ភ្នំពេញ៖ក្លិបអ្នកកាសែតកម្ពុជា រួមជាមួយអង្គការខាណា បានរៀប​ចំ​វេទិកាមតុមូលមួយដើម្បីបញ្ជ្រាបការយល់ដឹងអំពីជំងឺរបេង​ដល់​អ្នកសារព័ត៌មានសម្រាប់ការផ្សព្វផ្សាយបន្តឱ្យមានភាពត្រឹមត្រូវ និងបាន​ទូលំទូលាយ។ព្រឹត្តិការណ៍នេះក៏ដើម្បី​ចូលរួម​ក្នុងយុទ្ធការជាតិ​បញ្ចប់ជំងឺ​របេងនៅកម្ពុជានាឆ្នាំ២០៣០ផងដែរ។

ក្នុងកម្មវិធីដែលបានរៀបចំឡើងកាលពីថ្ងៃទី១៦ ខែកញ្ញា ឆ្នាំ២០២៤ នៅសណ្ឋាគារពូលូវ៉ៃ រាជធានីភ្នំពេញ មានការចូលពីលោក ពុយ គា ប្រធានក្លិបអ្នកកាសែតកម្ពុជា, លោក ឈុន ណា តំណាងនាយក​ប្រតិបត្តិបតិ្តអង្គការខាណា ,លោក ជួប សុខចំរើន និង​លោកវេជ្ជបណ្ឌិត ហួត ចាន់យុដា ប្រធានមជ្ឈមណ្ឌលជាតិកំចាត់រោគរបេង និងហង់សិន រួមជាមួយអ្នកសារព័ត៌មាន​ជាតិជិត​៧០នាក់មកពី៥៣ស្ថាប័ន។

អ្នករៀបចំកម្មវិធីបានបញ្ជាក់ថា គោលបំណងសំខាន់នៃការរៀប​ចំវេទិកាតុមូលនេះឡើង គឺដើម្បីបង្កើនការយល់ដឹងដល់អ្នក​សារព័ត៌មាន​អំពីជំងឺរបេងយល់ដឹងពីបច្ចុប្បន្នភាពការឆ្លើយតប​ជំងឺរបេងនៅកម្ពុជា ។ជំរុញការផ្សព្វផ្សាយឱ្យបានទូលំទូលាយ និង​ពន្លឿនការចូលរួមផ្សព្វផ្សាយបន្ត, ស្វែងរកការគាំទ្រ និងចែករំលែក​នូវអត្ថបទព័ត៌មានអំពីជំងឺរបេង និងការលុបបំបាត់ការរើស​អើងអ្នក​ជំងឺរបេងងផងដែរ ។

វេទិកាតុមូលនោះបានស្តាប់បទបង្ហាញរបស់លោកវេជ្ជបណ្ឌិត នូ ចាន់លី ជាអ្នកជំនាញផ្នែកជំងឺរបេង នៅមជ្ឈមណ្ឌលជាតិកំចាត់​រោគរបេង និងហង់សិន (CENAT)។ លោកវេជ្ជបណ្ឌិតមាន​ប្រសាសន៍ថា កម្ពុជា​មាន​អត្រាព្យាបាលជោគជ័យនៃ​ជំងឺរបេង​រក្សា​បានខ្ពស់ជាង៩០% ក្នុងរយៈ​ពេល២៤ ឆ្នាំជាប់ៗគ្នា។ ពោល​ក្នុងឆ្នាំ​២០២៣ កម្មវីធីជាតិកំចាត់រោគ​របេងសម្រេចបាន​អត្រាព្យាបាល​ជោគជ័យ៩៦% ដែលលើសពីគោល​ដៅចំណុចប្រចាំឆ្នាំកំណត់ត្រឹមតែ ៩០%។នេះបង្ហាញថាកម្ពុជាបាន​ចាកចេញពី​ប្រទេសដែល​មានបន្ទុកជំងឺរបេងខ្ពស់នៅលើពិភពលោក។

លោកវេជ្ជបណ្ឌិតបន្តថា បើទោះបីជាទទួលបានជោគជ័យយ៉ាងនេះ​ក៏ដោយ ក៏កម្មវិធីជាតិកំចាត់រោគរបេង នៅមានកិច្ចការជា​ច្រើនទៀត​ដែលត្រូវបំពេញទៅថ្ងៃអនាគតពិសេសដើម្បីរួមចំណែកក្នុងការសម្រេចបានគោលដៅអភិវឌ្ឍន៍ប្រកបដោយចីរភាពនៅឆ្នាំ២០៣០។

ក្រសួងសុខាភិបាលកាលពីឆ្នាំ២០២១ បានដាក់ចេញនូវផែនការ​ជាតិដើម្បី​បញ្ចប់ជំងឺរបេងពីកម្ពុជាឆ្នាំ២០២១-ឆ្នាំ២០៣០ ។

ជា​មួយគ្នាលោកវេជ្ជបណ្ឌិត ហួត ចាន់យុដា ប្រធានមជ្ឈ​មណ្ឌល​ជាតិកំចាត់រោគរបេង និងហង់សិន បានបញ្ជាក់ក្នុងវេទិកាថា កម្ពុជា​មានសុទិដ្ឋិនិយម និងការតាំងចិត្តខ្ពស់ដើម្បីឱ្យផែនការបញ្ចប់ជំងឺរបេង​នៅឆ្នាំ២០៣០ សម្រេចបានជោគជ័យតាមផែនការ ប្រសិន​បើមាន​ការចូលរួមពីគ្រប់ភាគីពាក់ព័ន្ធទាំងអស់ជាមួយកម្មវិធីជាតិនៃក្រសួងសុខាភិបាល។

យោងតាមការបញ្ជាក់ពីប្រធានមជ្ឈមណ្ឌលជាតិកំចាត់រោគរបេង និងហង់សិន តួលេខឆ្លងជំងឺរបេងត្រូវបានគេរកឃើញក្នុងចន្លោះពី ៣ម៉ឺនទៅ៣ម៉ឺន៥ពាន់នាក់ នៅក្នុងនោះទៀត ជំងឺរបេងដែលអាច​ឆ្លងបាន ឬហៅថា របេងដែលមានផ្ទុកវិជ្ជមាន បេកា បានរកឃើញ​ក្នុងរង្វង់ពី ១ម៉ឺន ទៅ១ម៉ឺន៥ពាន់នាក់ក្នុងមួយឆ្នាំៗ។ តួលេខនៃការ​រកឃើញនេះ ក៏ត្រូវបានអ្នកជំនាញបញ្ជាក់ទៀតថា គឺជាចំនួន​ដែល​កម្ពុជាអាចគ្រប់គ្រងបាន និងឆ្លើយតបទៅកាន់អ្នកជំងឺបានទាន់​ពេលវេលា ដោយសារតែកម្ពុជាមិនមានការខ្វះខាតថ្នាំសម្រាប់​ការព្យាបាលឡើយ ដែលនេះជាមោទនភាពមួយសម្រាប់កម្ពុជា ។ប៉ុន្តែបញ្ហាប្រឈម ពាក់ព័ន្ធនឹងអ្នកឆ្លងជំងឺរបេងនោះផងដែរ កន្លងមកកន្លងត្រូវគេមើលឃើញថា ពួកគេបានទទួលការរើស​អើងពីមនុស្សជុំវិញខ្លួន ដោយមានការលើកឡើងខុសពីការពិតថា របេងជាជំងឺតំណពូជ និងព្យាបាលមិនជាសះឡើយ ដែលទាំងនេះ​គឺជាឧបសគ្គមួយផងដែរ ក្នុងការឈានទៅសម្រេចបានជោគជ័យ​នៃផែនការបញ្ចប់របេងនៅឆ្នាំ២០៣០។

ឆ្លើយតបនឹងការយល់ខុសពីការពិតនោះ មន្ត្រីជំនាញផ្នែករបេងបាន​អំពាវ​នាវឱ្យបញ្ឈប់ការរើងអើងចំពោះពួកគេ និងលើកទឹកចិត្តឱ្យ​អ្នកជំងឺទាំងនោះប្រញាប់មករកសេវាកម្មព្យាបាល ដោយសារតែការ​ព្យាបាលជំងឺ មិនតម្រូវឱ្យបង់ប្រាក់ឡើយ និងត្រូវបានធានា​ដោយអ្នក​ជំនាញថា នឹងទទួលបានលទ្ធផលជាសះស្បើយ១០០% ។ លោកវេជ្ជបណ្ឌិត ហួត ចាន់យុដា ប្រធានមជ្ឈមណ្ឌលជាតិ​កំចាត់រោគរបេង និងហង់សិន (CENAT) បានបញ្ជាក់ថា របេង ជាជំងឺឆ្លងមិនមែនជាជំងឺតពូជនោះទេ។ ជំងឺរបេង បង្កឡើងដោយ​មេរោគរបេង ឬបេកា (BK= Bacille de Kock) ឬ (MTB= Mycobacterium Tuberculosis)។ លក្ខណៈរបស់វា គឺការកើត​មានដំបៅនៅក្នុងជាលិកា ជាពិសេសនៅក្នុងសួត។លោក​វេជ្ជ​បណ្ឌិតបញ្ជាក់ថា ជំងឺរបេង ជាជំងឺអាចបង្ការ និងអាចព្យាបាលជាសះ​ស្បើយ ដូច្នេះសូមកុំឱ្យមានការរើស​អើងចំពោះអ្នក​ផ្ទុកជំងឺរបេង។

ចំណែកលោក ជួប សុខចំរើន នាយកប្រតិបត្តិអង្គការខាណា បានបញ្ជាក់ថា ការស្វែងរកការព្យាបាលជំងឺរបេង ដោយឥតគិតថ្លៃ ពិតជាមានសារៈ​សំខាន់ ដើម្បីកុំឱ្យជំងឺនេះឆ្លងទៅសមាជិកគ្រួសារ និងមនុស្ស​ជុំវិញខ្លួន។

រីឯលោក ពុយ គា ប្រធានក្លិបអ្នកកាសែតកម្ពុជា នៅក្នុងកម្មវិធីនោះក៏​បាន​លើកឡើងផងដែរថា ដើម្បីជាការចូលរួមមួយ​ផ្នែកឱ្យ​ផែនការ​ជាតិបញ្ចប់របេងឆ្នាំ២០៣០ ទទួលបានជោគជ័យ ក្នុងនាមជាអ្នក​សារព័តមាន គឺតម្រូវឲ្យមានការចូលរួម​ផ្សព្វផ្សាយ​ពីបញ្ហាជំងឺរបេង​នេះឲ្យបានទូលំទូលាយ និងត្រឹមត្រូវ ដោយយោង​ទៅតាម​ប្រភពព័ត៌មានឱ្យបានច្បាស់លាល់ផងដែរ ។

តាមរយៈវេទិកាតុមូលនេះដែរ លោកវេជ្ជបណ្ឌិត ហួត ចាន់យុដា បានអំពាវនាវដល់ភាគីពាក់ព័ន្ធរួមទាំង​អ្នកសារព័ត៌មានផងសូម
ចូលរួមក្នុងយុទ្ធនាការជាតិបញ្ចប់ជំងឺរបេងឆ្នាំ២០២៣៕

ដោយ៖គង់ សុផុល
រូបភាព៖ វេង លឹមហួត