(ភ្នំពេញ)៖ អាណាព្យាបាលបេក្ខជនចូលរួមប្រឡងជ្រើសរើសគ្រូ​បង្រៀនបឋមសិក្សា​បាន​បង្ហាញការគាំទ្រ ចំពោះការរឹតបន្តឹងការប្រឡងជ្រើសរើសគ្រូបង្រៀនបឋមសិក្សា ដោយពួកគាត់គិតថា និងជួយឱ្យធនធានគ្រូកាន់តែមានគុណភាព។ នៅថ្ងៃ​ទី​​១២ ខែ សីហា ឆ្នាំ២០២៤ ដំណើរការប្រឡងប្រជែងជ្រើសរើសគ្រូបង្រៀន​បឋមសិក្សា​ទូទាំង​ប្រទេស ដែលជាការប្រឡើងវគ្គចុងក្រោយ ដើម្បីសម្រាំងជ្រើស​រើសយកបេក្ខជន ឱ្យចូលបំរើរការងារក្នុងក្របខណ្ឌក្រសួងអប់រំ​យុវជន និងកីឡា គឺបានដំណើរ ក្រោម​ការចូលរួមកាត់វិញ្ញាសា ពីសំណាក់ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធរណៈ។

ការប្រឡងប្រជែងជ្រើសរើសលើកទី២នេះ គឺមានបេក្ខជនជាប់ពីការប្រឡងជ្រើស​រើស​ដំណាក់កាលទី១ កាលពីថ្ងៃទី២៦ ខែ កក្តដា ឆ្នាំ២០២៤ ចំនួន៤៣២១នាក់ នឹងសម្រាំងជ្រើសរើសយកតែបេក្ខជនចំនួន១៣៤៧ ដើម្បីចូលបំរើរការងារ​ក្នុងក្រប​ខណ្ឌក្រសួងអប់រំយុវជននិងកីឡា។

ជុំវិញការប្រឡងប្រជែងជ្រើស​រើស​លើក​ទី២នេះ អាណាព្យាបាល លោក ឆោ លី ស្រ៊ុន មកពីខេត្តកណ្តាល និង លោក ផាត់ ខាំសា មកពីខេត្តស្ទឹងត្រែង បានបង្ហាញ​ពីការគាំទ្រយ៉ាងខ្លាំងចំពោះការរឹតបន្តឹងសម្រាប់ការប្រឡងប្រជែងជ្រើសរើសគ្រូបង្រៀនបឋមសិក្សា។ លោកថា ការរឹតបន្តឹងបែបនេះ គឺមានភាពយុត្តិធម៌សម្រាប់​បេក្ខជនអ្នកមានសមត្ថភាពគឺជាប់ក្នុងការប្រឡង។

លោក អះអាងទៀតថា ការរឹតបន្តឹងបែបនេះ នឹងជួយឱ្យគ្រូនៅពេលអនាគត​មាន​គុ​ណភាព​ល្អ នឹងជួយបង្កើតបាននូវធនធានមនុស្សល្អៗបានកាន់តែច្រើនជួយ​ឱ្យសង្គមជាតិកាន់តែវិឌ្ឍរីកចំរើន។

សូមបញ្ជាក់ថា ការប្រឡងប្រជែងជ្រើសរើសគ្រូបង្រៀនបឋមសិក្សាលើកទី២ ដែលដំណើរនៅថ្ងៃទី១២ ខែ សីហា ឆ្នាំ២០២៤នេះ មានបេក្ខជន​ដែលជាប់​ពីការប្រឡងលើកទី១ កាលពីថ្ងៃទី២៦ ខែ កក្តដា ចំនួន៤៣២១នាក់ចូលរួម ដោយចែកចេញជាពីរមណ្ឌល គឺនៅសាលាភូមិន្ទរដ្ឋបាល និង សកលវិទ្យាល័យភូមិន្ទនីតិសាស្រ្តនិងវិទ្យាសាស្រ្តសេដ្ឋកិច្ច។

សូមរឹកថា សម្រាប់ការប្រឡងប្រជែងជ្រើសរើសគ្រូបង្រៀនបឋមសិក្សា មាន បេក្ខជនដាក់ ពាក្យចូលរួមប្រឡងចំនួន៣៨១៦៨នាក់ ដោយការប្រឡងលើកទី១ កាលពីថ្ងៃទី២៦ កក្តដា ឆ្នាំ២០២៤ សម្រាំងយក៤៣២១នាក់ និងការប្រឡង លើកទី២ នៅថ្ងៃទី១២ ខែ សីហា ឆ្នាំ២០២៤ សម្រាំងយក១៣៤៧ ដើម្បីចូលបំរើរការងារក្នុងក្របខណ្ឌក្រសួងអប់រំយុវជននិងកីឡា៕

រូបភាព ជីម ភារ៉ា ជាវ ចន្ធូ អត្ថបទ៖ជាវ ចន្ធូ