍ បង្កើនជីវៈចម្រុះ សេដ្ឋកិច្ច សង្គម និងបង្កើនទប់ទល់នឹងការប្រែប្រួលអាកាសធាតុ។ ជាមួយគ្នារដ្ឋមន្រ្តី​ក្រសួង​បរិស្ថានរូបនេះបានជំរុញ និងលើកទឹកចិត្តដល់ប្រជាពលរដ្ឋកម្ពុជា ឱ្យចូលរួម​ដាំ ដើមត្នោត និងដើមឈើនានា ឱ្យបានច្រើនដើម្បីផ្តល់ជាប្រយោជន៍ដល់​ប្រជាពលរដ្ឋកម្ពុជាគ្រប់រូបនិងបរិស្ថាន។

សូមរំលឹក​ថា៖កន្លងមក ក្រសួងបរិស្ថានបានដាក់ចេញយុទ្ធសាស្រ្ត​ចក្រាវិស័យ​បរិស្ថាន ដែលក្នុងនោះយុទ្ធសាស្ត្រទី២ «ភាពបៃតង» ផ្តោតលើអាទិភាពចំនួន​៣គឺ ជំរុញការដាំដុះកូនឈើ ដើម្បីបង្កើនគម្របបៃតង ក្នុងនោះមានយុទ្ធនាការ​«ពន្លកបៃតង» ចែកជូនកូនឈើជូនប្រជាពលរដ្ឋយកទៅដាំ យ៉ាងតិច ១លាន​ដើមក្នុង១ឆ្នាំ ជំរុញលើការការពារ និងអភិរក្សជីវចម្រុះការអនុវត្តច្បាប់ ១០០% ចំពោះបទល្មើសធនធានធម្មជាតិ ព្រមទាំងកិច្ចសហការនានាជាមួយ​អ្នកពាក់ព័ន្ធ ដើម្បីពង្រឹងការគ្រប់គ្រងធនធានធម្មជាតិ និងជំរុញ និងលើក​ទឹកចិត្ត​ដល់ប្រជាពលរដ្ឋកម្ពុជាឱ្យដាំដើមឈើឱ្យបានច្រើន ចូលរួមអភិរក្ស​ជីវៈចម្រុះ និងបានបង្កើនជីវភាពតាមរយៈទេសចរណ៍ លំហែបៃតងនៅតាម​តំបន់​ការពារធម្មជាតិ។

ថ្មីៗនេះដែររដ្ឋមន្រ្តីក្រសួងបរិស្ថាន បានប្រគល់កូនត្នោតចំនួន៣០ម៉ឺនដើម ដល់យុទ្ធនាការ «ពន្លកបៃតង» នៅឆ្នាំ២០២៤ នេះ ដែលបានចែកជូន​កូនឈើសរុប ១លាន ៣សែនដើម រួចមកហើយ ដល់ប្រជាពលរដ្ឋទៅដាំ​ដោយឥតគិតថ្លៃ នៅតាមមូលដ្ឋាន វត្តអារាម សាលារៀន ទីសាធារណៈនិងដាំ​ស្តារ​ព្រៃនៅតាមសហគមន៍នានា ដើម្បីបង្កើនគម្របបៃតង ឆ្ពោះទៅសម្រេច​ទស្សនវិស័យរបស់រាជរដ្ឋាភិបាលកម្ពុជា ដែលបានដាក់ចេញបង្កើនគម្របព្រៃ ៦០% នៅឆ្នាំ២០៥០។

បច្ចុប្បន្នរដ្ឋមន្រ្តីក្រសួងបរិស្ថានមានថ្នាលបណ្តុះកូនត្នោត ដែលគ្រោងបណ្តុះកូនត្នោតបន្ថែមទៀត ឲ្យបានច្រើនលានគ្រាប់ នៅឆ្នាំបន្តបន្ទាប់ សម្រាប់ដាំដុះនៅពេលខាងមុខ។ ជាមួយគ្នានេះ ក្រសួងបរិស្ថាន ក៏បានកំពុងជំរុញឱ្យមន្ទីរបរិស្ថានរាជធានី ខេត្តទាំងអស់ ប្រមូលគ្រាប់ត្នោត ដើម្បីបណ្តុះ ជាមួយកូនឈើនានាផ្សេងទៀត ដើម្បីទុកចែកជូនប្រជាពលរដ្ឋដាំ នៅក្នុងឆ្នាំបន្តបន្ទាប់ផងដែរ៕

ដោយ ៖ ម៉ាដេប៉ូ