(ភ្នំពេញ)៖ រាជរដ្ឋាភិបាល ប្ដេជ្ញាត្រូវការពារប្រជាពលរដ្ឋ ប្រទេសជាតិ និងសន្ដិភាព​របស់កម្ពុជាឱ្យបានដាច់ខាត ខណៈរាជរដ្ឋាភិបាល ក៏ត្រៀមអនុវត្តច្បាប់ ចំពោះអ្នកបំផុស​ធ្វើអ្វីខុសច្បាប់ ។ នេះជាការគូសបញ្ជាក់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងពិធីសំណេះសំណាល ជាមួយអាចារ្យ អាចារិនី លើកទី៩ ជាង ១ពាន់នាក់ នាព្រឹកថ្ងៃទី១៥ ខែសីហា ឆ្នាំ២០២៤ ។

សម្តេចធិបតី ហ៊ុន ម៉ាណែត បានថ្លែងបញ្ជាក់ថា បច្ចុប្បន្ននេះ ក្រុមប្រឆាំងជ្រុលនិយម​នៅក្រៅប្រទេសមួយក្ដាប់តូច កំពុងបញ្ឆេះកំហឹង អូសទាញយុវជនឱ្យធ្វើសកម្មភាព ធ្វើ​បាតុកម្ម ដោយយកគំរូតាមបណ្ដាប្រទេសមួយចំនួននៅលើពិភពលោក។ ប៉ុន្ដែសកម្ម​ភាព​ទាំងនេះ គឺជាសកម្មភាពខុសច្បាប់ រាជរដ្ឋាភិបាល មិនអាចអត់ឱន​ឱ្យជាដាច់ខាត គឺត្រូវ​តែអនុវត្តវិធានការច្បាប់ ដើម្បីរក្សាស្ថិរភាព និងសន្ដិភាពរបស់កម្ពុជា ។

សម្ដេចធិបតី បានបន្តថា ជំហរមួយរបស់កម្ពុជា នៅលើឆាកអន្តរជាតិ គឺប្រឆាំងការ​បំបែករដ្ឋ ។ បើយើងប្រកាន់ជំហរបែបនេះ គឺកម្ពុជា មិនអនុញ្ញាតឱ្យមានការបំបែក​ខេត្តនៅកម្ពុជា ដាច់ខាត ។ ដូច្នេះប្រជាពលរដ្ឋ សូមកុំមានកង្វល់ចំពោះរឿង​បាត់​ខេត្តទាំង៤ របស់កម្ពុជា ឱ្យសោះ ។

ជាមួយគ្នានេះ សម្ដេចនាយករដ្ឋមន្ត្រី ក៏បានអំពានាវដល់ប្រជាពលរដ្ឋ ត្រូវមានភាព​អំណត់ ជឿជាក់ និងពិនិត្យមើលលទ្ធផលជាក់ស្ដែង លើការអភិវឌ្ឍខេត្តទាំង៤ នៃកិច្ច​សហប្រតិបត្តិការតំបន់ត្រីកោណអភិវឌ្ឍន៍ កម្ពុជា ឡាវ វៀតណាម CLV-DTA ថាតើមានការអភិវឌ្ឍបែបណា នាពេលខាងមុខ ៕

អត្ថបទ ៖ វណ្ណលុក
រូបភាព ៖ វ៉េង លីមហួត, សួង ពិសិដ្ឋ