កីឡាករកីឡាការិនីវាយកូនគោលជាតិនិងអន្តរជាតិ ១១៧នាក់ចូលរួមប្រជែងក្នុង ព្រឹត្តិការណ៍ SAMBA ASIA-GROUP GOLF TOURNAMENT
(ភ្នំពេញ)៖ កីឡាករកីឡាការិនីវាយកូនគោលជាតិនិងអន្តរជាតិមិនមែនអាជីពចំនួន ១១៧នាក់បានចូលរួមកួតប្រជែងក្នុងព្រឹត្តិការណ៍កីឡាវាយកូនគោល SAMBA ASIA-GROUP GOLF TOURNAMENT ដែលរៀបចំឡើងដោយភោជណីដ្ឋាន SAMBA នៅទីលានកីឡាវាយកូនកូនគោលឈុនអូនហ្គហ្វរីស៊ត ស្ថិតនៅក្នុង ខណ្ឌ ព្រែកព្នៅ រាជធានីភ្នំពេញ។
លោក អ៊ុក រតនៈវិសុទ្ធ ផ្នែកគ្រប់គ្រងទីផ្សារភោជណីដ្ឋាន SAMBA បានឱ្យដឹងថា នេះជាព្រឹត្តិការណ៍លើកទី១ ដែលភោជណីរដ្ឋានបានសហការជាមួយទីលានកីឡាវាយកូនគោលឈុនអូនហ្គហ្វរីស៊ត ក្នុងគោលបំណងបង្កើតបរិយាកាសសប្បាយរីករាយជូនភ្ញៀវជាតិនិងអន្តរជាតិ ក្នុងនោះមានមន្រ្តីរាជការ អ្នកវិនិយោគ ដែលមកបណ្តាក់ទុនវិនិយោគនៅកម្ពុជា។
អ្នកគ្រប់គ្រងផ្នែកទីផ្សារ ខាងលើ បានគូសបញ្ជាក់ទៀតថា តាមរយៈព្រឹត្តិការណ៍ប្រកួតនេះ មិនត្រឹមតែផ្តល់ជូននូវសុខមាលភាពដល់អ្នកលេងកីឡាវាយកូនគោលប៉ុណ្ណោះនោះទេ ពោលវាបានបង្កើតឡើងនូវទំនាក់ទំនងផ្សារភ្ជាប់មិត្តភាពសាមគ្គីភាព និងកិច្ចសហការល្អជាមួយគ្នា ឈានទៅភ្ជាប់ទំនាក់ទំនងការវិនិយោគរួមគ្នាផងដែរ។ ទន្ទឹមជាមួយគ្នានេះព្រឹត្តិការណ៍ប្រកួតនេះ ភោជណីដ្ឋាន SAMBA ក៏ចង់ឱ្យភ្ញៀវជាតិនិងអន្តរជាតិ បានស្គាល់កាន់តែច្បាស់ អំពីភោជណីដ្ឋានលំដាប់អាស៊ីនៅកម្ពុជា ដែលជាផ្នែកមួយរួមចំណែកផ្តល់ជូននូវម្ហូបអាហារស្តង់ដារសម្រាប់ភ្ញៀវទេសចរណ៍ជាតិនិងអន្តរជាតិ។
លោក អ៊ុក រតនៈវិសុទ្ធ បានបន្ថែមទៀតថា តាមគម្រោង ការរៀបចំព្រឹត្តិការណ៍ប្រកួតកូនគោលនេះ SAMBA មានគម្រោងរៀបចំជារៀងរាល់ឆ្នាំ ផ្តល់ឱកាសឱ្យកីឡាករកីឡាការិនីមិនមែនអាជីពបានចូលរួមប្រកួតប្រជែងបញ្ចេញនូវសមត្ថភាពដែលខិតខំហ្វឹកហាត់ ពិសេស ចង់ចូលរួមបំផុសលើកស្ទួយរួមចំណែកអភិវឌ្ឍន៍វិស័យកីឡាវាយកូនគោលឱ្យកាន់តែរីកចំនរើន។
ឆ្លងកាត់ការប្រកួតយ៉ាងស្វិតស្វាញចំណាត់ថ្នាក់ Longest Drive អ្នកឈ្នះ២រូប បានទៅលើលោក លៀង យ៉ានឡី(Mr. Lien Yan Lei )និងលោក កាន់ វង្ស(Mr. Kan Vong )។ ជ័យលាភី Nearest to the pin អ្នកឈ្នះចំនួន៤រូប បានទៅលើ លោក ម៉ៅ ជាងគ័ង(Mr. Mao Jian guang.) លោក សំបូ(Mr. Sambo )លោក សៅ ចាន់ដារ៉ា.(Mr. Sao Chandara )លោក វីលៀម លី(William Li ).។ជ័យលាភីជើងឯកអ្នកស្រី កាន់ វង្ស .ជ័យលាភីជើងឯករង ឯកឧត្តម មួង សារ៉ាន់ .ជ័យលាភីជើងឯករងទី២ បានទៅលើលោក យ៉ាងប៉ី គ័ង(Yang Pei Guan)។ ម្ចាស់ជើងឯក Net Championship លោក រីគីខៃ(Ricky Cai) . Net Championship ចំណាត់ថ្នាក់លេខ១ លោក លី ថៃគិត .ជ័យលាភីលេខ២ Net Championship លោក Zhu Zhenqiang៕
រូបភាព មឿង គឹមរ៉ុង
អត្ថបទ ជាវ ចន្ធូ