ស្វាយរៀង៖ កម្មការិនីម្នាក់បានបាត់បង់ជីវិតភ្លាមៗ និងរងរបួសជាង១០​នាក់ ក្នុងហេតុការណ៍គ្រោះថ្នាក់ចរាចរណ៍ដ៏រន្ធត់ ដោយសារ​រថយន្ត​ដឹកកម្មករបើកបុករះក្រុមកម្មករកំពុងឈរចាំរថយន្តជិះត្រឡប់ទៅផ្ទះ។រឿងដែលគួរឱ្យសង្វេគជនរងគ្រោះដល់ជីវិត​គ្រោងនឹងចូលរោងការ​នៅខែខាងមុខឆាប់ៗ​។ហេតុការណ៍នេះ បានកើតឡើងកាលពី​ល្ងាចថ្ងៃ​ទី២៧ ខែកក្កដាឆ្នាំ ២០២៤ ស្ថិតនៅ​ក្នុងតំបន់សេដ្ឋកិច្ចពិសេស​ហ្គីហ្គាស្វាយរៀង រីសត នៃភូមិដើមពោធិ៍ ឃុំកណ្ដៀងរាយ ស្រុកស្វាយ​ទាប។

សមត្ថកិច្ចបានឱ្យដឹងថានារីរងគ្រោះដល់ជីវិតឈ្មោះ រឿន ពិសីអាយុ ១៧ឆ្នាំ មានទីលំនៅនៅភូមិទួលសាលា ឃុំជ្រុងពពេល ស្រុករំដួល ខេត្តស្វាយរៀង ។អ្វីគួរឱ្យសង្វេគទៀតនោះ នារីរងគ្រោះទើបតែភ្ជាប់​ពាក្យបានបីខែ ហើយមានគម្រោង​រៀបអាពាហ៍​ពិពាហ៍នៅប៉ុន្មានខែ​ខាងមុខ។

ប្រភពអះអាងថា មុនពេលកើតហេតុក្រុមកម្មករមានគ្នីគ្នា​ប្រមាណ​ពី២០នាក់ទៅ ៣០នាក់កំពុងឈរចាំរថយន្តជិះត្រឡប់ទៅផ្ទះវិញ ។ស្រាប់តែមានរថយន្តដឹកកម្មករម៉ាកហ៊ីយ៉ាន់ដាយពាក់ផ្លាកលេខភ្នំពេញ 3E0377 ពណ៌លឿងបើកបរក្នុង​ល្បឿនលឿន​បានបុក​ពំនូតឱ្យ​ប្រុងប្រយ័ត្នកាត់ថ្នល់ ក្នុងតំបន់សេដ្ឋកិច្ចពិសេសហ្គីហ្គាស្វាយរៀង រីសត បណ្ដាលឱ្យ​ហោះផ្លោងរេចង្កូត​ឡើងទៅចិញ្ចើម​ថ្នល់បុករះទៅលើកម្មករ កម្មការនី ដែលកំពុងឈររង់ចាំរថយន្ត ។រថយន្តបានបុកហើយកិនពី​លើនារីម្នាក់​បណ្ដាលឱ្យស្លាប់ភ្លាមៗ​នៅក្រោមរថយន្ត និងកម្មករជាង ១០នាក់ផ្សេងទៀតរងរបួសធ្ងន់ ស្រាល។

ក្រោយបង្កហេតុរថយន្តបានជ្រុលបុកផ្ទប់នឹងដើមឈើទៅមុខលែង។ប្រសិនជាពុំមានដើមឈើទប់ទេ ប្រហែលជាមានអ្នករងគ្រោះ
ច្រើន​ជាងនេះ។

បុរសអ្នកបើកបរឈ្មោះប៉ុន សូនី អាយុ ៣៦ ឆ្នាំរស់នៅភូមិតានូ ឃុំចំបក់ ស្រុកស្វាយជ្រំ ខេត្តស្វាយរៀង ត្រូវបានសមត្ថកិច្ចឃាត់ខ្លួន។ ចំណែករថយន្តខូចខាតធ្ងន់សមត្ថកិច្ចយកទៅរក្សាទុក​នៅអធិការដ្ឋាននគរបាលស្រុកស្វាយទាប ដើម្បីដោះស្រាយនៅ​ពេល​ក្រោយ។ ប៉ូលិសសន្និដ្ឋានបឋមថា មូលហេតុនៃគ្រោះថ្នាក់បណ្ដាលមកពីបើកបរ​ក្នុងល្បឿនលឿន ខ្វះការប្រុងប្រយ័ត្ន​៕
ដោយ៖នុត នាង