(ភ្នំពេញ)៖ តាមរយៈបណ្ដាញតេលេក្រាម នៅរសៀលថ្ងៃទី២៧ សីហា ឆ្នាំ២០២៤ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានចេញសារលិខិតថ្លែងអំណរគុណ សប្បុរសជន ដែលបានបរិច្ចាគថវិកាចូលរួមក្នុង “មូលនិធិកសាង ហេដ្ឋារចនាសម្ព័ន្ធតាមព្រំដែន” ផ្តោតលើការកសាងផ្លូវ ក្រវ៉ាត់ព្រំដែន​ ក្នុងគោលបំណង ចូលរួមជាមួយរាជរដ្ឋាភិបាល នៅក្នុងបុព្វហេតុការពារ និង អភិវឌ្ឍជាតិ ក្នុងស្មារតីសាមគ្គី ថែរក្សា ការពារ សុខសន្តិភាព អធិបតេយ្យ និងបូរណភាពទឹកដី ដោយចូលរួមក្នុងការជំរុញ ការអភិវឌ្ឍនៅតាមតំបន់ព្រំដែនឱ្យ បានកាន់តែរឹងមាំ និងប្រកបដោយចីរភាព ។

សូមជម្រាបថា ភ្លាមៗក្រោយពីសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រ​កាស​កាលពីព្រឹកថ្ងៃទី២៦ ខែសីហា ឆ្នាំ២០២៤ ដាក់ចេញ នៅមូលនិធិកសាងហេដ្ឋា​រចនា​សម្ព័ន្ធ តាមព្រំដែនជាផ្លូវការ ដើម្បីឲ្យបងប្អូនបានចូលរួមបរិច្ចាគ គឺឃើញចរន្ត នៃ​ការ​ចូលរួមមានច្រើន ទាំងមន្ត្រីរាជការ ទាំង កងកម្លាំងប្រដាប់អាវុធ ទាំងប្រជាពលរដ្ឋ ទាំងអ្នកជំនួញ ពោល គឺប្រជាពលរដ្ឋខ្មែរទាំងក្នុង និងក្រៅប្រទេស បានចូលរួម​ចំណែ​កច្រើន។ ការណ៍នេះ សបញ្ជាក់ឱ្យឃើញថា ប្រជាពលរដ្ឋខ្មែរ គាំទ្រយ៉ាងពេញទំហឹង ចំពោះគោលនយោបាយ អភិវឌ្ឍន៍តំបន់ព្រំដែន ដែលរាជរដ្ឋាភិបាល បានធ្វើជា​យូរ​មកហើយ ហើយឥឡូវនេះ កំពុងតែបន្តធ្វើ ។

អ្នកនាំពាក្យរាជរដ្ឋាភិបាល ឯកឧត្តម ប៉ែន បូណា បានចាត់ទុក ការចូលរួមចំណែក​​របស់​ប្រជាពលរដ្ឋ មានអត្ថន័យធំធេងណាស់ ក្នុងការចូលរួម ជាមួយរាជរដ្ឋាភិបាល ដើម្បី​កសាង​ហេដ្ឋារចនាសម្ព័ន្ធនៅតាមព្រំដែន ឱ្យកាន់តែរីកចម្រើន ហើយកាលណា មាន​ហេដ្ឋារចនាសម្ព័ន្ធ រីកចម្រើន មានប្រជាពលរដ្ឋទៅរស់នៅទីនោះ កាន់តែច្រើនឡើងៗ។ នេះគឺជារបងការពារដ៏រឹងមាំបំផុត នូវបូរណភាពទឹកដីរបស់យើង ដូចដែលសម្តេចធិបតី ហ៊ុន ម៉ាណែត នាយករដ្ឋមន្ត្រី ក៏ដូចជា សម្តេចតេជោ ហ៊ុន សែន បានបញ្ជាក់រួចហើយ ។

គួររំលឹកដែរថា តាមរយៈសារពិសេសអំពីសមទ្ធិផល១ឆ្នាំ របស់រាជរដ្ឋាភិបាល អាណិត្តិទី​៧ នៃរដ្ឋសភា កាលពីថ្ងៃទី២២ ខែសីហា ឆ្នាំ២០២៤ សម្តេចធិបតី ហ៊ុន ម៉ាណែត បាន​មានប្រសាសន៍ថា សម្តេចបានសម្រេចផ្តួចផ្តើមបង្កើត មូលនិធិកសាងហេដ្ឋារចនា​សម្ព័ន្ធ​តាមបណ្តោយព្រំដែន ដែលមានគោលដៅពីរ ទី១. គឺកៀងគរថវិការបន្ថែម និងទី២. ផ្តល់ឱកាសឱ្យប្រជា ពលរដ្ឋទូទាំងប្រទេស បានចូលរួមដោយផ្ទាល់ ជាមួយរាជរដ្ឋា​ភិបាល នៅក្នុងការកសាងហេដ្ឋារចនាសម្ព័ន្ធរូបវន្ត នៅតាម បណ្តោយព្រំដែន ដោយ​ផ្តោត​ការយកចិត្តទុកដាក់ ទៅលើផ្លូវក្រវាត់ ព្រំដែន។ ជាមួយគ្នានេះ សម្តេចធិបតី ក៏បានអំពាវនាវទៅដល់បងប្អូនជនរួមទាំងអស់ ចូលរួមក្នុងបុព្វហេតុនេះ ដើម្បីរួមគ្នា​កសាងផ្លូវក្រវ៉ាត់ព្រំដែន ក្នុងការកសាង ការពារបូរណភាពទឹកដីរបស់យើង ៕

ដោយ ៖ វណ្ណលុក