ស្ទឹងត្រែង៖ រដ្ឋមន្ត្រីក្រសួងអភិវឌ្ឍន៍ជនបទឯកឧត្តម ឆាយ ឫទ្ធិសែន ដោយមានការចូលរួមពី លោក ប៉ែន លីណាត អភិបាលរង​ខេត្តស្ទឹង​ត្រែង គណៈប្រតិភូក្រសួង មន្ទីរ និងអង្គភាពពាក់ព័ន្ធ បានចុះទៅកាន់​ស្រុកចំនួន៤ របស់ខេត្តស្ទឹងត្រែង ក្នុងនោះ មាន ស្រុកបុរីអូរស្វាយ​សែនជ័យ ស្រុកសៀមប៉ាង និងស្រុកថាឡាបរិវ៉ាត់ ដែលជាស្រុកនៅ​ជាប់ព្រំដែនប្រទេសឡាវ និងស្រុកសៀមបូក ដើម្បីពិនិត្យពីស្ថានភាព​ផ្លូវដែលបានស្ថាបនារួចរាល់នាពេលកន្លងមក។

នៅក្នុងដំណើរឆ្ពោះទៅកាន់តំបន់ព្រំដែនកម្ពុជា-ឡាវ ដែលបានធ្វើឡើង​នៅថ្ងៃទី៨ ខែកញ្ញា ឆ្នាំ២០២៤ របស់រដ្ឋមន្ត្រីក្រសួង​អភិវឌ្ឍន៍ជនបទ ដើម្បីពិនិត្យពីស្ថានភាពផ្លូវនៅតាមខ្សែក្រវាត់ព្រំដែន ក្រាលល្បាយក្រួស មានប្រវែង ១៧៩,២គីឡូម៉ែត្រ តភ្ជាប់​ពីផ្លូវជាតិលេខ ៧ ត្រង់ចំណុច​ដុង​ក្រឡ ស្ថិតក្នុងឃុំអូរស្វាយ ស្រុកបុរីអូរស្វាយសែនជ័យ អូសបន្លាយ​ឆ្ពោះទៅបង្គោលព្រំដែនលេខ ០៧៨ ត្រង់ចំណុច ភូមិញាំងស៊ុម ឃុំថ្មកែវ ស្រុកសៀមប៉ាង។

ផ្លូវអភិវឌ្ឍន៍ជនបទដែលបានស្ថាបនារួចរាល់ ចំនួន២ខ្សែ គឺផ្លូវខ្សែទី១ ខាងលើ មានសំណង់សិល្បការ្យមួយចំនួន បន្ថែមទៀត ដូចជា លូ, ស្ពានបេតុង ១០កន្លែង និងទំនប់ស្ទាក់ទឹក ១០កន្លែង និងផ្លូវខ្សែទី២ ចាប់ពីចំនុចដុងក្រឡ ស្ថិតនៅក្នុង ស្រុកបុរីអូរស្វាយ​សែនជ័យ បន្តឆ្ពោះទៅកាន់ ស្រុកសៀមប៉ាង មានចំងាយ ៤៥គីឡូម៉ែត្រ ដែលជាផ្លូវក្រាលក្រួសក្រហម មានសំណង់សិល្បការ្យ​ជាច្រើនទៀត ផងដែរ។

ក្នុងឱកាសនោះ រដ្ឋមន្ត្រីក្រសួងអភិវឌ្ឍន៍ជនបទឯកឧត្តម ឆាយ ឫទ្ធិសែន រួមជាមួយ គណៈប្រតិភូថ្នាក់ជាតិ ថ្នាក់ខេត្ត បានចុះពិនិត្យ​បង្គោលព្រំដែនលេខ០៧៨ ,លេខ០៣៦ និងលេខ០៣៤ និងបានចុះសួរសុខទុក្ខកងទ័ព និងកងនគរបាលវរៈការពារព្រំដែន​លេខ៧០១ ចំណុះស្នងការដ្ឋាននគរបាលខេត្តស្ទឹងត្រែង ថែមទៀត។ឯកឧត្តមរដ្ឋមន្ត្រី បានណែនាំដល់មន្ទីរអភិវឌ្ឍន៍ជនបទ ត្រូវស្រង់​ទិន្នន័យខ្នងផ្ទះ ឱ្យបានច្បាស់លាស់ ដើម្បីងាយស្រួលក្នុងការជួយ​ផ្តល់សម្ភារៈ សម្រាប់សាងសង់បង្គន់អនាម័យ ជូនកម្លាំងប្រដាប់អាវុធ​ព្រំដែន។

ក្រោយពីពិនិត្យស្ថានភាពផ្លូវ នៅតាមបណ្តោយព្រំដែន ពិនិត្យ​បង្គោលព្រំដែន និងជួបសួសុខទុក្ខកងកម្លាំងប្រដាប់អាវុធ ដែល​កំពុងឈរជើងការពារបូរណភាពទឹកដី នោះមកឯកឧត្តមរដ្ឋមន្ត្រី បានដឹកនាំគណៈប្រតិភូ ចុះពិនិត្យផ្លូវជនបទ ៥ខ្សែទៀត នៅក្នុង​ស្រុកថាឡាបរិវ៉ាត់ និងស្រុកសៀមបូក ៕
ដោយ៖ឡុង សំបូរ