ជួយបង្រៀនជនជាតិដើមភាគតិច កែច្នៃរពាក់ ការផលិតម្សៅរំដេង និងការបង្កើតផែនការគម្រូអាជីវកម្ម
កំពង់ធំ៖នៅខេត្តកំពង់ធំអង្គការសកម្មភាពដើម្បីអភិវឌ្ឍន៍(AFD )បានបើកវគ្គបណ្តុះបណ្តាល កែច្នៃសិប្បកម្មរពាក់ ផលអនុផលព្រៃឈើ ការផលិតម្សៅរំដេង និងការបង្កើតផែនការគម្រូអាជីវកម្ម ដល់តំណាងកសិករក្នុងតំបន់គោលដៅជាជនជាតិដើមភាគតិច សហគមន៍ព្រៃឈើ ក្រុមស្រ្ដីកែច្នៃ សហគមន៍នេសាទនិងសហគមន៍កសិកម្ម ដើម្បីបង្កើនប្រាក់ចំណូល នៅក្នុងភូមិខ្វាន់ទៀង ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ កាលពីព្រឹកថ្ងៃទី២២ ខែកក្កដាឆ្នាំ២០២៤។
សកម្មភាពនេះដោយមានការគាំទ្រថវិកាពីSDC/Ireland នៃគម្រោង “ការប្រើប្រាស់ដី និងការការពារធនធានធម្មជាតិជនជាតិដើមភាគតិច”។
លោក នាង ថៃ មន្ត្រីបច្ចេកទេសទីផ្សារបានបញ្ជាក់ថា គោលបំណងនៃវគ្គបណ្ដុះបណ្ដាលគឺ ផ្ដល់ការយល់ដឹងស្ដីពីផែនការគម្រូអាជីវកម្ម(CANVAS)ដល់អ្នកចូលរួម។លោកបន្តថា ច្រវាត់តម្លៃលើគម្រូអាជីវកម្ម គឺជាវិធីសាស្ត្រមួយដែលអាចពិនិត្យ មើលពីប្រព័ន្ធដំណើរការតាមទស្សនៈវិស័យជាសាកល។ ការពង្រីកមើលទៅលើផ្នែកតភ្ជាប់ណាមួយនៃខ្សែច្រវ៉ាក់ បង្ហាញ ពីគម្រូអាជីវកម្មផ្សេងៗគ្នារបស់អ្នកចូលរួម។ គម្រូផែនការអាជីវកម្ម អនុញ្ញាតិឱ្យយើងអាចពិនិត្យបានកាន់តែកៀកទៅលើ កំណត់ជាក់លាក់ណាមួយនៅក្នុងខ្សែច្រវាក តាមរយៈការសង្កេតពីគ្រប់ជ្រុងទាំងអស់។
វគ្គបណ្ដុះបណ្ដាលមានរយៈពេលបីថ្ងៃ ចាប់ពីថ្ងៃទី២២-២៤ ខែកក្កដាដោយមានអ្នកចូលរួមចំនួន១៥នាក់ ,បុគ្គលិកអង្គការសកម្មភាពដើម្បីអភិវឌ្ឍន៍(AFD )មានចំនួនប្រាំនាក់( ស្រី៤នាក់) និងគ្រូឧទ្ទេសមួយនាក់៕
ដោយ៖ប៊ុនរដ្ឋា