ភ្នំពេញ៖ សត្វត្រយ៉ងយក្ស ឬ អ្នកសហគមន៍មូលដ្ឋាន ហៅថា ឬឪលើក ជាសត្វ​ស្លាបតំណាងប្រទេសកម្ពុជានិង ជាសត្វរងគ្រោះបំផុតនៅលើពិភពលោក។

តាមការប៉ាន់ប្រមាណកន្លងមកកម្ពុជាមានចំនួនប្រមាណ ៣០០ ក្បាលស្មើនឹង ៩៩% នៃសត្វត្រយ៉ងយក្សរបស់ពិភពលោកក្នុងនោះសត្វត្រយ៉ងយក្សពេញវ័យមានក្រោម ២០០ ក្បាល។

ទីភ្នាក់ងារជំនួយអាមេរិក USAIDបានឱ្យដឹងថា ៖ «ដែនជម្រកសត្វព្រៃលំផាត់​មានសត្វ​ត្រយង​យក្សរស់នៅយ៉ាងហោចណាស់ ១១ភាគរយ នៃចំនួនសត្វត្រយងយក្សសរុប​ក្នុង​ពិភពលោក។ ដោយផ្អែកលើលទ្ធផលនៃការធ្វើជំរឿនរបស់យើង ដែលធ្វើឡើងនៅដើម​ឆ្នាំនេះ យើងបានរកឃើញចំនួនសត្វត្រយងយក្សយ៉ាងហោចណាស់ចំនួន ៣៣ ក្បាល ដែលចំនួននេះមានស្ថិរភាពបើប្រៀបធៀបទៅនឹងព័ត៌មានមូលដ្ឋានឆ្នាំ ២០១៩។

លោក ប៊ូ វរសក្ស នាយកប្រតិបត្តិរបស់អង្គការជីវិតធម្មជាតិកម្ពុជាបានឱ្យដឹងថា លំផាត់​នៅតែជាជម្រកដ៏សំខាន់សម្រាប់សត្វបក្សីដ៏កម្រមួយនេះ និងមានបណ្តុំសត្វត្រយងយក្ស​ជ្រក​កោន​ច្រើន​បំផុត​មួយនៅក្នុងពិភពលោក»។

ទីភ្នាក់ងារជំនួយអាមេរិក USAIDបានឱ្យដឹងដែរថា ជំរឿនសត្វត្រយ៉ងយក្សឆ្នាំ ២០២៤ នៅស្រុកលំផាត់ បានប្រើវិធីសាស្ត្រស្តង់ដាមួយ ក្នុងការវាស់ស្ទង់និន្នាការ​ចំនួនសត្វ​ប្រភេ​ទជិតផុតពូជបំផុតមួយនេះ ដើម្បីត្រួសត្រាយផ្លូវដល់កិច្ចខិតខំប្រឹងប្រែងអភិរក្ស។ ជំរឿន​នេះគឺជាផ្នែកមួយនៃគម្រោងរេដបូកដែនជម្រកសត្វព្រៃលំផាត់ ដែលគាំទ្រដោយ USAID មរតកបៃតង ធ្វើការឆ្ពោះទៅរកការបង្កើតឥណទានកាបូនដោយកាត់បន្ថយការ​កាប់​បំផ្លាញ និងការបាត់បង់ព្រៃឈើ៕

ដោយ ៖ ម៉ាដេប៉ូ