សៀមរាប៖សន្និសីទមេបញ្ជាការកងទ័ពអាកាសអាស៊ានលើកទី២១ បាន​ប្រារព្ធនៅសណ្ឋាគារសុខាអូតែល ខេត្តសៀមរាប កាលពី​ព្រឹក​ថ្ងៃទី១៦ ខែកញ្ញា ឆ្នាំ២០២៤​ ខណៈកម្ពុជាធ្វើជាម្ចាស់ផ្ទះជាលើកទី២ បន្ទាប់​ពី​លើកទី១នាឆ្នាំ២០១៥។សន្និសីទនេះមាន​ការចូលរួមពីមេបញ្ជា​ការ​កងទ័ពជើងអាកាសទាំង១០ ប្រទេសជាសមាជិកអាស៊ាន។

ថ្លែងក្នុងពិធីបើកសន្និសីទមេបញ្ជាការកងទ័ពអាកាសអាស៊ាន នាយ​ឧត្តមសេនីយ៍ សឹង សំណាង អគ្គមេបញ្ជាការ​រងកងយោធពល​ខេមរ​ភូមិន្ទមេបញ្ជាការកងទ័ពអាកាស ក្រសួងការពារជាតិ បានបញ្ជាក់ថា សន្និសីទមានគោលបំណង ពង្រឹងកិច្ច​សហប្រតិបត្តិការ​សាមគ្គីរួមគ្នា ដើម្បីចែក​រំលែកគ្នា​ទៅវិញទៅមក នូវព័ត៌មានសន្តិសុខយោធាក្នុងកម្រិត​ព្រំដែនមួយដែល​អាចចែក​រំលែកបាន ដើម្បីរក្សា​សន្តិសុខរួមក្នុងតំបន់ ដើម្បី​បង្កើន​ភាពជិតស្និទ្ធក្នុងតំបន់អាស៊ាន ។

សន្និសីទលើកនេះបានផ្តោតលើការបណ្តុះបណ្តាលកងទ័ពអាកាសជំនាន់ក្រោយ។ទន្ទឹមនេះប្រទេសទាំង១០បញ្ជាក់ពីរួមគ្នាការពារ ទប់ស្កាត់​ចរាចរណ៍ ដឹក​ជញ្ជូនគ្រឿងញៀនតាមអាកាស ទប់ស្កាត់ការជួញ​ដូរមនុស្សតាមអាកាស ទប់ស្កាត់អំពើភេវកម្មតាមអាកាស។ប្តេជ្ញារួមគ្នាក្នុងការជួយគ្នាទៅវិញទៅមកក្នុងកិច្ចសហការប្រតិបត្តិការ ដឹកជញ្ជូនជនរងគ្រោះ តាមផ្លូវអាកាសដែលជួបនូវ​ហានិភ័យ​ផ្សេងៗ រួមទាំងគ្រោះមហន្តរាយ ដើម្បីរក្សាបាននូវស្ថិរភាពក្នុងតំបន់បណ្ដា​ប្រទេសនៃអាស៊ាន។

សន្និសីទមេបញ្ជាការកងទ័ពអាកាសអាស៊ានលើកទី២១ ពេញមួយ​ព្រឹកបាន​បញ្ចប់ដោយ​ការចុះ​អនុស្សរណៈយោគយល់គ្នា​កលើ​កិច្ចសហ​ប្រតិបត្តិការចែករំលែកព័ត៌មាន បណ្តុះបណ្តាលនូវចំណេះដឹងដល់​នាយ​ទាហានបន្តវេន ជួយគ្នាទប់ស្កាត់បញ្ហា​ផ្សេងតាមផ្លូវអាកាស ៕
អត្ថបទនិងរូបភាព៖ប៊ុន រដ្ឋា