ប្រធានកិត្តិយសនារីកម្ពុជាដើម្បីសន្តិភាពនិងអភិវឌ្ឍន៍នៃក្រសួងបរិស្ថាន៖ការលុបបំបាត់ជំងឺគ្រុនចាញ់បានគឺផ្តើមចេញពីយើងទាំងអស់គ្នា
កំពង់ស្ពឺ៖ប្រធានកិត្តយសនារីកម្ពុជាដើម្បីសន្តិភាពនិងអភិវឌ្ឍន៍នៃ ក្រសួងបរិស្ថាន លោកជំទាវ ជា សុផាកន្នី បានបញ្ជាក់ថា ការលុប បំបាត់ជំងឺគ្រុនចាញ់ឱ្យអស់ទាំងស្រុងចេញពីកម្ពុជា គឺផ្តើមចេញពី យើងទាំងអស់គ្នា ។យើងទាំងអស់គ្នាអាចធ្វើបាន ដោយគ្រាន់តែគេង ក្នុងមុងជ្រលក់ថ្នាំរាល់ថ្ងៃ និងបំបាត់ឱ្យអស់ប្រភពនៃជម្រកមូស។
លោកជំទាវថ្លែងបែបនេះក្នុងឱកាសដឹកនាំប្រតិភូក្រសួងបរិស្ថាននិងមន្ត្រីជំនាញនៃក្រសួងសុខាភិបាលចុះអប់រំផ្សព្វផ្សាយស្តីពីការបង្កា រ ទប់ស្កាត់ លុបបំបាត់ជំងឺគ្រុនចាញ់នៅក្នុងភូមិសាស្ត្រសហគមន៍ចំបក់ ឃុំចំបក់ ស្រុកភ្នំស្រួច ខេត្តកំពង់ស្ពឺ កាលពីព្រឹកថ្ងៃទី២១ ខែកញ្ញា ឆ្នាំ២០២៤។
នៅក្នុងឱកាសនៃការអប់រំផ្សព្វផ្សាយនោះ ប្រធានកិត្តិយសនារីកម្ពុជា ដើម្បីសន្តិភាពនិងអភិវឌ្ឍន៍នៃក្រសួងបរិស្ថានបានអំពាវនាវដល់គ្រប់ស្ថាប័នរដ្ឋ វិស័យឯកជន សង្គមស៊ីវិល និងសហគមន៍អ្នកផ្តល់ជំនួយនានាសូមបន្តនូវកិច្ចសហការជាមួយក្រសួងបរិស្ថាន ដើម្បីលើកកម្ពស់កិច្ចការការពារធនធានធម្មជាតិ តាមរយៈការពង្រឹងសមត្ថភាព និងសុខុមាលភាពមន្ត្រីឧទ្យានុរក្ស និងគណៈកម្មការ សហគមន៍តំបន់ការពារធម្មជាតិដើម្បីចូលរួមលុបបំបាត់ជំងឺគ្រុនចាញ់ឱ្យកាន់តែស៊ីជម្រៅ កាន់តែទូលំទូលាយ និងកាន់តែគ្រប់ជ្រុងជ្រោយ ដើម្បីឱ្យកម្ពុជាអាចធ្វើដំណើរទៅកាន់អនាគតមួយដែលគ្មានជំងឺគ្រុនចាញ់នៅឆ្នាំ២០២៥ខាងមុខ៕
អត្ថបទ៖ម៉ុន សំអាត
