រតនគិរី៖ប្រធានក្រុមប្រឹក្សាជាតិ រណសិរ្សសាមគ្គី អភិវឌ្ឍន៍មាតុភូមិកម្ពុជា សម្តេចកិត្តិសង្គហបណ្ឌិត ម៉ែន សំអនបានអញ្ជើញ ជាអធិបតីក្នុងពិធី​ប្រកាសទទួលស្គាល់គណៈកម្មាធិការរណសិរ្ស សាមគ្គីអភិវឌ្ឍន៍មាតុភូមិ​កម្ពុជា​ខេត្តរតនគិរីកាលពីព្រឹក​ថ្ងៃទី១៩ ខែកញ្ញា ឆ្នាំ២០២៤ នៅសាលា​ខេត្តរតនគិរី។

ឯកឧត្តម ញ៉ែម សំអឿន អភិបាលខេត្តរតនគិរី ត្រូវបានប្រកាសទទួល​ស្គាល់ជា ប្រធានក្រុមប្រឹក្សាជាតិ រណសិរ្សសាមគ្គី អភិវឌ្ឍន៍មាតុភូមិកម្ពុជា​ខេត្តរតនគិរី និងឯកឧត្តម ណាប់ ប៊ុនហេង ប្រធានក្រុមប្រឹក្សាខេត្ត ត្រូវ​បាន​ប្រកាសទទួលស្គាល់ជា អនុប្រធានគណៈកម្មាធិការ រណសិរ្ស​សាមគ្គី អភិវឌ្ឍន៍មាតុភូមិកម្ពុជា ខេត្តរតនគិរី ។

មានប្រសាសន៍ក្នុងឱកាសនេះសម្តេចកិត្តិសង្គហបណ្ឌិត ម៉ែន សំអន បាននាំនូវការផ្តាំផ្ញើសួរសុខទុក្ខនិងសេចក្តីនឹក រលឹកពីសំណាក់​សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជា​គណៈអធិបតីកិត្តិយសក្រុមប្រឹក្សាជាតិ រណសិរ្សសាមគ្គី អភិវឌ្ឍន៍​មាតុភូមិកម្ពុជា ,សម្តេចអគ្គមហាពញាចក្រី ហេង សំរិន ប្រធានកិត្តិយស​ក្រុមប្រឹក្សាជាតិ រណសិរ្សសាមគ្គី អភិវឌ្ឍន៍មាតុភូមិកម្ពុជា និងសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងជាគណៈអធិបតីកិត្តិយស ក្រុមប្រឹក្សា​ជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា ជូនចំពោះ​ថ្នាក់ដឹកនាំ និងសមាជិក សមាជិកា គណ:កម្មាធិការរណសិរ្ស សាមគ្គី​អភិវឌ្ឍន៍​​មាតុភូមិកម្ពុជា ខេត្តរតនគិរី ទាំងអស់នាពេលនេះ។

សម្តេចកិត្តិសង្គហបណ្ឌិតបានកោតសរសើរ និងវាយតម្លៃខ្ពស់ ចំពោះ​ថ្នាក់ដឹកនាំគណៈកម្មាធិការរណសិរ្សខេត្តរតនគិរីគ្រប់ថា្នក់ ដែលបាន​អនុវត្តនូវតួនាទី និងភារកិច្ចរបស់ខ្លួនបានយ៉ាងសកម្ម ស្របតាមលក្ខន្តិកៈ និងបេសកកម្មរបស់រណសិរ្សសាមគ្គី អភិវឌ្ឍន៍មាតុភូមិកម្ពុជាសម្រេច​បានលទ្ធផលគួរជាទីមោទនៈ។

សម្តេច ម៉ែន សំអន បានរំលឹកអាជ្ញាធរខេត្ត ត្រូវបង្កលក្ខណៈងាយស្រួល និងផ្តល់ឱកាសដល់អ្នកវិនិយោគទុននិងថែរក្សា អ្នកវិនិយោគឱ្យបានល្អ ដើម្បីជាផ្នែកមួយ ក្នុងការជួយជ្រោងសេដ្ឋកិច្ចរបស់ខេត្ត ឱ្យឈានឡើង​មួយកម្រិតទៀត។ ចំណែក ប្រជាពលរដ្ឋគ្រប់រូប ត្រូវបន្តចូលរួមជា​មួយរាជរដ្ឋាភិបាល ដើម្បីថែរក្សាសុខសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់ សុខដុម នៃសង្គម និងការពារដាច់ខាត នូវឯករាជ្យ អធិបតេយ្យភាព និងបូរណភាពទឹកដី។

ប្រធានក្រុមប្រឹក្សាជាតិ រណសិរ្សសាមគ្គី អភិវឌ្ឍន៍មាតុភូមិកម្ពុជា ឯកឧត្តម ញ៉ែម សំអឿន បានប្តេជ្ញាចិត្តថានឹងយកចិត្តទុក ដាក់អនុវត្ត​តាមស្មារតីលក្ខន្តិកៈ និងសេចក្តីសម្រេចនានារបស់​អង្គការរណសិរ្ស,​គោរពនិងចូលរួមអនុវត្តតាមកម្មវិធីនយោបាយ របស់ គណបក្សប្រជាជន​កម្ពុជា ដែលមានសម្តេចតេជោ ហ៊ុន សែន ជាប្រមុខដឹកនាំ ,គាំទ្រនិងរួម​ចំណែកក្នុងការអនុវត្តកម្មវិធី នយោបាយ និងយុទ្ធសាស្ត្របញ្ច​កោណ​ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ដែល​មានសម្តេចធិបតី ហ៊ុន ម៉ាណែត ជានាយករដ្ឋមន្ត្រី ៕

ដោយ៖ឡុង សំបូរ