បាត់ដំបង៖ដោយសារតែគ្រោះថ្នាក់ចរាចរណ៍ដែលតែងកើតឡើង ជាញឹកញាប់​នៅចំណុចផ្លូវបំបែកជា៤ នៃ ផ្លូវវាងក្រុងបាត់ដំបង។មន្ទីរសាធារណការខេត្តបានធ្វើការអ៊ុតគំនូសក្រហម ខៀវ ដើម្បី សុវត្ថិភាពចរាចរណ៍និងជាការពញ្ញាក់ស្មារតីដល់អ្នកបើកបរ​យាន​យន្តគ្រប់ប្រភេទដែលធ្វើដំណើរឆ្លងកាត់ទីនោះ ត្រូវតែបង្កើនការ ប្រុងប្រយ័ត្នខ្ពស់នៅពេលមកដល់ចំណុចនេះ។

ប្រាប់ទូរទស្សន៍អប្សរានៅក្នុងសប្ដាហ៍នេះក្នុងពេលកំពុងពិនិត្យការអ៊ុតគំនូសចរាចរណ៍បន្ថែម លោក ព្រួញ រិទ្ធិថា ប្រធានមន្ទីរ​សាធារណការ និង ដឹកជញ្ជូនខេត្តបាត់ដំបង បានបញ្ជាក់ថា ការអ៊ុតគំនូសចរាចរណ៍នៅ ចំណុចផ្លូវបំបែក​ជា៤នៃផ្លូវវាងក្រុងបាត់ដំបង នូវពណ៌ក្រហម ខៀវ ជាសញ្ញាបញ្ជាក់និងដើម្បីពញ្ញាក់ស្មារតីឱ្យអ្នកបើកបរត្រូវតែបង្កើននូវការប្រុងប្រយ័ត្នពេលមក​ដល់ទីនេះ​សំដៅ​កាត់បន្ថយគ្រោះថ្នាក់ចរាចរណ៍ ។លោកបន្តថា នៅចំណុចផ្លូវបំបែកជា៤នេះ តែងកើតមានគ្រោះថ្នាក់ ចរាចរណ៍ជា​ញឹកញាប់​។

លោក ព្រួញ រិទ្ធថា បានពន្យល់បន្ថែមថា អ្នកបើកបរនឹងមានការ ងឿងឆ្ងល់ពីគំនូសក្រហម ,​ខៀវនៅលើចំណុចទីតាំងដងផ្លូវ​ទាំង​នេះ។ប៉ុន្តែការអ៊ុតគំនូសក្រហមនេះគឺចង់បញ្ជាក់ឱ្យអ្នកបើកបរទាំងអស់ បានដឹងនិងកាន់តែ​មានស្មារតីប្រុងប្រយ័ត្នខ្ពស់ថានៅខាងមុខ គឺមាន ផ្លូវបំបែកជា៤ និងជាតំបន់គ្រោះថ្នាក់ ត្រូវតែមានការប្រុងប្រយ័ត្ន មុនមកដល់ទីតាំងនេះ ។

លោកបន្ថែមថា ក្រៅពីអ៊ុតគំនូសក្រហម ខៀវ មន្ទីរនឹងបំពាក់ភ្លើងសញ្ញា ចរាចរណ៍ជាច្រើនកន្លែងបន្ថែមទៀតដើម្បីជាការពញ្ញាក់​​ស្មារតីដល់ អ្នកបើកបរទាំងអស់ត្រូវតែបង្កើននូវការប្រុងប្រយ័ត្នខ្ពស់បំផុត។បន្ទាប់ពីក្រុមការងារអ៊ុតគំនូស និងបំពាក់ភ្លើង​សញ្ញា​ចរាចរណ៍បាន រួចរាល់ហើយនោះមន្ទីរនឹងបន្តផ្សព្វផ្សាយបញ្ជ្រាបដល់អ្នកបញ្ជាយានយន្តនៅលើដងផ្លូវនិងប្រជាពលលរដ្ឋប្រើប្រាស់ផ្លូវឱ្យកាន់តែបានយល់ដឹងបន្ថែមពីគំនូសសញ្ញាលើដងផ្លូវដើម្បីឈានទៅកាត់បន្ថយអត្រានៃគ្រោះថ្នាក់ចរាចរណ៍។

លោក ព្រួញ រិទ្ធថា បន្តថា កន្លងរដ្ឋបាលខេត្តបាត់ដំបង ក៏ដូចជាមន្ទីរ សាធារណការខេត្ត បានយកចិត្តទុកដាក់ និង បានស្នើសុំ​ទៅកាន់ ភ្នាក់ងាចៃកាជប៉ុន ដើម្បីបំពាក់ភ្លើងស្ដុបនៅលើចំណុចផ្លូវបំបែក សំខាន់ៗចំនួន៧កន្លែង។អ្នកជំនាញចៃការក៏បានចុះពិនិ
ត្យ និងធ្វើការសិក្សារួចរាល់ហើយដែរ ដែលគ្រោងនឹងអនុវត្តធ្វើការ សាងសង់ក្នុងពេលឆាប់ៗខាងមុខ។

សូមជម្រាបថា ផ្លូវវាងក្រុងបាត់ដំបងមាន៤គន្លង ពុះទ្រូងផ្លូវចំកណ្តាល ចែកជាផ្លូវរត់ពីរគន្លង(ទៅ-មក)និងមាន​ប្រវែងជាង២០គីឡូម៉ែត្រ ហើយត្រូវបានដាក់ឱ្យដំណើរការកាលពីចុងឆ្នាំ២០២១ ដើម្បីបញ្ចៀស ពីការកកស្ទះចរាចរណ៍នៅ​ក្នុង​ក្រុងបាត់ដំបង។ផ្លូវនេះក៏មានដាំ ដើមឈើផ្កាលម្អលើចំណុចសួនពុះទ្រូងផ្លូវ និងដាំដើមក្ងោក នៅអម សងខាងផ្លូវរាប់ពាន់ដើមដើម្បីការពារពីការ ទន្ទ្រានរំលោភលើដីចំណីផ្លូវ និងជួយបង្កើនសោភណភាពតាមដងផ្លូវទៀតផង៕

អត្ថបទ-រូបភាព៖ អ៊ុក សំអាន បប.