ចិនរកលុយបាន ២១៥ពាន់លានដុល្លារ ក្លាយជាប្រទេសលក់ស្រាធំបំផុតរបស់ពិភពលោក
ប៉េកាំង៖ ការសិក្សាថ្មីមួយរបស់អង្គការ World Spirits Alliance (WSA) បានរកឃើញថា ប្រទេសចិនបាននាំមុខគេក្នុងការលក់គ្រឿងស្រវឹងជាសកលក្នុងឆ្នាំ ២០២២ ខណៈដែលរបាយការណ៍ក្នុងឆ្នាំ ២០២៣ នៅពុំទាន់មានប្រភពទម្លាយឱ្យដឹងនៅឡើយទេ។ នេះបើយោងតាមការចេញផ្សាយរបស់សារព័ត៌មានរុស្ស៊ី RT។
![](https://asset.ams.com.kh/central/media/2024/07/photo_2024-07-23_16-14-20-1024x693.jpg)
អង្គការ WSA បានបញ្ជាក់ថា ឧស្សាហកម្មគ្រឿងស្រវឹងបានចូលរួមចំណែករហូតដល់ ៧៣០ពាន់លានដុល្លារដល់ផលិផលក្នុងស្រុកសរុប (GDP) របស់ពិភពលោក ហើយបានបង្កើតការងារដល់បុគ្គលិកចំនួន ៣៦លាននាក់នៅទូទាំងពិភពលោក។ នៅក្នុងរបាយការណ៍ ដែលមានចំណងជើងថា ‘Spirits: Global Economic Impact Study 2024’ របស់ខ្លួន អង្គការ WSA បានគូសបញ្ជាក់ថា ឧស្សាហកម្មគ្រឿងស្រវឹងបានដើរតួនាទីយ៉ាងសំខាន់ ក្នុងជំរុញកំណើនសេដ្ឋកិច្ច, បង្កើតចំណូលពន្ធសំខាន់ៗ និងបង្កើតឱកាសការងាររាប់លានកន្លែងនៅជុំវិញពិភពលោក។
![](https://asset.ams.com.kh/central/media/2024/07/photo_2024-07-23_16-14-23-1024x682.jpg)
របាយការណ៍ដដែលបានឱ្យដឹងថា ចិនបានជាប់ចំណាត់ថ្នាក់កំពូលលើពិភពលោក ជាប្រទេសលក់ស្រានៅលើទីផ្សារធំជាងគេបំផុតក្នុងពិភពលោក ជាមួយនឹងទឹកប្រាក់ប្រហែល ២១៥ពាន់លានដុល្លារ នេះបើយោងតាមរបាយការណ៍ដែលដាក់ចំណាត់ថ្នាក់ប្រទេស ដែលផ្អែកលើបរិមាណនៃការលក់គ្រឿងស្រវឹង។ តាមពីក្រោយដោយសហរដ្ឋអាមេរិក ជាមួយនឹងទឹកប្រាក់ជាង ៦០ពាន់លានដុល្លារ។ អង្គការមានមូលដ្ឋាននៅទីក្រុងហ្សឺណែវនេះ បានបន្ថែមថា ឥណ្ឌា និងរុស្ស៊ីបានជាប់ចំណាត់ថ្នាក់លេខ៣ ជាមួយនឹងបរិមាណនៃការលក់គ្រឿងស្រវឹង មានទឹកប្រាក់ប្រហែល ២០ពាន់លានដុល្លាររៀងៗខ្លួន។
![](https://asset.ams.com.kh/central/media/2024/07/photo_2024-07-23_16-14-26-1024x666.jpg)
ឧស្សាហកម្មគ្រឿងស្រវឹងបង្កើតបានប្រាក់ចំណូលពន្ធរហូតដល់ ៣៩០ពាន់លានដុល្លារក្នុងឆ្នាំ ២០២២។ ទន្ទឹមគ្នា ក្រុមហ៊ុនផលិតគ្រឿងស្រវឹងក៏បានចំណាយប្រាក់ប្រហែល ១២០ពាន់លានដុល្លារ ទៅឱ្យអ្នកផ្គត់ផ្គង់របស់ពួកគេផងដែរ ដែលថវិកាជាងពាក់កណ្តាលបានជួយដោយផ្ទាល់ទៅដល់វិស័យកសិកម្ម៕ ប្រភព៖ RT ប្រែសម្រួលដោយ៖ ឈឹម ទីណា
![](https://asset.ams.com.kh/central/media/2024/07/photo_2024-07-23_16-14-29-1024x704.jpg)
![](https://asset.ams.com.kh/central/media/2024/07/photo_2024-07-23_16-14-33-1024x685.jpg)
![](https://asset.ams.com.kh/central/media/2024/07/photo_2024-07-23_16-14-36-1024x701.jpg)