ខេត្តកំពង់ចាម ខ្វះតែមួយទៀតមានអនុវិទ្យាល័យគ្រប់ឃុំ សង្កាត់ទូទាំងខេត្ត
កំពង់ចាម៖ឯកឧត្ដម អ៊ុន ចាន់ដា អភិបាលខេត្តកំពង់ចាម កាលពីថ្ងៃទី២៥ ខែសីហាឆ្នាំ២០២៤បានគូសបញ្ជាក់អំពីសមិទ្ធផល លើវិស័យអប់់រំរបស់ខេត្តកំពង់ចាមក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្រ្តីនិងបន្តដឹកនាំ ដោយសម្ដេចធិបតី ហ៊ុន ម៉ាណែត និងក្រោមដំបូលសន្តិភាព។ឯកឧត្តមបញ្ជាក់ថា បច្ចុប្បន្នខេត្តមានគ្រឹះស្ថានសិក្សាចំនួន ៥៤២កន្លែង ,ឃុំ-សង្កាត់មួយមាន អនុវិទ្យាល័យមួយកន្លែងចំនួន ១០៨ឃុំ-សង្កាត់ លើ១០៩ឃុំសង្កាត់ ស្មើនឹង៩៩ភាគរយ ។
ការបញ្ជាក់នេះនៅក្នុងពិធីសម្ពោធអគារសិក្សាមួយខ្នង កម្ពស់ពីរជាន់ មាន១០បន្ទប់ នៅវិទ្យាល័យល្វា ក្នុងឃុំល្វា ស្រុកព្រៃឈរ ខេត្តកំពង់ចាម ដែលជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែតនាយករដ្ឋមន្ត្រីនៃព្រះរាជាណាចក្រកម្ពុជានិងលោក ជំទាវបណ្ឌិត ក្រោមអធិបតីភាពឯកឧត្តមឧត្តម សេនីយ៍ឯក ហ៊ុន ម៉ានិត តំណាងដ៏ខ្ពង់ខ្ពស់សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា។
ឯកឧត្ដម អ៊ុន ចាន់ដា បានបន្តថា ខេត្តកំពង់ចាម មានបុគ្គលិកសិក្សាចំនួន ៧.៦៣៥នាក់ ស្រី ៤.២១៧ នាក់ ។មានអគារសិក្សាចំនួន ១.២២៩ខ្នង ស្មើនឹង ៧.០៣៦បន្ទប់ ក្នុងនោះអគារសិក្សា ទីចាត់ការ និងអគារស្នាក់នៅដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន និង សម្តេចកិត្តិព្រឹទ្ធបណ្ឌិត មានចំនួន ៣៨៤ខ្នង ស្មើនឹង ២.៤៣១បន្ទប់ (អគារកម្ពស់ ៣ជាន់ មានចំនួន ១៦ អគារ) រួមនឹងទីចាត់ការ ២៣ខ្នង អគារកាត់ដេរចំនួន ១២ខ្នង។
ដោយឡែកនៅស្រុកព្រៃឈរ មានសាលារៀន ចំនួន ៧៨កន្លែង ក្នុងនោះបឋមសិក្សាចំនួន ៥៩កន្លែង អនុវិទ្យាល័យ មាន ១២កន្លែង វិទ្យាល័យមាន ៥កន្លែង និងមត្តេយ្យសិក្សាសាធារណៈ ចំនួន ២កន្លែង។ អគារសិក្សាមានចំនួន ២១៤ខ្នង ស្មើនឹងចំនួន ៩៧៩បន្ទប់ ។
ថ្លែងក្នុងឱកាសនោះដែរឯកឧត្តមឧត្តមសេនីយ៍ឯក ហ៊ុន ម៉ានិត បាននាំនូវប្រសាសន៍ផ្តាំផ្ញើសាកសួរសុខទុកពីសំណាក់សម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ក៏ដូចជាសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត ជូនចំពោះលោកយាយ លោកតា ក៏ដូចជាបងប្អូនប្រជាពលរដ្ឋ ដែលបានអញ្ជេីញមកចូលរួមសម្ពោធសមិទ្ធផលថ្មីនេះ ។
ឯកឧត្តមឧត្តមសេនីយ៍ឯក ក៏បានថ្លែងនូវការកោតសរសើរចំពោះអាជ្ញាធរខេត្តកំពង់ចាម ដែលបានរួមគ្នាធ្វើការអភិវឌ្ឍន៍គ្រប់វិស័យក្នុងខេត្ត ឱ្យមានការរីកចម្រើនយ៉ាងឆាប់រហ័ស ជាក់ស្ដែងការចូលរួមកសាងនូវអគារសិក្សានាពេលនេះជាដើម៕
ដោយ៖លី ពៅ
