អនុញ្ញាតឱ្យពលរដ្ឋឃុំច្រណូកបង្កបង្កើនផលស្រូវលើដីតំបន់៣មួយរដូវទៀត តែហាមកាប់ទន្ទ្រានថែម
កំពង់ឆ្នាំង៖ ឯកឧត្តម ប៉ាន់ ខែមប៊ុនថន រដ្ឋលេខាធិការទីស្ដីការគណៈរដ្ឋមន្ត្រីនិងជានាយករងខុទ្ទកាល័យសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជាបានបញ្ជាក់ថា តបតាមការសំណូមពររបស់ប្រជាពលរដ្ឋរស់នៅក្នុងឃុំច្រណូក ស្រុកកំពង់លែង ខេត្តកំពង់ឆ្នាំង សម្ដេចធិបតី ហ៊ុន ម៉ាណែត សម្រេចអនុញ្ញាតឱ្យបងប្អូនចូលបង្កបង្កើនផលលើដីតំបន់៣មួយ រដូវកាលទៀត តែហាមកាប់ទន្ទ្រានដីព្រៃលិចទឹកនៅសេសសល់បន្តទៀតសូម្បីដើមឈើមួយដើម ។
ឯកឧត្តម ប៉ាន់ ខែមប៊ុនថន បញ្ជាក់បែបនេះក្នុងឱកាសអមដំណើរជាមួយលោកជំទាវ កែ ច្ទនមុន្នី តំណាងរាស្ត្រមណ្ឌលខេត្តកំពង់ឆ្នាំង និងឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង អញ្ជើញជួបសំណេះសំណាលជាមួយប្រជាពលរដ្ឋនៅសាលាឃុំច្រណូកកាលពីព្រឹកថ្ងៃទី២៣ ខែកក្កដាឆ្នាំ ២០២៤។
ឯកឧត្តមបានបន្តថា កាលមុនបងប្អូននៅស្រុកកំពង់លែង ភាគច្រើនគឺ ប្រកបមុខរបរនេសាទត្រី ប៉ុន្តែក្រោយមកផលនេសាទបានធ្លាក់ចុះ បងប្អូនបានងាកមកកាប់ទន្ទ្រានព្រៃលិចទឹក យកដីធ្វើស្រែ។ដូច្នេះហើយ មន្ទីរ ក្រសួងពាក់ព័ន្ធ ដែលមានភារកិច្ចការពារព្រៃលិចទឹកបានអនុវត្ត តាមតួនាទីរបស់ខ្លួន ក្នុងនោះមានទាំងអាជ្ញាធរដែនដីផងដែរ។ឯកឧត្តមបន្តថាថ្ងៃនេះប្រសិនបើមិនមានការ យកចិត្តទុកដាក់ពីអាជ្ញាធរឃុំ ស្រុក ខេត្ត ទេម៉្លេះសមពុំមានវត្តមានរបស់ឯកឧត្តមចូលមកជួបសំណេះសំណាល ជាមួយបងប្អូនដែរ ព្រោះរឿងសំណូមពររបស់បងប្អូនប្រជាពលរដ្ឋបានដឹងដល់សម្ដេចធិបតី ហ៊ុន ម៉ាណែត កាលពីប៉ុន្មានថ្ងៃមុនហើយបានចាត់ឱ្យឯកឧត្តមមកថ្ងៃនេះ ដើម្បីសម្របសម្រួល ជាមួយបងប្អូនប្រជាពលរដ្ឋ ព្រោះសម្ដេចមានមនោសញ្ចេតនា ជ្រាលជ្រៅ និងយកចិត្តទុកដាក់ចំពោះបងប្អូនខ្លាំងណាស់។
ឯកឧត្តមបានបញ្ជាក់ថាបើបងប្អូនពិតជាចង់បង្កើនផលលើដីតំបន់៣ ដែលធ្លាប់ធ្វើពីមុនមក ហើយចាប់ពីថ្ងៃពុធខានស្អែកនេះទៅ ត្រូវមកដាក់ពាក្យស្មើសុំនៅសាលាឃុំ ហើយធ្វើកិច្ចសន្យាឱ្យបានត្រឹមត្រូវច្បាស់លាស់ មិនអាចសុំធ្វើមួយរដូវហើយមួយរដូវទៀតនោះទេ។ ជាមួយគ្នានេះអាជ្ញាធរខេត្ត ស្រុក ឃុំ ត្រូវយកចិត្តទឹកដាក់លើពាក្យស្មើសុំរបស់បងប្អូនប្រជាពលរដ្ឋដែលរស់នៅក្នុងភូមិច្រណូកពិតប្រាកដ ។ហាមមានប្រជាពលរដ្ឋលំហូរចូលពីខេត្តដទៃ មកទន្រ្ទានយកដីបន្តទៀត៕
ដោយសុខ គឹមសៀន