កែប៖អ្នកដំណើរឬភ្ញៀវទេសចរទាំងឡាយ​ដែលធ្វើដំណើរឆ្លង កាត់ឬមកកម្សាន្តខេត្តកែប តែងតែចាប់អាម្មណ៍ខ្លាំងនឹងដើមក្ងោក។ពិសេសនៅខែដែល​ដើមក្ងោកចេញផ្កា។ភ្ញៀវទាំងឡាយក៏តែងតែ ថតផ្តិតយកទិដ្ឋភាពទាំងនេះទុកជាអនុស្សាវរីយ និងប្រើប្រាស់​លើបណ្ដាញសង្គម។ ​តាមការប៉ាន់ស្មានដោយអ្នកជំនាញដើម ក្ងោកនៅទឹកដីខេត្តកែបមានប្រមាណជាងមួយសែនដើម។

ខណៈ ដើមក្ងោកហាក់បីដូចជា​រុក្ខជាតិបញ្ជាក់អត្តសញ្ញាណរបស់ ខេត្តកែបនោះ មន្ត្រីជំនាញបានជំរុញដល់មន្ទីរ អង្គភាព ស្ថានប័នរដ្ឋ ឯកជន និងប្រជាពលរដ្ឋ​បន្តដាំដើមក្ងោកបន្ថែមដើម្បីបង្កើនសោភណ បង្កើតភាពបៃតងផង និងដើម្បីទាក់ទាញ​ទេសចរផង។
លោក អិន សៅ ប្រធានមន្ទីរបរិស្ថានខេត្តកែបបានឱ្យដឹងថា ផ្អែកតាមចក្ខុវិស័យរបស់ឯកឧត្តម សោម ពិសិដ្ឋ​អភិបាលខេត្តនឹងធ្វើឱ្យ​ក្រុងកែបក្លាយជាក្រុងធម្មជាតិ។ជាគោលដៅទេសចរណ៍បៃតង។លោកបានបន្ថែមថា កែបជាខេត្តដែលមានដើមក្ងោកច្រើន​ជាងគេ​នៅទូទាំងប្រទេស ។កែបបានក្លាយជាទីក្រុងផ្កាក្ងោកដែលមានសម្រស់ឆើតឆាយ និងបាន ទាក់ទាញភ្ញៀវទេសចរ​ជាច្រើនឱ្យ​មកទស្សនានៅរដូវក្ងោកផ្កា ចន្លោះ ខែមីនា ដល់ ខែសីហា។លោកបន្តថា ដើមក្ងោករាប់រយដើមបាន ដាំបន្ថែម នៅតាមដងផ្លូវនានា ក្នុងរដូវវស្សាឆ្នាំនេះ។

លោកប្រធានមន្ទីរបានបន្តថា ចំពោះដើមឈើលម្អ ក្រៅពីបាន ដាំដើមក្ងោកទៅ  រដ្ឋបាលខេត្តក៏បានដាំដើមលឿងរាជ ភួងម៉ាឡៃ និងប្រភេទដើមផ្កាសាគូរ៉ា ដើម្បីធ្វើឱ្យមានផ្កា ចម្រុះពណ៌នៅរដូវផ្ការីក។លោកបានលើកទឹកចិត្ត ដល់មន្ទីរអង្គភាព ស្ថាប័នរដ្ឋ និងឯកជន ប្រជាពលរដ្ឋនៅទូទាំងខេត្ត សូមចូលរួមដាំ និងអភិរក្សធនធាន មានស្រាប់ ពិសេសព្រៃឈើតំបន់ឧទ្យានជាតិកែប។

គួររំលឹកថា ក្រសួងទេសចរណ៍បានដាក់ចេញនូវសៀវភៅផែនការមេ អភិវឌ្ឍន៍វិស័យទេសចរណ៍ខេត្តកែប ២០២៣​-២០៣៥  ក្នុងចក្ខុវិស័យ ប្រែក្លាយខេត្តកែបជា “គោលដៅទេសចរណ៍ធម្មជាតិ និងសមុទ្រ សម្រាកកម្សាន្តបែបប្រណិតកម្រិតខ្ពស់”ដោយប្រកាន់យកគោលការណ៍ នៃការអភិវឌ្ឍន៍ប្រកបដោយចីរភាព សុវត្ថិភាព គុណភាព ភាពប្រកួតប្រជែង និងទេសចរណ៍បែបឆ្លាតវៃ ។
ដោយឡែកឆមាសទី១ឆ្នាំ២០២៤ ខេត្តកែបមានទេសចរមក កម្សាន្តជាង៨១ម៉ឺននាក់ ៕
អត្ថបទនិងរូបភាព៖ សិលា សារិន