ភ្នំពេញ៖ ឯកឧត្តម ខូវ ឆាយ ប្រធានសហព័ន្ធកីឡាប្រដាល់គុនខ្មែរ គូសបញ្ជាក់ ក្នុង​សន្និសីទសារព័ត៌មានថា ការប្រកួតកម្មវិធីថ្នាលគុនខ្មែរ ដែលរៀបចំដោយសហព័ន្ធ ក្រោម​កិច្ចសហការពីប៊ូស្រ្តង គឺជាការបើកទំព័រសករាជថ្មីមួយ នៅកីឡដ្ឋានស្តាតចាស់ ដើម្បីបន្តគោលដៅ ផលិតធនធានថ្នាលទូទាំងប្រទេស ដែលជាធនធានកីឡាករ​បន្តវេន។

ឯកឧត្តម ខូវ ឆាយ បន្ថែមថា តាមរយៈព្រឹត្តិការណ៍ប៊ូស្ត្រងថ្នាលគុនខ្មែរនេះ ក៏ដូចជាការ​ប្រកួត​ថ្នាលគុនខ្មែរផ្សេងៗទៀត នាពេលខាងមុខ នឹងផ្តល់ឱកាសដល់យុវជនថ្នាល​នៅ​តាម​ក្លឹបប្រដាល់គុនខ្មែរទូទាំងប្រទេសបានចូលរួមបញ្ចេញសមត្ថភាព ដកពិសោធន៍ ក្នុង​ការបង្កើនគុណផលបច្ចេកទេសឱ្យកាន់តែប្រសើរ ដើម្បីឈានទៅចូលរួមប្រកួតធំៗ ទាំង​ក្នុងស្រុក និងក្រៅស្រុក នាថ្ងៃអនាគត។

ឯកឧត្តម ខូវ ឆាយ នេះជា​បានគូសបញ្ជាក់​ទៀត​ថា ទិសដៅនៃផែនការមេ នៃយុទ្ធ​សាស្ត្រ​របស់សហព័ន្ធកីឡាប្រដាល់គុនខ្មែរ គឺមាន​គោល​​​ដៅបង្កើន និងផលិតបន្ថែមធនធា​នកី​ឡា​ករ កីឡាការិនីវ័យក្មេង ដើម្បី​ផ្គត់ផ្គង់​ដល់​ទីផ្សារប្រកួតទាំងក្នុងស្រុក និងក្រៅស្រុក ខណៈ​វិស័យកីឡាប្រដាល់គុនខ្មែរ​កំពុងរីក​ចម្រើន​គួរឱ្យកត់សម្គាល់។ កម្មវិធីប្រកួតនៅ​ក្នុងស្រុក ក្នុង១សប្តាហ៍ មាន១៨កម្មវិធី ដោយបង្ហាញពីការគាំទ្រយ៉ាងខ្លាំងក្លាពី​ប្រជា​ពលរដ្ឋខ្មែរ ដែលធ្វើឱ្យក្រុមហ៊ុនដៃគូ​អភិឌ្ឍ​ងាកមកគាំទ្របង្កើតកម្មវិធីប្រកួតប្រភេទ​កីឡាអត្តសញ្ញាណជាតិមួយនេះកាន់តែខ្លាំងក្លាយ។

សូមបញ្ជាក់ថា ការប្រកួត ប៊ូស្រ្តងថ្នាលគុនខ្មែរ នឹងត្រូវប្រកួត នាយប់ថ្ងៃទី១៤ សីហា​នេះ នៅសាលកីឡាសម្តេចពិជ័យសេនា ទៀ បាញ់ ក្នុងមជ្ឈមណ្ឌលកីឡាកង​យោធពលខេម​រភូមិន្ទ ឬស្តាតចាស់ ៕

រូបភាព ៖ ជីម ភារ៉ា
អត្ថបទ ៖ ជាវ ចន្ធូ