កំពត៖អាជ្ញាធរស្រុកទឹកឈូ ខេត្តកំពតកាលពីព្រឹកថ្ងៃទី២៦ ខែកក្កដា ឆ្នាំ២០២៤ បានដឹកនាំមន្ត្រីរាជការ កងកម្លាំង យុជវជន សិស្សានុ​សិស្ស និងប្រជាពលរដ្ឋដាំដើមត្របែកព្រៃចំនួន៥០០ដើមបន្ថែម​នៅតំបន់រមណីយដ្ឋានភ្នំសដែលទើបង្កើតថ្មី។រដ្ឋបាលស្រុក​បានអះអាងថា សកម្មភាពនេះដើម្បីស្តារដីគម្របព្រៃឈើឡើងវិញ ពិសេសកែលម្អសោភណភាពនិងបង្កើត​ទេសភាពបៃតង​ដើម្បីទាក់ទាញទេសចរឱ្យមកកម្សាន្តកាន់តែច្រើន។

លោក អ៊ឹម ច័ន្ទសោធន អភិបាលស្រុកទឹកឈូ បានរំលឹកពី​ប្រវត្តិភ្នំស។ភ្នំសមានប្រវត្តិជាយូរលង់ណាស់​មកហើយ ទីនេះមានភ្នំពីរ។ នៅពេលដែលឡើងដល់កំពូលភ្នំ គេអាចគយគន់ទេសភាពដ៏ស្រស់​ស្អាតរបស់ក្រុងកំពត ក៏ដូចជាទេសភាព​ស្រែចម្ការ​និងជួរភ្នំ​នៅ​ជុំវិញតំបន់នោះ ។ពិសេសសម្រស់ពេលថ្ងៃរះ និងពេលថ្ងៃលិច។  បន្ថែមពី ភ្នំសជាកន្លែងសក្ការៈបូជា និងជាទីប្រតិបត្តិធម៌​តាម​បែបសាសនាផងដែរ ។ពលរដ្ឋតែងតែទៅបន់ស្រន់ បួងសួងសុំសេចក្តីសុខ និងជឿថាកន្លែង​នោះមានបារមីស័ក្តិសិទ្ធ។ ដោយឃើញសក្តានុពលដូច្នេះហើយទើបរដ្ឋបាលស្រុកផ្តួចផ្តើមរៀបចំបង្កើត​ភ្នំសឱ្យក្លាយជាតំបន់​រមណីយដ្ឋានថ្មីមួយ។ទន្ទឹមនេះក៏​ដើម្បីបង្កើត​ធនធានធម្មជាតិ ស្តារដីគម្របព្រៃឈើឡើងវិញ ទើបរដ្ឋបាលខេត្តរៀបចំកម្មវិធីដាំដើមត្របែកព្រៃ និងដើមក្ងោកបន្ថែម។

ក្រុមយុវជនដែលចូលរួមដាំដើមឈើបានបង្ហាញភាពសប្បាយរីករាយ និងគាំទ្រចំពោះគំនិតផ្តួចផ្តើមរបស់​លោកអភិបាលស្រុក​ក្នុងការរៀប​ចំតំបន់ភ្នំសឱ្យទៅជារមណីយដ្ឋានដ៏ទាក់ទាញ  ពីព្រោះភ្នំស នៅជិតក្រុង។ផ្លូវងាយស្រួលធ្វើដំណើរ និងមានទេសភាព ស្អាត។ បរិយាកាសល្អ។ពួកគេចង់ឱ្យពលរដ្ឋក្នុងមូលដ្ឋានចូលរួមធ្វើអនាម័យ បង្កើតបរិស្ថានល្អនិង ចូលរួមដាំដើមឈើ ថែរក្សាដើមឈើឱ្យលូត​លាស់ល្អ ។
  
តាមការបញ្ជាក់ ឆ្នាំ២០២៤នេះ រដ្ឋបាលស្រុកទឹកឈូ បានបើកធ្វើយុទ្ធនាការដាំដើមឈើប្រណិត និងដើមឈើលម្អ បានចំនួន​៥.០០០ដើមហើយ ។ក្នុងនោះមាននៅអមតាមដងផ្លូវទៅរមណីយដ្ឋាន​ទឹកឈូ ផ្លូវទៅទំបន់ប្រទាក់ក្រឡា ផ្លូវមកកាន់តំបន់ភ្នំស និងដាំដើមត្របែកព្រៃនៅជម្រាលភ្នំស ដែលជាលើកទី៣នៅព្រឹកនេះ ៕
អត្ថបទនិងរូបភាព៖ សិលា សារិន