ក្រុមអ្នកជំនាញ៖ការជួសជុលប្រាសាទបុរាណគឺចង់ឱ្យស្នាដៃដូនតានៅគង់វង្ស គ្រប់ជំនាន់
(ភ្នំពេញ)៖ ក្រុមអ្នកជំនាញជួសជុលប្រាសាទបុរាណនៅជំនាន់ថ្មីនេះ បានខិតខំអស់ពីកម្លាំងកាយចិត្ត និងដោយក្តីស្រឡាញ់មរតកដូនតាដែលមានអាយុកាលរាប់រយឆ្នាំ រួចផុតពីការខូចខាតទៅតាមអាយុកាល និងធម្មជាតិឡើយ នៅគង់វង្សយូរអង្វែងសម្រាប់កូនខ្មែរគ្រប់ជំនាន់។
លោក ឃឹម សុផល អាយុ៤៥ឆ្នាំ ជាអ្នកភូមិស្រះស្រង់ខាងជើង សង្កាត់នគរធំ ហើយក៏ជាកម្មករជំនាញជួសជុលប្រាសាទបុរាណក្នុងតំបន់អង្គរជាង២០ឆ្នាំ ជាមួយស្ថាប័នអាជ្ញាធរជាតិអប្សរា ដែលបច្ចុប្បន្ន រូបលោកកំពុងបន្តការងារជួសជុលខឿនជណ្តើរ និងបង្កាន់នាគផ្នែកខាងលិច នៃជណ្តើរកណ្តាលភាគខាងត្បូងនៃប្រាសាទអង្គរវត្ត។
![](https://asset.ams.com.kh/central/media/2024/07/photo_2024-07-25_13-11-45-1024x682.jpg)
ទាក់ទិនក្នុងរឿងនេះ លោក សុផល បានបញ្ជាក់ប្រាប់ថា ការងារជួសជុល អភិរក្សប្រាសាទបុរាណ គឺមានតម្លៃធំធេងមិនអាចកាត់ថ្លៃបាន។
ក្នុងចិត្តស្រឡាញ់ប្រាសាទបុរាណ លោក សុផល ចង់ឱ្យកេរដំណែលដូនតាខ្មែរគង់វង្សយូរអង្វែង ទុកសម្រាប់កូនខ្មែរជំនាន់ក្រោយឃើញ និងថែរក្សាបន្តទៀត។
![](https://asset.ams.com.kh/central/media/2024/07/photo_2024-07-25_13-11-46-2-1024x682.jpg)
លោក ធ្លក សុខ អាយុ ៤៩ឆ្នាំ ជាអ្នកភូមិស្រះស្រង់ខាងជើង បានបង្ហាញការសប្បាយចិត្ត ដែលរូបគាត់ចូលបម្រើការងារជួសជុលប្រាសាទបុរាណប្រមាណជិត ១០ឆ្នាំមកនេះ ព្រោះដ្បិតក្តីប្រាថ្នាចង់ឃើញប្រាសាទបុរាណមានភាពរឹងមាំជារៀងរហូត ហើយក្រុមការងារតែងតែខិតខំរួមគ្នាអស់ពីកម្លាំងកាយចិត្ត ដើម្បីឱ្យការងារនេះបានជោគជ័យ។
គួរបញ្ជាក់ថា រយៈពេលប៉ុន្មានឆ្នាំមកនេះ ក្រុមអ្នកជំនាញបានធ្វើការជួសជុលប្រាសាទជាច្រើននៅក្រុងសៀមរាប ក៏ដូចជាតំបន់ដទៃទៀតក្នុងប្រទេសកម្ពុជា សំដៅធ្វើយ៉ាងណាឱ្យប្រាសាទបុរាណខ្មែរដែលទទួលរងការបាក់បែកផ្លាស់ប្តូរមកឈរត្រដែត និងរស់រវើកឡើងវិញដើម្បីជាទីទាក់ទាញដល់ភ្ញៀវទេសចរទាំងក្នុងប្រទេសក៏ដូចជាបរទេស៕
![](https://asset.ams.com.kh/central/media/2024/07/photo_2024-07-25_13-11-46-2-1-1024x682.jpg)
![](https://asset.ams.com.kh/central/media/2024/07/photo_2024-07-25_13-11-38-2.jpg)
![](https://asset.ams.com.kh/central/media/2024/07/photo_2024-07-25_13-11-39-2.jpg)
![](https://asset.ams.com.kh/central/media/2024/07/photo_2024-07-25_13-11-39.jpg)
![](https://asset.ams.com.kh/central/media/2024/07/photo_2024-07-25_13-11-42-2.jpg)
![](https://asset.ams.com.kh/central/media/2024/07/photo_2024-07-25_13-11-43-1024x682.jpg)
![](https://asset.ams.com.kh/central/media/2024/07/photo_2024-07-25_13-11-45-1-1024x682.jpg)
ដោយ ៖ ម៉ាដេប៉ូ