សៀមរាប៖ដើមក្ងោកចំនួន២០០ដើមត្រូវបានដាក់ចូលរណ្ដៅតូចធំ ដែលរៀបចំរួចជាស្រេច​កាលពីព្រឹកថ្ងៃទី៩ ខែសីហា ឆ្នាំ២០២៤​នៅ ភូមិគ្រួស សង្កាត់ ស្វាយដង្គំ ក្រុងសៀមរាប ដែលជាការចាប់ផ្តើម យុទ្ធនាការដាំដើមឈើមួយម៉ឺនដើមក្នុងផែនការពីរឆ្នាំ​ នៅ​ក្រុង​ទេសចរណ៍វប្បធម៌​មួយនេះ។

គោលដៅនៃការដាំនេះគឺអមដងផ្លូវទាំង៣៨ខ្សែ ក្នុងក្រុងសៀមរាប ។លោក យុន លីនណេ អភិបាលរងខេត្តតំណាងឯកឧត្តម ប្រាក់ សោភ័ណ អភិបាលខេត្តសៀមរាបបានចូលរួមដោយផ្ទាល់ក្រោមការ គាំទ្ររបស់សមាគមសហគ្រិនស្ត្រីកម្ពុជា ។លោក យុន លីនណេ បានបញ្ជាក់ថា អាជ្ញាធរខេត្តសហការជាមួយភាគីពាក់ព័ន្ធ នឹងដាំ ដើមឈើនៅតាមដងផ្លូវក្នុងក្រុង​សៀមរាបឱ្យ​បានមួយ​ម៉ឺនដើម ក្នុង​រយៈពេលពីរឆ្នាំខាងមុខនេះ។លោកបន្តថា ការចូលរួមដាំដើមឈើ នាពេលនេះ បានបង្ហាញឱ្យឃើញនូវការគាំទ្រដ៏ឧត្ដុង​ឧត្ដម ពីគ្រប់ មជ្ឈដ្ឋាន ដល់ចលនា ដាំដើមឈើ ដោយចាត់ទុកចលនានេះជា កាតព្វកិច្ចដ៏ចម្បង​ផ្សារភ្ជាប់នឹងសេចក្ដីត្រូវការចាំបាច់នៃ​ជីវភាព​រស់នៅផ្ទាល់របស់ប្រជាពលរដ្ឋនិងនាំមកនូវរុក្ខជាតិបៃតងដ៏សែនមនោរម្យលើទឹកដីខេត្ដសៀមរាប និង ធ្វើឱ្យ​ដងវិថីក្នុងក្រុង​ក្លាយ​​ជា​រុក្ខវិថី ប្រកបដោយបរិស្ថានបៃតង។ 

ឆ្លៀតក្នុងឱកាសនេះដែរលោកអភិបាលរងខេត្តបានថ្លែងអំណរគុណចំពោះអង្គការអន្ដរជាតិ អង្គការមិនមែនរដ្ឋាភិបាល ដែលយក​ចិត្ដទុក ដាក់ជួយដល់ខេត្ដសៀមរាប ក្នុងកិច្ចការថែរក្សាធនធានធម្មជាតិសំខាន់ ព្រៃ ឈើដែលជាបញ្ហាចម្បង។

លោកស្រី ហេង ចរិយា អនុប្រធានសមាគមសហគ្រិនស្ត្រីកម្ពុជាសាខា ខេត្តសៀមរាបបាននិយាយថា យុទ្ធនាការដាំដើមឈើនា​ពេលនេះ ក្នុងគោលបំណងដើម្បីបង្កើនសម្រស់និងលើកកម្ពស់សោភណភាព  ក្នុងក្រុងសៀមរាបឱ្យក្លាយជាទីក្រុងបៃតង៕
អត្ថបទនិងរូបភាព៖​ប៊ុន​រដ្ឋា