បរទេស៖ ជាលើកដំបូងពុំធ្លាប់មាន ក្រុមហ៊ុនផ្លូវដែកជប៉ុន JR East គ្រោងនឹងដាក់ឲ្យដំណើរការ រថភ្លើងល្បឿនលឿនស្វ័យបើកបរ ឬ គ្មានមនុស្សបើក រត់នៅលើខ្សែផ្លូវ Joetsu Shinkansen ជាផ្នែកមួយ ដើម្បីដោះស្រាយវិបត្តិប្រជាសាស្រ្តជប៉ុន ឬ កំណើនប្រជាជនវ័យចំណាស់។

ប្រធានក្រុមហ៊ុន JR East លោក Kise Yoichi បានអះអាង កាលពីថ្ងៃអង្គារថា នឹងចាប់ផ្តើមប្រើប្រាស់ក្នុងឆ្នាំសារពើពន្ធ២០២៨ ហើយដំណើរការពេញលេញ នៅក្នុងឆ្នាំ២០២៩។ ប៉ុន្តែ ក្រុមហ៊ុនបានបន្ថែមថា នៅតែមានអ្នកបើកបរលើរថភ្លើងត្រួតពិនិត្យប្រតិបត្តិការសម្រាប់ករណីបន្ទាន់។ រថភ្លើងគ្រោងនឹងដំណើរការ រវាងស្ថានីយ៍ Niigata និង Nagaoka ចម្ងាយជាង៥៥គីឡូម៉ែត្រ ហើយនឹងបន្ថែមទៀត រវាងស្ថានីយ Tokyo និង Niigata។

គួរបញ្ជាក់ថា ល្បឿនអតិបរមា របស់ផ្លូវរថភ្លើង Joetsu Shinkansen គឺអាចមានចន្លោះពី ២៧៥, ៣០០គីឡូម៉ែត្រ ឬ លឿនជាងនេះ ក្នុងមួយម៉ោង។

ក្រុមហ៊ុនបាននិយាយថា ខ្លួនកំពុងជំរុញផែនការនេះ ដោយសារការព្រួយបារម្ភអំពីកង្វះអ្នកបើកបរនាពេលអនាគត ខណៈដែលជប៉ុនបញ្ហាអត្រាកំណើតថ្មីធ្លាក់ចុះ ហើយចំនួនប្រជាជនវ័យចំណាស់ ក៏កាន់តែកើនឡើង នៅក្នុងប្រទេសជប៉ុន។

JR East បានបន្ថែមទៀតថា ខ្លួនកំពុងពិចារណាពង្រីកប្រតិបត្តិការបើកបរដោយខ្លួនឯង ឬ Driverless Bullet Trains បែបនេះ តភ្ជាប់រវាងទីក្រុងតូក្យូ និងតំបន់ឆ្នេរសមុទ្រជប៉ុន ព្រមទាំង រវាងតូក្យូ និងខេត្តភាគឦសាន របស់ប្រទេស ទៀតផង៕

ប្រភពពី The Mainichi ប្រែសម្រួល៖ សារ៉ាត