កំពត៖ប្រតិភូអង្គទូតចំនួន១២ ស្ថានទូតប្រចាំព្រះរាជាណាចក្រ​កម្ពុជាបានចាប់អារម្មណ៍និងបង្ហាញនូវអារម្មណ៍ភ្ញាក់ផ្អើល និងកោត​សរសើរ​យ៉ាខ្លាំងចំពោះសក្តានុពល និងការអភិវឌ្ឍរបស់ខេត្តកំពត បន្ទាប់ពីបានទស្សនកិច្ចនិងស្តាប់បទបង្ហាញរបស់ឯកឧត្តម ម៉ៅ ធនិន អភិបាលខេត្តកំពត។

តាមរយៈការរៀបចំរបស់ក្រសួងការបរទេសនិងសហប្រតិបត្តិការអន្តរជាតិ អង្គទូតចំនួន១២ប្រចាំកម្ពុជា​បាន​ទស្សនកិច្ចសិក្សា​តំបន់​សក្តានុពលមួយចំនួនកាលពីថ្ងៃទី២០ ខែកញ្ញា ឆ្នាំ២០២៤។ឯកឧត្តម ចឺយ វិចិត្រ ប្រធានវិទ្យាស្ថានជាតិការទូត និងទំនាក់​ទំនង​អន្តរជាតិ​នៃក្រសួងការបរទេស និងសហប្រតិបត្តិការអន្តរជាតិបាន​ឱ្យដឹងថា ទស្សនកិច្ចសិក្សារបស់អង្គទូត មកកាន់ខេត្តកំពត ជាផ្នែកមួយនៃ​កិច្ចការ​អនុវត្តជំរុញការទូតសេដ្ឋកិច្ច របស់ក្រសួងការបរទេស ដែលរាជរដ្ឋាភិបាលកម្ពុជា ក្រោមការដឹកនាំរបស់​សម្តេច​ធិបតី ហ៊ុន ម៉ាណែត ជំរុញធ្វើយ៉ាងណាឱ្យ​សេដ្ឋកិច្ចកម្ពុជារីកចម្រើនបានឆាប់រហ័ស​ឈានទៅ​សម្រេចគោលដៅ​អភិវឌ្ឍន៍​នៅឆ្នាំ​២០៣០ និង២០៥០។

ឯកឧត្តមបន្តថា  វិទ្យាស្ថានបានសម្រេច ដឹកនាំប្រតិភូអង្គទូតចុះមកធ្វើ​ទស្សនកិច្ចសិក្សានៅខេត្តកំពត ព្រោះចង់ឱ្យប្រតិភូ​អង្គទូត​បានឃើញ​ដោយផ្ទាល់ភ្នែកអំពីសក្តានុពល និងការអភិវឌ្ឍរីកចម្រើនរបស់ខេត្ត​កំពត ដែលជាខេត្តមូយលេចធ្លោ​របស់​កម្ពុជា  និងមាន​អំណោយផល​សម្រាប់ការវិនិយោគលើវិស័យផ្សេងៗ មានដូចជា ទេសចរណ៍ និងកសិកម្មជាដើម។

គណៈប្រតិភូអង្គទូតបានទៅទស្សនាតំបន់ចំការម្រេចព្រឹកនិងបានស្តាប់ការធ្វើបទបង្ហាញរបស់ឯកឧត្តម ម៉ៅ ធនិន អភិបាល​ខេត្តកំពត។ឯកអគ្គរាជទូត រដ្ឋទូត បានបង្ហាញនូវការចាប់អារម្មណ៍ និងកោត​សរសើរ​នូវអ្វីដែលខេត្តកំពតមាន។

អង្គទូតក៏បានអញ្ជើញចូលរួមក្នុងពិធីចែញវិញ្ញាបនបត្រនៅពេលល្ងាចនៅ រីសត អែមប៊ើ  ផងដែរ។ក្នុងឱកាសនេះឯកឧត្តម ម៉ៅ ធនិន បានស្នើឱ្យអង្គទូតទាំងអស់ជួយផ្សព្វផ្សាយអំពីសក្តានុពលរបស់ខេត្តកំពត ។ឯកឧត្តមក៏សង្ឃឹមថា វត្តមានរបស់​អង្គទូត​ទាំង​១២ដែលអញ្ជើញ​មក​កាន់ខេត្តកំពត មិនមែនជាលើកចុងក្រោយនោះទេ  ហើយឯកឧត្តម​ត្រៀមខ្លួនជានិច្ច ក្នុងការរង់ចាំទទួល​ស្វាគមន៍​វត្តមានរបស់ឯកឧត្តម លោកជំទាវ ឯកអគ្គរាជទូត រដ្ឋទូត ជាថ្មីម្តងទៀត។
ក្នុងឱកាសនេះដែររដ្ឋបាលខេត្តកំពត ក៏ធ្វើនំជូនដំណើរឯកឧត្តម​ឯកអគ្គរាជទូតថៃ ដែលនឹងបញ្ចប់អាណត្តិនៅកម្ពុជា ក្នុងរយៈ​ពេល២សប្តាហ៍ទៀត។ ដោយឡែកនៅថ្ងៃទី២១ ខែកញ្ញា គណៈប្រតិភូអង្គទូតអញ្ជើញទៅទស្សនាកំពង់ផែពហុបំណង រួចទៅទស្សនារមណីយដ្ឋានឧទ្យានជាតិព្រះមុនីវង្សបូកគោ មុននឹងត្រឡប់ទៅភ្នំពេញវិញ៕
ដោយ៖ សិលា សារិន