អាមេរិក៖ ប្រធានាធិបតី នៃប្រទេសអ៊ុយក្រែន លោក Volodymyr Zelensky ក្នុងពេលបំពេញទស្សនកិច្ច នៅសហរដ្ឋអាមេរិក បានឆ្លៀតទៅទស្សនារោងចក្រគ្រាប់រំសេវ Scranton Army នៅក្នុងរដ្ឋ Pennsylvania។

លោក Zelensky ធ្វើទស្សនកិច្ចនៅសហរដ្ឋអាមេរិក ដើម្បីពន្យល់ពីផែនការរបស់ទីក្រុង Kyiv ដើម្បីបញ្ចប់សង្រ្គាមជាមួយរុស្ស៊ី។ ដំណើរទស្សនកិច្ចរបស់ Zelensky ធ្វើឡើងនៅទីក្រុងញូវយ៉ក និងវ៉ាស៊ីនតោន ខណៈដែលលោកព្យាយាមធានា ការបន្តប្រើប្រាស់អាវុធរបស់លោកខាងលិច ប្រយុទ្ធជាមួយប្រទេសរុស្ស៊ី។

បើតាមកាសែត ABC ក្នុងពេលធ្វើទស្សនកិច្ចនៅរោងចក្រគ្រាប់រំសេវ កាលពីថ្ងៃអាទិត្យ លោកប្រធានាធិបតីប្រទេសអ៊ុយក្រែនថ្លែងអំណរគុណដល់បុគ្គលិក ដែលកំពុងផលិតអាវុធ ដែលជាតម្រូវការចាំបាច់បំផុត សម្រាប់ប្រទេសរបស់លោក យកទៅទប់ទល់នឹងកងកម្លាំងជើងគោករុស្ស៊ី។

រោងចក្រ Scranton គឺជាទីតាំងផលិតគ្រាប់កាំភ្លើងធំ ១៥៥ មីលីម៉ែត្រ ហើយបានបង្កើនផលិតកម្ម ក្នុងរយៈពេលមួយឆ្នាំកន្លងមក។ អ៊ុយក្រែនបានទទួលកាំភ្លើងធំប្រភេទនេះ ចំនួន៣លានគ្រឿង រួចមកហើយ ពីសហរដ្ឋអាមេរិក៕

ប្រភពពី AFP ប្រែសម្រួល៖ សារ៉ាត