ក្រចេះ៖ អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ ឯកឧត្តមទេសរដ្ឋមន្រ្តី កិត្តិសង្គហបណ្ឌិត គន់ គីម អម​ដំណើរដោយ លោក ហេង សុថា អភិបាលរងខេត្ត និង លោក ទុយ ប៊ុនសេរីរ័ត្នមុនី អភិបាលរងខេត្ត តំណាងឯកឧត្តម វ៉ា ថន អភិបាលខេត្តក្រចេះ អាជ្ញាធរស្រុកចិត្របុរី និងមន្ទីរជំនាញកសិកម្មខេត្ត បានចុះត្រួត​ពិនិត្យស្ថានភាពទឹកជំនន់ទន្លេមេគង្គ និងចុះជួបសាកសួរសុខ​ទុក្ខប្រជាពលរដ្ឋ ដែលបានជម្លៀសមកកាន់ទីទួលសុវត្ថិភាពតាឃីន នៅឃុំបុសលាវ ស្រុកចិត្របុរី ខេត្តក្រចេះ។

ក្នុងសកម្មភាពនៅថ្ងៃទី២៦ ខែកញ្ញា ឆ្នាំ២០២៤ ឯកឧត្តមទេសរដ្ឋមន្រ្តី គន់ គីម បានរំលឹកដល់ប្រជាពលរដ្ឋដែលត្រូវបាន​ជម្លៀសមកកាន់​ទីទួលសុវត្ថិភាព និងគ្រួសារដែលប្រឈមរងផលប៉ះពាល់ ដោយរបប​ទឹកជំនន់ទន្លេមេគង្គ និងជំនន់ទឹកភ្លៀង នៅក្នុងឃុំបុសលាវ ស្រុកចិត្របុរី ទាំងអស់ ឱ្យយកចិត្តទុកដាក់ថែទាំសុខភាព ដោយត្រូវ​ហូបស្អាត រស់នៅស្អាត និងចេះ​អនាម័យ​ខ្លួនប្រាណ ដើម្បីចៀស​ឆ្ងាយពីការឆ្លងការជំងឺរាតត្បាតផ្សេងៗ។ទន្ទឹមនេះអាជ្ញាធរមូលដ្ឋានភូមិ ឃុំ ស្រុក ត្រូវបន្តយកចិត្តទុកដាក់​តាមដាន និងរាយការណ៍មក​អាជ្ញាធរខេត្តភ្លាមៗ ។

ឯកឧត្តមទេសរដ្ឋមន្រ្តី បានបញ្ជាក់ថា កាលពី៥ឆ្នាំមុន យើងបារម្ភ​ពីការជម្លៀសប្រជាពលរដ្ឋទៅទីទួលសុវត្ថិភាព ប៉ុន្តែ បច្ចុប្បន្នមិន​ព្រួយបារម្ភទៀតទេ ដោយសារពួកគាត់បានយល់ដឹង និងទទួល​ដំណឹងពីអាជ្ញាធរ ហើយប្រជាពលរដ្ឋ ក៏បានត្រៀមលក្ខណៈយ៉ាងល្អ ព្រោះអាជ្ញាធរនៅមូលដ្ឋានភូមិ ឃុំ ស្រុក បានសម្រួលឱ្យមន្ត្រីឃោសនា និងអប់រំដល់ពួកគាត់ ធ្វើឱ្យពួកគាត់បានត្រៀម​ទុកជាមុន​នូវសម្ភារនានា ដែលត្រូវយកជាប់ខ្លួន។

លោក ទ្រី សុភ័ក្ត្រ ប្រធានមន្ទីរកសិកម្ម រុក្ខាប្រមាញ់ និងនេសាទ​ខេត្ត​ក្រចេះបានឱ្យដឹងនៅថ្ងៃទី២៦ ខែកញ្ញានេះថា ការស្រង់ព័ត៌មាន​ជុំវិញការលិចលង់នេះ មិនទាន់បាន១០០ ភាគរយនៅឡើយ ហើយក៏​មិនទាន់បានបិទបញ្ចប់ដែរ ។ លោកថា ទូទាំងខេត្តប៉ះពាល់​ដំណាំស្រូវ ៧ពាន់ ៩៣៤ហិកតា ស្មើនឹង ៨ពាន់ ១៦១គ្រួសារ ក្នុងនោះ វាយតម្លៃ​ខូចខាត ៣ពាន់ ៩៩៤ហិកតា ស្មើនឹង ៤ពាន់ ២១៩ហិកតា ,លទ្ធភាព​ស្តារឡើងវិញបានចំនួន ៣ពាន់ ៧៧៣ហិកតា ស្មើនឹង ៤ពាន់ ៦៤គ្រួសារ នេះជាការវាយតម្លៃបឋមសម្រាប់ ថ្ងៃទី២៥ ខែកញ្ញា ,ថ្ងៃទី២៦ ខែកញ្ញានិងកំពុងធ្វើបច្ចុប្បន្នភាពជាបន្តទៀត។

លោក ទ្រី សុភ័ក្ត្រ បន្តថា ដោយឡែកនៅក្នុងឃុំបុសលាវ មានផលប៉ះ​ពាល់ ៤៦២ហិកតា ស្មើនឹង ៦៥៥គ្រួសារ លទ្ធភាពស្តារ​ឡើងវិញចំនួន ៣០៤ហិកតា ។ប៉ុន្តែប្រសិនបើរយៈពេលមួយសប្តាហ៍ទៀត ទឹកមិន​ស្រកអស់ទេនោះ វានឹងរងការខូចខាត ៩៩​ភាគរយ ។ប្រសិនបើទឹក​លិចចាប់ពីរយៈពេល ៨ថ្ងៃឡើងទៅវានឹងរងការខូចខាតទាំងស្រុង។

សូមជម្រាបថា កម្ពស់ទឹកទន្លេមេគង្គក្នុងខេត្តក្រចេះ គិតត្រឹមម៉ោង ៤រសៀល ថ្ងៃទី២៦ ខែកញ្ញានេះ ទឹកមានកម្ពស់ ២១.៤០ ម៉ែត្រ បើធៀបនឹងពេលព្រឹក ថ្ងៃដដែល ទឹកស្រកចុះ ០.១៣ ម៉ែត្រ៕
ដោយ៖ឡុង សំបូរ