(ភ្នំពេញ)៖ អ្នកឧកញ៉ា គួច ម៉េងលី បានគូសបញ្ជាក់ក្នុងឱកាសបើកសម្ពោធសាខាថ្មី មជ្ឈមណ្ឌលភាសា អេ អាយ អាយ (Aii) និងសាលារៀនអន្ដរទ្វីប អាមេរិកាំង (AIS) នាព្រឹកថ្ងៃទី១៦ ខែកញ្ញា ឆ្នាំ២០២៤ ថា ការសម្ពោធសាខាចំការដូងនេះ គឺជាការ​បោះជំហានឆ្ពោះទៅមុខយ៉ាងសំខាន់មួយទៀត ក្នុងបេសកកម្មផ្តល់ការអប់រំដែល​មានគុណភាព ដើម្បីអប់រំសិស្សានុសិស្សនៅទូទាំងប្រទេសកម្ពុជា ឱ្យពួកគាត់​អាច​មានសមត្ថភាពក្នុងការចាប់យកឱកាសនានានៅទូទាំងពិភពលោក ។ អ្នកឧកញ៉ា បានបន្តថា វិស័យអប់រំឯកជន គឺជាដៃគូរបស់រាជរដ្ឋាភិបាល និងបានដើរតួនាទីសំខាន់ ក្នុងការបណ្ដុះបណ្ដាលធនធានមនុស្ស ។

អ្នកឧកញ៉ា គួច ម៉េងលី ជាស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ ក្រុមហ៊ុន ម៉េងលី ជេ. អេឌ្យូខេសិន (MJQE) បានមានប្រសាសន៍ទៀតថា ការបើក​សម្ពោធ​​សាខាទី២១ និង ២២នេះ គឺដើម្បីឆ្លើយតបនឹងតម្រូវការអប់រំដែលកំពុង​កើន​ឡើង និងមានសំណូមពរពីអាណាព្យាបាលសិស្ស ដែលជឿទុកចិត្តក្នុងការផ្តល់​គុណ​ភាព​អប់រំរបស់មជ្ឈមណ្ឌលភាសា អេ អាយ អាយ (Aii) និងសាលារៀន អន្ដរទ្វីប អាមេរិកាំង (AIS) ។

អ្នកឧកញ៉ា បានលើកឡើងថា វិស័យអប់រំ មានការរីកចម្រើនពីមួយឆ្នាំទៅមួយឆ្នាំ ខណៈរដ្ឋ មានសាលារៀនច្រើន ប៉ុន្តែប្រទេសយើង ក៏មានប្រជាពលរដ្ឋច្រើន ដែលកំពុងតែមានតម្រូវការ និងស្វែងរកគុណភាពនៃសិក្សា។ ដូច្នេះហើយរាជរដ្ឋាភិបាល បានគាំទ្រឱ្យវិស័យឯកជន ចូលរួមជាដៃគូ ដើម្បីធ្វើយ៉ាងណា ឱ្យមានសាលាគ្រប់គ្រាន់ ផ្ដល់ឱ្យពលរដ្ឋយើងសិក្សា ជាពិសេស ផ្ដោតលើគុណភាពនៃការអប់រំ ។

នៅក្នុងអាណត្តិនេះ អ្នកឧកញ៉ា មើលឃើញថា វិស័យអប់រំ មានការកែប្រែច្រើន ដោយ​រដ្ឋបាន​បង្កើនទាំងថវិកាប្រចាំឆ្នាំ មានការរឹតបន្តឹងគុណភាព មានចងច្បាប់តឹងតែងដើម្បី​ឱ្យ​គ្រូធ្វើយ៉ាងម៉េច បង្រៀនសិស្សឱ្យមានគុណភាព ពង្រឹង Stem ឱ្យបានច្រើន ហើយ​បញ្ចូល​នូវបច្ចេកវិទ្យា ដែលទាំងនេះហើយ ជាការជ្រោមជ្រែងលើវិស័យអប់រំរបស់រាជ​រដ្ឋាភិបាល ។ ដូច្នេះសក្ដានុពលនៅក្នុង​វិស័យអប់រំនេះ គឺមានការរីកចម្រើនខ្លាំង ហើយនៅថ្ងៃអនាគត នឹងមានគុណភាពកាន់តែល្អ ឈានដល់ការប្រកួត​ប្រជែងនៅក្នុងតំបន់ ។

អ្នកឧកញ៉ា បន្តថា មជ្ឈមណ្ឌលភាសា អេ អាយ អាយ (Aii) និងសាលារៀន អន្ដរទ្វីប អាមេរិកាំង (AIS) សាខាចំការដូង មានការរចនាស្ថាបត្យកម្មអគារសិក្សា មានរាងជាអក្សរ U ដែលតំណាងលើការប្តេជ្ញាចិត្តរបស់ Aii និង AIS ក្នុងការផ្តល់ការអប់រំប្រកប​ដោយ​គុណភាពដល់សិស្សានុសិស្សនៅក្នុងសហគមន៍អ្នកសិក្សានៅសតវត្សរ៍ទី២១ ដោយ Aii អាចដាក់សិស្សានុសិស្សបានចំនួន ១២៥០នាក់ និងចាប់ទទួលសិស្សសម្រាប់វគ្គសិក្សា​ថ្មី​ទី៨៥ នៅថ្ងៃទី២៥ ខែកញ្ញា ឆ្នាំ២០២៤ ហើយ AIS ដាក់សិស្សានុសិស្សបានចំនួន ១២៥០នាក់ នឹងទទួលសិស្សសម្រាប់បវេសនកាលឆ្នាំសិក្សាថ្មី២០២៤-២០២៥ នៅថ្ងៃទី០៧ ខែតុលា ឆ្នាំ២០២៤។ សិស្សថ្មីទាំងអស់ដែលចុះឈ្មោះចូលរៀននៅ Aii នឹងទទួលបានអាហារូបករណ៍រហូតដល់៤០ភាគរយ សម្រាប់ការចុះឈ្មោះឆ្លងកម្មវិធី និងការចុះឈ្មោះជាក្រុម ។

Aii សាខាចំការដូង ផ្តល់ជូននូវកម្មវិធីភាសាដ៏ទូលំទូលាយ រួមទាំងភាសាអង់គ្លេស និង​ភា​សា​ចិន ចាប់ពីកម្រិតមត្តេយ្យសិក្សា រហូតដល់កម្រិតឌីប្លូម ដើម្បីធានាបានថា សិស្សា​នុសិស្សនៅគ្រប់ដំណាក់កាលនៃដំណើរសិក្សារបស់ពួកគេ ទទួលបាន​ការណែនាំ​ប្រកប​ដោយគុណភាពខ្ពស់បំផុត និងត្រួសត្រាយពួកគេសម្រាប់ភាពជោគជ័យ​នៅក្នុងសកល​ភាវូបនីយកម្ម ៕

អត្ថបទ៖ វណ្ណលុក
រូបភាព៖ សួង ពិសិដ្ឋ