ឯកឧត្តម ឧបនាយករដ្ឋមន្ត្រី ហ៊ុន ម៉ានី អញ្ជើញប្រកាសលទ្ធផលជ្រើសរើសមន្ត្រីក្រសួងអភិវឌ្ឍន៍ជនបទ និងគ្រូបង្រៀននៅមតេ្តយ្យ ក្របខណ្ឌក្រសួងអប់រំ
ភ្នំពេញ៖ ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការប្រឡងប្រជែង កាលពីថ្ងៃទី៥ ខែកញ្ញា ឆ្នាំ២០២៤ អញ្ជើញជាអធិបតីក្នុងពិធីប្រកាសលទ្ធផលការប្រឡងប្រជែងជ្រើសរើសមន្ត្រីរាជ ការក្រសួងអភិវឌ្ឍន៍ជនបទ និងគ្រូបង្រៀននៅមតេ្តយ្យសិក្សា ក្របខណ្ឌក្រសួងអប់រំ យុវជននិងកីឡា ។
កាលពីថ្ងៃទី៣១ ខែសីហា ឆ្នាំ ២០២៤ គណៈកម្មការប្រឡងប្រជែងបានរៀបចំប្រឡងប្រជែងជ្រើសរើសមន្ត្រីរាជការ ឱ្យបម្រើការងារក្នុងក្របខណ្ឌក្រសួងអភិវឌ្ឍន៍ជនបទ ដែលមានបេក្ខជនចូលរួមចំនួន ៧២៩ អង្គ-នាក់ (ស្រី ១៨៨នាក់) ។
សម្រាប់លទ្ធផលនៅថ្ងៃទី៥ ខែកញ្ញា នេះ គណៈកម្មការប្រឡងបានជ្រើសរើសយកបេក្ខជនចំនួន ៦នាក់ ជាប់ជាស្ថាពរ ឲ្យធ្វើជាមន្ត្រីក្របខណ្ឌបម្រើការនៅក្រសួងអភិវឌ្ឍន៍ជនបទ ។ ដំណើរការកំណែស្រង់ពិន្ទុ និងរៀបចំបញ្ជីលទ្ធផលបានបញ្ចប់ជាស្ថាពរ ដោយក្នុងនោះជាលទ្ធផល ៖ ប្រឡងក្របខណ្ឌអភិវឌ្ឍន៍ជនបទ មានបេក្ខជនជ័យលាភីចំនួន ៦ រូបជាប់ជាស្ថាពរ ខណៈដែលមានបេក្ខជនបម្រុងសរុប ២៦នាក់ ។
ដោយឡែកកាលពីថ្ងៃទី១ ខែកញ្ញា ឆ្នាំ ២០២៤ មានដំណើរការប្រឡងប្រជែង ជ្រើសរើសគ្រូបឋមសិក្សា ក្នុងក្របខណ្ឌក្រសួងអប់រំ យុវជន និងកីឡា ដែលមាន បេក្ខជនប្រឡង ចំនួន១ម៉ឺន៥១១នាក់ បេក្ខជនពិការភាព៣៣នាក់ (ស្រី២៣ នាក់)។
គណៈកម្មការប្រឡងប្រជែងជ្រើសរើស សម្រាំងយកបេក្ខជន តែចំនួនជាង ៦០០ នាក់ សម្រាប់ចូលរួមដំណើរប្រឡងប្រជែងវិញ្ញាសាសរសេរលើកទី២ នឹងប្រព្រឹត្តទៅនៅពេលខាងមុខនេះ។
ការប្រឡងប្រជែងជ្រើសរើសគ្រូមត្តេយ្យលើកទី២ មានបេក្ខជ័យលាភីដែលមានសិទ្ធិប្រឡងវិញ្ញាសារសរសេរចំនួន ៦៣២ នាក់ (ស្រី៤៨៣នាក់)ស្ទួនពិន្ទុចំនួន ៣២ នាក់។ គណៈកម្មការប្រឡងប្រជែង នឹងសម្រាំងជ្រើសរើសយកបេក្ខជនតែចំនួន ២០០ នាក់ ឲ្យចូលបម្រើការងារជាមន្ត្រីក្របខណ្ឌ ក្រសួងអប់រំ យុវននិងកីឡា៕
ដោយ ៖ ង៉ាន់ ទិត្យ
រូបភាព ៖ ជឹម ភារ៉ា