បាត់ដំបង៖តំណាងស្ថានទូតជប៉ុនប្រចាំកម្ពុជា និងក្រុមហ៊ុនជប៉ុន​បានធ្វើបទបង្ហាញពីម៉ាស៊ីនកម្ទេចសំរាមដ៏ទំនើបដែលជប៉ុន គ្រោងនឹងនាំយកមកវិនិយោគដើម្បីធ្វើការកែច្នៃសំណល់សំរាមប្លាស្ទិកឱ្យទៅជាប្រេងឥន្ធនៈ។បទបង្ហាញបានធ្វើឡើងក្នុង​ពិភាក្សា​ការងារជាមួយឯកឧត្តម សុខ លូ អភិបាលខេត្តបាត់ដំបង និងមន្រ្តីមន្ទីរជំនាញពាក់ព័ន្ធកាលពីព្រឹកថ្ងៃទី១៣ ខែកញ្ញា ឆ្នាំ២០២៤ នៅសាលាខេត្តបាត់ដំបង។

ក្នុងបទបង្ហាញ តំណាងក្រុមហ៊ុន ស៊ូហ្គោ តាតេម៉ូណូ សឺវីស អ៊ីង (Sougo Tatemono Service Inc.)បង្ហាញពីឧបករណ៍​កម្ទេចកាកសំណល់ប្លាស្ទិកឱ្យទៅជាប្រេង។តាមអ្នកជំនាញ​ជប៉ុន បានបញ្ជាក់ថា ម៉ាស៊ីនដ៏ទំនើបនេះមាន សមត្ថភាពកែច្នៃ​និងធ្វើការ​កម្ទេចសំរាមប្លាស្ទិកសុទ្ធក្នុង១តោន អាចបម្លែងទៅ​ជាប្រេងបានពី ៦០០លីត្រ ទៅ៧០០លីត្រ។ដោយឡែក​សំរាមចម្រុះវិញក្នុង១តោនអាចបម្លែងចេញជាប្រេងបាន២០០លីត្រទៅ៣០០លីត្រ។ចំពោះប្រេងដែលបម្លែងចេញ ពីសំណល់​ប្លាស្ទិក​អាចយកទៅប្រើប្រាស់ជាប្រេងឥន្ធនៈ ក្នុងការបញ្ឆេះ​ដំណើរ​ការម៉ាស៊ីនកម្ទេចសំរាមនោះវិញ។មិនតែប៉ុណ្ណោះ វាអាចបម្លែងទៅជា ប្រេងម៉ាស៊ូត ប្រេងសាំង ឬក៏ប្រេងផ្សេងៗ​បន្ថែមទៀតបាន។

ក្រុមអ្នកជំនាញក្រុមហ៊ុនជប៉ុនបានជម្រាបឯកឧត្តមអភិបាលខេត្តថាម៉ាស៊ីនបម្លែងសំរាមនេះអាចដុតសំរាមបាន៣០តោនក្នុង១ថ្ងៃ។គុណភាពនៃម៉ាស៊ីនវិញអាចប្រើប្រាស់បានពី២០ ទៅ៣០ឆ្នាំ ។

ឯកឧត្តម សុខ លូ បានសម្តែងនូវការពេញចិត្តជាខ្លាំងចំពោះ​ម៉ាស៊ីនកែច្នៃ បម្លែងកាកសំណល់សំរាមប្លាស្ទិកនេះ។ឯកឧត្តម
អភិបាលខេត្តរំពឹងនិងសង្ឃឹមថាម៉ាស៊ីនដ៏ទំនើបនេះនឹងមានដំណើរការនៅទីលានចាក់សំរាមក្នុងខេត្តបាត់ដំបងនាពេលឆាប់ៗខាងមុខនេះ ។
ឯកឧត្តម សុខ លូ ក៏បានបង្ហាញពីការគាំទ្រ និងបានថ្លែង​អំណរគុណចំពោះតំណាងទូតជប៉ុនយ៉ាងពេញទំហឹងនិងរង់ចាំជានិច្ច សហការបង្កលក្ខណៈងាយស្រួលគ្រប់បែបយ៉ាងនៅ​ពេលក្រុមហ៊ុនចាប់ផ្ដើមវិនិយោគលើការកែច្នៃសំរាមប្លាស្ទិកបម្លែងទៅជាវត្ថុរាវ(ប្រេងឥន្ធនៈ) ខណៈនៃការរៀបចំទុកដាក់​និងគ្រប់​គ្រង​សំរាម ក៏ជាផ្នែកមួយ ដែលអាចជួយដល់​ក្រុងបាត់ដំបង ឱ្យក្លាយទៅជាទីក្រុងវៃឆ្លាត (SmartCity) នៅពេល​​អនាគត។

សូមបញ្ជាក់ថា ក្នុងខេត្តបាត់ដំបងមានទីលានទុកដាក់សំរាម​ខ្នាតធំកម្រិតស្ដង់ដារមួយ ស្ថិតនៅភូមិប៉ោយស្វាយឃុំតាគ្រាម ស្រុកបាណន់ ដែលបានសម្ពោធដាក់ឱ្យប្រើប្រាស់កាលពីអំឡុង​ខែមីនាឆ្នាំ២០២៣។ទីលានទុកដាក់សំរាមក្រុងបាត់ដំបងនេះ សាងសង់ឡើងនៅលើផ្ទៃដីជាង២០ហិកតាដោយបានដាក់ឱ្យប្រើប្រាស់ក្នុងដំណាក់កាលដំបូងនូវរណ្ដៅទី១ដែលមានទំហំដីជិត
៣ហិកតា។ទីលាននេះមានសមត្ថភាពអាចផ្ទុកសំរាមបាន​ជាង៣០ម៉ឺនម៉ែត្រគូប សម្រាប់រយៈពេល១០ឆ្នាំ (២០២២ រហូត
ដល់ ២០៣២) សម្រាប់ប្រជាជនក្នុងក្រុងបាត់ដំបង និងស្រុកដែលនៅក្បែរទីលានទុកដាក់សំរាម។

តាមការរំពឹងទុកប្រជាជនប្រមាណ ៦០% ដែលត្រូវជា ១២៦ ០០០នាក់នឹងទទួលបានសេវាកម្មផ្នែកអនាម័យបរិស្ថានពី
ទីលានចាក់សំរាមខាងលើនេះ។ទីលានទុកដាក់សំរាមដ៏ធំមួយនេះ ចំណាយលើសាងសង់ជាង​៦លានដុល្លារអាម៉េរិកក្រោម គម្រោងកែលម្អគ្រប់គ្រងបរិស្ថាន​ក្រុងជុំវិញបឹងទន្លេសាបជំហាន២ក្រោមកម្ចីឥណទានសម្បទានរបស់ធនាគារអភិវឌ្ឍន៍អាស៊ី៕ អត្ថបទ-រូបភាព៖ អ៊ុក សំអាន បប.