ឯកឧត្តម ឃួង ស្រេង ៖ មន្ត្រីរដ្ឋបាលរាជធានីភ្នំពេញ ត្រូវបម្រើការងារជូនរាជរដ្ឋាភិបាល និងប្រជាពលរដ្ឋ ឱ្យបានល្អ
(ភ្នំពេញ)៖ មន្ត្រីរដ្ឋបាលរាជធានីភ្នំពេញ និងខណ្ឌទាំង ១៤ ត្រូវបំពេញការងារជូនរាជរដ្ឋាភិបាល និងប្រជាពលរដ្ឋ ឱ្យអស់កម្លាំងកាយចិត្ត ដោយត្រូវស្វែងយល់ពីការងារ ពង្រឹងសមត្ថភាព ហ៊ានលះបង់ពេលវេលា កម្លាំងកាយចិត្ត បញ្ញា ស្មារតី គឺធ្វើឱ្យបានល្អ ធ្វើឱ្យគេកោតសរសើរ ។
ឯកឧត្ដមឃួង ស្រេង អភិបាល នៃគណៈអភិបាលរាជធានីភ្នំពេញ បានធ្វើការណែនាំបែបនេះ នារសៀលថ្ងៃទី៣០ ខែសីហា ឆ្នាំ២០២៤ ក្នុងពិធីប្រកាសចូលកាន់មុខតំណែង លោក ហុក ហូរលីម នាយករងរដ្ឋបាលរាជធានីភ្នំពេញ ជានាយករដ្ឋបាលរាជធានីភ្នំពេញ ។
ក្នុងនាមជាមន្ត្រីបម្រើរាស្រ្ត ត្រូវរួមគ្នាបំពេញការងារបម្រើប្រជាពលរដ្ឋឱ្យបានក្តៅគគុក មានការងាររួមគ្នាធ្វើ មានទុក្ខក៏រួមគ្នា មានអីហូប ក៏ចែកគ្នាហូប។ ចំពោះការងារត្រូវថ្លឹងថ្លែងឱ្យបានច្បាស់លាស់ អ្វីគួរអប់រំ យើងអប់រំ អ្វីដែលមិនត្រូវអប់រំ គឺអនុវត្តតាមច្បាប់ ។
ឯកឧត្ដមឃួង ស្រេង បានបន្តថា៖ នាយករដ្ឋបាលរាជធានីភ្នំពេញ ត្រូវបានតែងតាំងដោយប្រកាស ដូច្នេះរាល់ការងារនៅថ្នាក់ខណ្ឌដាច់ខាតត្រូវរាយការណ៍មក នាយករដ្ឋបាលរាជធានីភ្នំពេញ ហើយការងារដែល នាយករដ្ឋបាលរាជធានីភ្នំពេញដាក់ឱ្យខណ្ឌអនុវត្ត ត្រូវអនុវត្ត ។ ខណ្ឌទាំង ១៤ ត្រូវដឹងពីសុខទុក្ខប្រជាពលរដ្ឋនៅក្នុងមូលដ្ឋានរបស់ខ្លួន មានអីខ្វះខាត ដោះស្រាយមិនចេញ ត្រូវរាយការណ៍មកក្រុង ដើម្បីយើងបន្តដោះស្រាយជូនប្រជាពលរដ្ឋ ។
ឯកឧត្ដម ឃួង ស្រេង ក៏បានបង្ហើបឱ្យដឹងដែរថា៖ ពេលនេះហើយនៅមានមន្ត្រី ប៉ូលីស យើងមួយចំនួនតូច ធ្វើអត្តសញ្ញាណប័ណ្ណប្រជាពលរដ្ឋបានហើយ ទុកចោល មិនយកឱ្យពលរដ្ឋទេ ចាំយកផលប្រយោជន៍ពីប្រជាពលរដ្ឋ ការងារនេះបើមន្ត្រីនៅតែមានបែបនេះ មិនអាចទុកឱ្យនៅទេ បើដឹងត្រូវកែខ្លួនជាបន្ទាន់ យើងត្រូវអនុវត្តការងារ កែទម្រង់ស៊ីជម្រៅហើយ ។
លោក ហុក ហួលីម បានប្តេជ្ញា ឆ្លើយតបទៅនឹងទំនុកចិត្តថ្នាក់ដឹកនាំគ្រប់លំដាប់ថ្នាក់ ដោយខិតខំបំពេញការងារ ដើម្បីបម្រើរាជរដ្ឋាភិបាលនិងប្រជាពលរដ្ឋ។ ប្តេជ្ញាធានា រក្សាសន្តិសុខ សុវត្ថិភាព និងរក្សាសន្តិភាពឱ្យបានទោះបីក្នុងតម្លៃណាក៏ដោយ ។ ប្តេជ្ញាចាត់ចែងការងាររដ្ឋបាលឱ្យបានល្អប្រសើរស្របតាមច្បាប់ ។ ចូលរួមសហ ការនិង លើកកម្ពស់សាមគ្គីភាពផ្ទៃក្នុងឱ្យបានល្អ ដោយអនុវត្តតាមគុណ សម្បត្តិ ៤យ៉ាង ឆន្ទៈម្ចាស់ការ ភក្តីភាព មនសិការវិជ្ជាជីវៈ និង វប្បធម៌សាធារណៈ ៕
ដោយ ៖ ហេង សម្បត្តិ+ថេត វិចិត្រ
