កំពង់ធំ៖ សិក្ខាសិលាពិគ្រោះយោបល់ថ្នាក់តំបន់ការអនុវត្តគោល​នយោ​បាយ​ជាតិស្ដីពីដំឡូងមីឆ្នាំ២០២០-២០២៥បានប្រព្រឹត្ត ទៅនៅសាល​ប្រជុំសាលាខេត្តកាលពីព្រឹកថ្ងៃទី១៩ ខែកញ្ញា ឆ្នាំ២០២៤ ក្រោមអធិបតី​ភាព ឯកឧត្តម អ៊ុ កុសលអនុរដ្ឋលេខា ធិការក្រសួងពាណិជ្ជកម្ម លោក ងួន រាសី អភិបាលរងខេត្តកំពង់ធំ លោក លោកស្រី តំណាងក្រសួង​ឧស្សាហកម្ម វិទ្យាសាស្ត្រ បច្ចេកវិទ្យានិងនវានុវត្តន៍ ក្រសួងកសិកម្ម រុក្ខប្រមាញ់និងនេសាទ និងមន្ទីរពាក់ព័ន្ធនានា។

វិស័យដំឡូងមីក្នុងខេត្តកំពង់ធំមានបញ្ហាប្រឈមមួយចំនួនដូចជា កង្វះ​ការប្រមូលផ្ដុំទៅថ្នាក់មូលដ្ឋានកង្វះសហគមន៍ ដំឡូងមី សមាគម​ដំឡូងមី ក្រុមផលិតឬបណ្ដុំអាជីវកម្មជាដើម។នេះបើតាមការលើកឡើង​របស់ឯក​ឧត្តម​ អ៊ុ កុសល ។ឯកឧត្តមបន្ថែមថា ក៏នៅមានបញ្ហាផ្សេងៗមួយ​​ចំនួន​ទៀតដូចជា កង្វះទុន បច្ចេកទេសការជ្រើសរើសពូជ ការថែទាំ ក្រោយ​ពីការប្រមូលផល, កង្វះរោងចក្រកែច្នៃក្នុងស្រុកទៅជាចំណីសត្វ ម្សៅមី ,បាត់ឱកាសតថ្លៃ ,កង្វះផែនការផលិតកម្ម,កង្វះការកត់ត្រាចំណូល ចំណាយអាជីវកម្ម និងការដឹកជញ្ជូនមានតម្លៃខ្ពស់ជាដើម។

ទាក់ទងនឹងគោលនយោបាយជាតិស្ដីពីដំឡូងមី ឯកឧត្តម អ៊ុ កុសល បញ្ជាក់ថា នេះគឺជាផែនទីបង្ហាញផ្លូវសម្រាប់ស្ថាប័ន និងប្រតិបត្តិករ​ទាំងអស់​យកធ្វើជាមូលដ្ឋានក្នុងការរៀបផែនការ និងយុទ្ធសាស្ត្រអភិវឌ្ឍន៍​វិស័យនេះប្រកបដោយចីរភាព។ ចក្ខុវិស័យនៃឯកសារគោលនយោបាយ​ជាតិស្ដីពីដំឡូងមី២០២០-២០២៥នេះគឺដើម្បីកសាងមូលដ្ឋានផលិតកម្មដំឡូងនេះប្រកប ដោយនិរន្តភាព សម្រាប់ការកែច្នៃប្រកបដោយគុណភាព ដើម្បីប្រកួតប្រជែងនៅលើទីផ្សារនិងមានគោលបំណងធ្វើឱ្យ ប្រទេស​កម្ពុជាក្លាយជាទីតាំងផលិតនិងកែច្នៃដំឡូងមីនិងជាអ្នកផ្គត់ផ្គង់ផលិតផលដំឡូងមីដែលអាចជឿទុកចិត្តបានសម្រាប់ទីផ្សារពិភពលោក៕
ដោយ៖ប៊ុន រដ្ឋា