ស្រូវសែនក្រអូប ជាពូជស្រូវស្រាលដាំដុះបានចាប់ពី២ ទៅ ៣ដងក្នុងមួយឆ្នាំ បាយឆ្ងាញ់និងមានតម្រូវការខ្ពស់ទាំងប្រទេសអឺរ៉ុប ចិន
ភ្នំពេញ៖ ពូជសែនក្រអូប០១ ជាពូជស្រូវរបស់ខ្មែរយើង ពេលនេះក្រសួងកំពុងធ្វើការជំរុញ និងលើកទឹកចិត្តឱ្យប្រជាកសិករដាំដុះពូជស្រូវប្រភេទនេះ។ពូជសែនក្រអូប០១ជាពូជស្រូវស្រាល មិនប្រកាន់រដូវ អាចដាំដុះបានចាប់ពី២ទៅ៣ដងក្នុងមួយឆ្នាំ។
តាមរយៈឃ្លីបវីដេអូ មានរយៈពេលប្រមាណជាង៣នាទីដែលបញ្ចេញដោយក្រសួងកសិកម្ម រុក្ខាប្រមាញ់ និងនេសាទកាលពីយប់ថ្ងៃទី ០៥ ខែ កញ្ញា ឆ្នាំ ២០២៤បានឱ្យដឹងថាពូជសែនក្រអូប០១ ជាពូជស្រូវរបស់ខ្មែរយើងដែលបានបញ្ចេញដោយវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា ហើយត្រូវបានគណៈកម្មាធិការបញ្ចេញប្រភេទពូជដំណាំនាំចេញផ្សព្វផ្សាយកាលពីថ្ងៃទី១៥ ខែមករា ឆ្នាំ ២០២០។
ទាក់ទិនក្នុងរឿងនេះ លោក គង់គា ប្រធាននាយកដ្ឋានដំណាំស្រូវ នៃអគ្គនាយកដ្ឋានកសិកម្មនៃក្រសួងកសិកម្មរុក្ខាប្រមាញ់ និងនេសាទបានឱ្យដឹងថា៖កម្ពុជាបាននាំចេញក្រៅប្រទេសមានប្រភេទស្រូវ ផ្ការំដួល ជាប្រភេទអង្ករលេខ១ ប៉ុន្តែប្រភេទស្រូវផ្ការំដួលអាចដាំដុះបានតែមួយដង ហេតុនេះហើយទើបក្រសួងកសិកម្មឱ្យស្រាវជ្រាវរកពូជស្រូវណាដែលក្រអូបដែរ តែដាំដុះមានរយៈពេលខ្លី និងពិសេសអាចដាំដុះបានទាំងរដូវប្រាំង និងរដូវវស្សា។
ក្រៅពីនេះត្រូវតែជាអង្ករដែលមានរស់ជាតិឆ្ងាញ់ ដូច្នេះហើយទើបពូជសែនក្រអូប ត្រូវបានស្រាវជ្រាវនិងអភិវឌ្ឍន៍។ចុងក្រោយនេះយើងបានវាយតម្លៃទាំងនៅស្ថានីយ និងទីវាលដែលមានការចូលរួមពីកសិករឃើញថាពូជសែនក្រអូប០១ បានទទួលការគាំទ្រច្រើន ជាពិសេសខាងសហព័ន្ធស្រូវអង្ករ យល់ឃើញថាពូជសែនក្រអូប០១ ជាស្រូវដែលមានអង្ករលក្ខណៈល្អ ក្រអូប និងបាយឆ្ងាញ់។
លោកបានបញ្ជាក់ប្រាប់ដែរថា”តាមរយៈនេះហើយទើបក្រសួងកសិកម្មសម្រេចបញ្ចេញពូជនេះសម្រាប់កសិករដាំដុះ។ស្រូវពូជសែនក្រអូប០១ អង្ករស្រឡូន ថ្លាល្អ មានលក្ខណៈរលើប ហើយគ្រាប់ វែងៗជាពិសេសមានក្លិនប្រហើរ បើយើងដាំបាយគឺមានក្លិនប្រហើរតែម្តង។ជាអង្ករបាយមិនទន់ពេក មិនរឹងពេក ដែលជាលក្ខណៈមួយល្អសម្រាប់ទីផ្សារ”។
លោកថាប្រាប់បន្ថែមថា”ពូជសែនក្រអូប០១ នេះនៅពេលយើងប្រើពូជសុទ្ធគឺស្រូវដុះមកមានលក្ខណៈល្អទាំងព្រម ដោយក្នុងនេះបើទុំគឺទុំស្រុសគ្នាតែម្តង ឯទិន្នផលក៏មិនទាបដែរគឺ ៤តោនកន្លះទៅ៥តោន ក្នុងមួយហិកតាឬតំបន់ខ្លះលើសពីនេះថែមទៀត”។
មន្រ្តីក្រសួងកសិកម្មរូបនេះបានបញ្ជាក់ឱ្យដឹងដែរថាសម្រាប់ពូជសែនក្រអូប០១នេះមានទីផ្សារល្អទាំងនៅទីផ្សារអឺរ៉ុប ប្រទេសចិន ។ចុងឆ្នាំ២០២៣កន្លងមក ប្រទេសចិនបានប្រកួតអង្ករនោះគឺអង្ករ ពូជសែនក្រអូប០១ ជាពូជស្រូវរបស់ខ្មែរយើងបានជាប់លេខ១ ជាអង្ករដែលបាយឆ្ងាញ់។
លោកថា”អ្វីដែលចេញពីប្រទេសកម្ពុជារបស់យើងគឺជាមោឌនភាពមែនទែន។ ជាមួយគ្នានេះក្រសួងក៏បានអំពាវនាវដល់ប្រជាកសិករ ត្រូវតែដាំដុះពូជស្រូវខ្មែរយើងកុំពឹងទៅលើពូជគេ ដោយនៅពេលគេមិនទិញតម្លៃធ្លាក់ចុះ នេះហើយជាបញ្ហារបស់យើង”។
លោក គង់គា ប្រធាននាយកដ្ឋានដំណាំស្រូវ នៃអគ្គនាយកដ្ឋានកសិកម្មនៃក្រសួង កសិម្មរុក្ខាប្រមាញ់ និងនេសាទបានរំលឹកដោយបញ្ជាក់បន្ថែមថា”សម្រាប់សែនក្រអូប០១ ជាពូជស្រូវរបស់ខ្មែរ យើងមានទីផ្សារស្រាប់ទាំងនៅប្រទេសចិន និងទីផ្សារអឺរ៉ុប។យើងមានអង្ករល្អ ល្បីឈ្មោះ ហេតុនេះបើយើងមិនជួយគ្នាដាំដុះទេគេមិនស្គាល់អង្ករខ្មែរ យើងទូលំទូលាយទេ។ជាមួយគ្នាក្រសួងកសិកម្មបានអំពាវនាវដល់ភោជនីយដ្ឋានធំៗ អាហារដ្ឋានផ្សេងៗជួយប្រើប្រាស់អង្ករខ្មែររបស់យើង ហើយជួយផ្សព្វផ្សាយដែលនៅពេលនោះហើយអង្ករ យើងនឹងល្បីល្បាញមានទីផ្សារល្អ។យើងជួយប្រើប្រាស់អង្ករខ្មែរយើងក៏មានន័យថាយើងជួយដល់កសិករយើងដែរ”។
គួរបញ្ជាក់ថា លោក ជំទាវ អ៊ឹម រចនាមន្រ្តីនាំពាក្យក្រសួងកសិកម្ម កាលពីរសៀលថ្ងៃទី ០៥ ខែ កញ្ញា ឆ្នាំ ២០២៤បានថ្លែងប្រាប់បណ្តាញសារព័ត៌មានឱ្យដឹងថា៖ពេលនេះក្រសួងបានជំរុញដល់រោងម៉ាស៊ីកិនស្រូវ និងក្រុមហ៊ុននានា ឱ្យប្តេជ្ញាចិត្តរួមគ្នាមួយក្នុងការនាំអង្ករក្រអូបទៅកាន់ទីផ្សារទាំងក្នុងស្រុក និងអន្តរជាតិដោយឱ្យតម្លៃទិញពីកសិករក្នុងតម្លៃមួយខ្ពស់ជាងអង្ករដទៃទៀត ដែលប្រទេសជិតខាងទទួលទិញដូចជា អ៊ីអ៊ា និងអូអិមជាដើម៕
ដោយ ៖ ម៉ាដេប៉ូ