ខេត្តបន្ទាយមានជ័យ៖ ឯកឧត្តមរដ្ឋមន្ដ្រី ឌិត ទីណា ប្រធានក្រុមការងាររាជរដ្ឋាភិបាល ចុះជួយ មូលដ្ឋានខេត្តបន្ទាយមានជ័យ កាលពីថ្ងៃទី២៩ ដល់ថ្ងៃទី៣០ ខែសីហា ឆ្នាំ២០២៤ បានអញ្ជើញជួបសំណេះសំណាលជាមួយអាជ្ញាធរស្រុក ក្រុមការងារភូមិ ឃុំ ក្នុងស្រុកចំនួន៤ នៃខេត្តបន្ទាយមានជ័យ ។ ជំនួបនេះ រៀបចំធ្វើនៅស្រុកព្រះនេត្រព្រះ និងស្រុកភ្នំស្រុក នាថ្ងៃទី២៩ ខែសីហា ឆ្នាំ២០២៤ និងនៅស្រុកថ្មពួក និងស្រុកស្វាយចេក នៅថ្ងៃទី៣០ ខែសីហា ឆ្នាំ២០២៤។

ឯកឧត្តម ទីណា បានណែនាំដល់អង្គពិធីនៅស្រុកទាំង៤ ឱ្យយកចិត្តទុកដាក់ផ្ដល់ សេវាសាធារណៈជូនប្រជាជននៅក្នុងមូលដ្ឋានរបស់ខ្លួនឱ្យបានលឿនរហ័ស និងមានប្រសិទ្ធភាពខ្ពស់ ដើម្បីជួយសម្រួល និងសម្រេចការងារនេះ។ កន្លងមក ឯកឧត្តម ប្រធានក្រុមការងា បានរៀបចំដាក់បន្ថែមនូវមន្ដ្រីកិច្ចសន្យានៅគ្រប់ឃុំ និងគ្រប់ស្រុកទាំងអស់ទូទាំងខេត្តបន្ទាយមានជ័យ។

សម្រាប់ ឯកឧត្តម សេវាសាធារណៈដែលល្អប្រសើរ លឿនរហ័ស ប្រកបដោយភាពម៉ត់​ចត់ និងត្រឹមត្រូវគ្រប់ជ្រុងជ្រោយ នឹងជួយឱ្យប្រជាពលរដ្ឋចំណេញពេលវេលា កាត់បន្ថយ​ការចំណាយនិងសម្ពាធផ្សេងៗ។ មិនត្រឹមតែប៉ុណ្ណោះ វាក៏បង្ហាញពីការបំពេញ តួនាទី​ភារកិច្ច​ប្រកបដោយការទទួលខុសត្រូវខ្ពស់របស់អាជ្ញាធរមូលដ្ឋាន ក្នុងការបម្រើប្រជា​ជនផងដែរ។

ក្រៅពីផ្ដល់អនុសាសន៍ណែនាំនេះ ឯកឧត្តម ឌិត ទីណា ប្រធានក្រុមការងាររាជរដ្ឋា​ភិបាល​ចុះជួយមូលដ្ឋានខេត្តបន្ទាយមានជ័យ បានស្ដាប់យ៉ាងយកចិត្តទុកដាក់អំពីកង្វល់ និងសំណូមពរនានា របស់អាជ្ញាធរមូលដ្ឋាននៃស្រុកទាំង៤ មុននឹងផ្ដល់ដំណោះស្រាយ​មួយករណីម្ដងៗ ប្រកបដោយសមធម៌ និងច្បាស់លាស់ ដោយតម្កល់ផលប្រយោជន៍ប្រ​ជាជន និងប្រជាជាតិជាធំ ៕

ប្រភព ៖ ក្រសួងកសិម្ម