ស្ទឹងត្រែង៖ ឯកឧត្តម សរ សុពុត្រា អភិបាលខេត្តស្ទឹងត្រែង​បានអំពាវនាវដល់មន្រ្តីរាជការ កងកម្លាំងប្រដាប់អាវុធ ប្រជាពលរដ្ឋសូម​ចាប់ដៃដាំដើមឈើ។ឯកឧត្តមបន្តថា ដាំដើមឈើផ្តើមចេញពីយើងទាំងអស់គ្នា។ដាំដើមឈើ​ឱ្យបានច្រើន ដើម្បីបង្ការ​ស្ថានភាព​គ្រោះថ្នាក់ផ្សេងៗ ពីការបម្រែបម្រួលអាកាសធាតុ និងផ្តល់នូវភាពបៃតង​។​យើងត្រូវនាំគ្នាចូលរួមទប់ស្កាត់ការកាប់​ទន្ទ្រាន​ព្រៃឈើ​គ្រប់រូបភាព ។

ឯកឧត្តមអភិបាលខេត្តស្ទឹងត្រែងថ្លែងដូចនេះកាលពីព្រឹកថ្ងៃទី២៣ ខែកក្កដា ក្នុងពិធីរុក្ខទិវា ៩កក្កដា ឆ្នាំ២០២៤ នៅ​អនុវិទ្យាល័យ​ព្រះបាទ នៅភូមិកាំងដីស សង្កាត់ព្រះបាទ ក្រុងស្ទឹងត្រែងក្រោមវត្តមានចូលរួមពីឯកឧត្តម ឈាង ឡាក់ ប្រធានក្រុមប្រឹក្សាខេត្ត ។
ឯកឧត្តម សរ សុពុត្រា បន្តថា យើងទាំងអស់គ្នា ត្រូវបន្តអនុវត្ត​គោលការណ៍”គូស្វាមីភរិយាថ្មី១គូ ដាំដើមឈើ១ដើម “និង​”ប្រជាពលរដ្ឋមួយរូបដាំដើមឈើ១ដើម “។

ក្នុងព្រឹត្តិការណ៍នេះដែរ មន្ទីរកសិកម្មដែលមានខណ្ឌរដ្ឋបាល​ព្រៃឈើស្ទឹងត្រែង ជាសេនាធិការ បានបណ្តុះកូនឈើចម្រុះ​ចំនួន១១ ០០០ដើម ក្នុងនោះមាន កូនគ្រញូងចំនួន៤០០០​ដើម កូនដើមក្ងោកចំនួន៣៥០០ដើម កូនឈើបេងចំនួន២ ៥០០ដើម កូនឈើ​ធ្នង់ចំនួន៣០០ដើម នាងនួន​៣៥០ដើម កូនព្រីងចំនួន ៣០០ដើម និងលឿងរាជចំនួន៥០ដើម សម្រាប់ដាំនិងចែកចាយ​ជូនប្រជាពលរដ្ឋ មន្ទីរ ស្ថាប័នផ្សេងៗ​ទៀតយកទៅដាំតាមទីសាធារណៈ សួនច្បារ វត្តអារាម និង សាលារៀន ជាដើម ។

លោក ទុំ នីរ៉ូ ប្រធានមន្ទីរកសិកម្ម រុក្ខាប្រមាញ់ និងនេសាទ​ខេត្តបានលើកឡើងថា ឆ្នាំ២០២៤ នេះ ក្រោមការចង្អុល​បង្ហាញពី​ថ្នាក់ដឹកនាំខេត្ត ពិធីរុក្ខទិវា ៩កក្កដា បានរៀបចំដាំ​ដើមឈើប្លែកជាងបណ្តាឆ្នាំមុនៗ ។​ឆ្នាំនេះភាគច្រើន​ដាំដើមក្ងោក​នៅ​តាមដង​ផ្លូវដើម្បីលំអទីក្រុង ។រដ្ឋបាលខេត្ត និងរដ្ឋបាលក្រុងស្ទឹងត្រែង ក៏ដូចជាមន្ទីរកសិកម្ម មានមហិច្ឆតា​ចង់ប្រែក្លាយ​ខេត្ត​ស្ទឹងត្រែង​ទាំងមូលទៅជាតំបន់ផ្ការីកស្រស់​ឆើតឆាយ ឬជាទីក្រុងបុប្ផា( City Flower) នាថ្ងៃអនាគត ក្នុងគោលបំណងទាក់ទាញ​ភ្ញៀវទេសចរ​មកទស្សនាខេត្តភាគ​ឦសានមួយនេះឱ្យបានច្រើន​បន្ថែមទៀត ៕

ដោយ៖ដេង ម៉ាវិន