ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយរដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជួបជាមួយ ឯកឧត្តម Cherdkiat Atthakor ឯកអគ្គរាជទូតព្រះរាជាណាចក្រថៃ ប្រចាំព្រះរាជាណាចក្រកម្ពុជា ក្នុងជំនួបសម្ដែងការគួរសម និងជម្រាបលា នៅវិមានសន្តិភាព រាជធានីភ្នំពេញ នាព្រឹកថ្ងៃព្រហស្បតិ៍ ទី១៩ ខែកញ្ញា ឆ្នាំ២០២៤ ។

សូមជម្រាបថា ក្នុងរយៈពេលជិត២ឆ្នាំ នៃអាណត្តិការទូត ឯកឧត្តម បានបំពេញការងារក្នុងការពង្រឹងទំនាក់ទំនង ដោយផ្អែកលើការយោគយល់គ្នា និងជំនឿទុកចិត្តគ្នា ទៅវិញទៅមក ដើម្បីផលប្រយោជន៍ប្រទេស និងប្រជាជន នៃប្រទេសទាំងពីរ ដែលបានក្លាយជាដៃគូយុទ្ធសាស្ត្រ កាលពីខែកុម្ភៈ ឆ្នាំ២០២៤ កន្លងទៅនេះ ក្នុងឱកាស ដំណើរទស្សនកិច្ចរបស់សម្ដេចធិបតីនាយករដ្ឋមន្ត្រី ទៅកាន់ប្រទេសថៃ ។

ចំពោះទំនាក់ទំនងរវាងប្រទេសទាំងពីរ លើវិស័យពាណិជ្ជកម្ម ត្រូវបានពង្រីកគួរឱ្យគាត់សម្គាល់ ខណៈពេលអនាគត ទំនាក់ទំនងលើគ្រប់វិស័យ រវាងប្រទេសទាំងពីរ នឹងកាន់តែរីកចម្រើនលូតលាស់ ជាងនេះទៅទៀត ដោយទំហំពាណិជ្ជកម្មទ្វេភាគីរវាងកម្ពុជា និងថៃ នៅឆ្នាំ២០២៣ បានឈានដល់ ៩ពាន់លានដុល្លារ ជាមួយនឹងគោលដៅ ១៥ពាន់លានដុល្លារនៅឆ្នាំ២០២៥ ។

ការនាំចេញរបស់ថៃ មកកម្ពុជារួមមាន៖ ប្រេងឥន្ធនៈចម្រាញ់ ភេសជ្ជៈ បសុសត្វ និងយានជំនិះ ខណៈការនាំចេញរបស់កម្ពុជាទៅថៃ មានត្បូង ផ្លែឈើ បន្លែ និងផលិតផលលោហៈ ។ ជាមួយនេះ ប្រទេសថៃ បានក្លាយជាអ្នកវិនិយោគលំដាប់ទី៦ នៅក្នុងប្រទេសកម្ពុជា ជាដៃគូផ្នែកពាណិជ្ជកម្ម ។

បន្ថែមពីលើនេះ ប្រទេសថៃ នៅតែជាប្រភពទេសចរដ៏សំខាន់សម្រាប់កម្ពុជា ដោយមានភ្ញៀវទេសចរថៃជាង ១,៨ លាននាក់មកទស្សនាកម្ពុជាកាលពីឆ្នាំ២០២៣ ហើយនៅឆ្នាំនេះ រំពឹងថា ទេសចរថៃ នឹងមកទស្សនាកម្ពុជាបន្តទៀត ជាពិសេស ទៅកាន់ខេត្តសៀមរាប ៕

អត្ថបទ ៖ វណ្ណលុក
រូបភាព ៖ វ៉េង លិមហួត , សួង ពិសិដ្ឋ