បរទេស៖ ឧទ្ធម្ភាគចក្រមួយគ្រឿង របស់ក្រុមហ៊ុន Air Dynasty បានធ្លាក់ នៅតំបន់កណ្តាល ប្រទេសនេប៉ាល់ កាលពីថ្ងៃពុធ សម្លាប់មនុស្ស ទាំង៥នាក់ រួមមាន អ្នកបើកបរ និង អ្នកទេសចរចិន ចំនួន៤នាក់។

សេចក្តីប្រកាសព័ត៌មាន របស់អាជ្ញាធរអាកាសចរណ៍ស៊ីវិល បាននិយាយថា ឧទ្ធម្ភាគចក្របានបាត់ការទាក់ទង បន្ទាប់ពីហោះបានប្រហែល ៣នាទី ហើយបានធ្លាក់ នៅក្នុងស្រុក Nuwakot ភាគខាងជើង នៃរដ្ឋធានី Kathmandu។ អាជ្ញាធរបានអះអាងថា ឧទ្ធម្ភាគចក្របានធ្លាក់នៅតំបន់ព្រៃ លើជម្រាលភ្នំមួយ ប៉ុន្តែ មិនទាន់ដឹងពីមូលហេតុ នៅឡើយទេ។ មុនពេលធ្លាក់ ឧទ្ធម្ភាគចក្របានប៉ុនប៉ងធ្វើដំណើរ ទៅកាន់តំបន់ទេសចរណ៍ Syabrubesi។

ឧស្សាហកម្មផ្លូវអាកាស របស់ប្រទេសនេប៉ាល់ បានរីកដុះដាល ក្នុងរយៈពេលប៉ុន្មានឆ្នាំ ចុងក្រោយនេះ ដោយដឹកទំនិញ និងមនុស្ស រវាងតំបន់ពិបាក ក៏ដូចជា អ្នកដើរលេង និងអ្នកឡើងភ្នំ ជាជនបរទេស។ ប៉ុន្តែ នេប៉ាល់មានកំណត់ត្រាដ៏អាក្រក់ អំពីសុវត្ថិភាពអាកាសចរណ៍ ជាច្រើនទសវត្សរ៍មកហើយ។

កាលពីពីរសប្តាហ៍មុន មានករណីធ្លាក់យន្តហោះ នៅទីក្រុង Kathmandu សម្លាប់មនុស្សទាំងអស់ នៅលើយន្តហោះ ចំនួន១៨នាក់ លើកលែងតែ អ្នកបើកយន្តហោះ។ ក្រៅពីនេះ មនុស្ស ៦នាក់ បានស្លាប់ អំឡុងការធ្លាក់ឧទ្ធម្ភាគចក្រ នៅតំបន់ភ្នំ Everest កាលពីឆ្នាំ២០២៣។ រីឯ ការធ្លាក់ឧទ្ធម្ភាគចក្រ ក្នុងឆ្នាំ២០១៩ ស្លាប់មនុស្ស៧នាក់ រួមមាន ទាំងអតីតរដ្ឋមន្ត្រីទេសចរណ៍ នេប៉ាល់ ផងដែរ៕

ប្រភពពី AFP ប្រែសម្រួល៖ សារ៉ាត