សៀមរាប៖ទិវារត់ប្រណាំងម៉ារ៉ាតុនចក្រភពអង្គរលើក​ទី៩ ប្រារព្ធឡើង​នៅខាងមុខប្រាសាទអង្គរវត្តកាលពីព្រលឹមនៃព្រឹកថ្ងៃទី៥ ខែសីហា ឆ្នាំ២០២៤ អធិបតីភាពពីឯកឧត្តម ថោង ខុន ទេសរដ្ឋមន្ត្រីទទួលបន្ទុក​បេសកកម្មពិសេស តំណាងដ៏ខ្ពង់ខ្ពស់សម្តេច​មហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជា​ណាចក្រកម្ពុជា និងជាប្រធាន​គណៈ​កម្មាធិការគ្រប់គ្រង និងអភិវឌ្ឍន៍​ទេសចរណ៍​សៀមរាប-អង្គរ ឯកឧត្តមអភិបាលខេត្តសៀមរាប រួមទាំងអាជ្ញាធរពាក់ព័ន្ធ ក្រុមអត្ត​ពលិកជាតិ និងអន្តរជាតិ​យ៉ាងច្រើនកុះករ។

ក្នុងព្រឹត្តិការណ៍លើកនេះមានអត្តពលិកចំនួន៣.០២១នាក់មកពីបណ្ដាប្រទេសចំនួន៥១បានចូលរួម។លោក ឡុង កុសល អគ្គនាយករង​តំណាងឯកឧត្តម ហង់ ពៅ អគ្គនាយកអាជ្ញាធរ​ជាតិ​អប្សរា ក៏បាន​អញ្ជើញ​ចូលរួមនៅក្នុងទិវា​រត់​ប្រណាំង​​ម៉ារ៉ាតុនចក្រភពអង្គរទី៩​នេះដែរ។

សូមជម្រាបថា ទិវារត់ប្រណាំងម៉ារ៉ាតុនចក្រភពអង្គរ ត្រូវបានរៀប​ចំធ្វើជារៀងរាល់ឆ្នាំនៅខេត្តសៀមរាប ហើយ​ព្រឹត្តិការណ៍នៅឆ្នាំនេះ គឺធ្វើឡើងដើម្បីស្វែងរកមូលនិធិជួយដល់មន្ទីរពេទ្យគន្ធបុប្ផា ក៏ដូចជាដើម្បីទាក់ទាញភ្ញៀវទេសចរ​ឱ្យមក​ទស្សនា​តំបន់ទេសចរណ៍​កម្ពុជា ពិសេសខេត្តសៀមរាបតែម្ដង។ ជាមួយគ្នានេះ ទិវានេះក៏ធ្វើ​ឡើងក្នុងគោលបំណងកិច្ចការពារ​បរិស្ថាន​បៃតង​ក្នុងរមណីយដ្ឋាន​អង្គរ៕
ដោយ៖ប៊ុន រដ្ឋា