អភិបាលរងខេត្តកំពង់ធំនិងមេបញ្ជាការប្រតិបត្តិការសឹករងខេត្តកំពង់ធំអញ្ជើញ ចុះពិនិត្យស្ថានភាពជំនន់ទឹកភ្លៀង
កំពង់ធំ ៖ លោកអភិបាលរងខេត្តកំពង់ធំ និងឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ រួមទាំងកងកម្លាំងចំនួន៣៥នាក់ បានអញ្ជើញចុះពិនិត្យស្ថានភាពជំនន់ទឹកភ្លៀង ដែលបានជន់លិចស្រូវរបស់ប្រជាពលរដ្ឋ ស្រូវជាងបីពាន់ហិកតា គឺជាការជន់លិចធ្ងន់ធ្ងរក្នុងឆ្នាំ២០២៤នេះ ខណៈស្រូវកំពុងតែប្រមូលផល នៅក្នុងសង្កាត់ស្រយ៉ូវ ក្រុងស្ទឹងសែន និងមួយផ្នែករបស់ស្រុកកំពង់ស្វាយ ។
ក្នុងសកម្មភាពកាលពីរសៀលថ្ងៃទី៥ ខែសីហា ឆ្នាំ២០២៤ លោក ឆេង បូរ៉ា តំណាងប្រជាកសិករបានបញ្ជាក់ថា ដំណាំស្រូវប៉ែកខាងក្រោម នៅក្នុងសង្កាត់ស្រយ៉ូវ ប្រមាណបីពាន់ហិកតា ដែលកំពុងប្រមូលផល ត្រូវបានទឹកជន់លិចរយៈពេលជិតមួយសប្តាហ៍កន្លងមកហើយ ។បច្ចុប្បន្នប្រជាកសិករកំពុងសម្រុកប្រមូលផលស្រូវដណ្ដើមពីជំនន់ទឹកភ្លៀង ដើម្បីបានផលខ្លះសម្រាលនូវការខូចខាតបាត់បង់ថវិកា ។
ឧត្តមសេនីយ៍ទោ សោម ស៊ុន បានលើកឡើងថា អាជ្ញាធរ និងកងកម្លាំងកំពុងតែរិះរកវិធី ដើម្បីជួយដល់ប្រជាពលរដ្ឋ ដែលបានរងផលប៉ះពាល់ និងខូចខាតស្រូវដោយសារជំនន់ទឹកភ្លៀង និងចូលរួមសោកស្តាយចំពោះបងប្អូនប្រជាពលរដ្ឋ ដែលរងការខូចខាតជាងបីពាន់ហិកតា ដែលបងប្អូន បានចំណាយថវិកាយ៉ាងច្រើន ដើម្បីបង្កបង្កើនផលស្រូវ។ ក្នុងនោះកងកម្លាំងត្រៀម តាមការចាំបាច់នានា ដែលប្រជាជនត្រូវការ ក្នុងការបម្រើប្រជាជនដោយអស់ពីចិត្តពីថ្លើម៕
ដោយ៖ ប៊ុន រដ្ឋា