វត្តមានសម្តេច ធិបតី ចូលរួមទិវារត់ប្រណាំងពាក់កណ្តាលម៉ារ៉ាតុងលើកទី២៩ នៅអង្គរវត្តជាចលករមួយធ្វើឱ្យអ្នកចូលរួមកាន់តែកើន
(ភ្នំពេញ)៖ លោក សែម ផល្លា នាយកប្រតិបត្តិ អ្នករៀបចំព្រឹត្តិការណ៍រត់ម៉ារ៉ាតុងនៅកម្ពុជា បានអះអាងថា វត្តមានរបស់សម្តេច ធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ចូលរួមនៅក្នុងទិវារត់ប្រណាំងពាក់កណ្តាលម៉ារ៉ាតុងលើកទី២៩នៅអង្គរវត្ត ខេត្តសៀមរាប ដែលនឹងប្រព្រឹត្តិទៅនាថ្ងៃទី១ ខែ ធ្នូ ឆ្នាំ២០២៤ខាងមុខនេះ គឺជាចលករមួយធ្វើកំណើនអ្នកចូលរួមកាន់តែមានកំណើនឡើង ហើយ កាន់តែផ្តល់ភាពកក់ក្តៅចំពោះអ្នកចូលរួមថែមទៀតផង។
ការថ្លែងលើកឡើងរបស់នាយកប្រតិបត្តិរូបនេះ បានធ្វើឡើង នៅក្នុងសន្និសិទសារព័ត៌មានប្រកាស ស្តីអំពី ទិវារត់ប្រណាំងពាក់កណ្តាលម៉ារ៉ាតុងលើកទី២៩នៅអង្គរវត្ត នារសៀលថ្ងៃទី២៧ ខែ កញ្ញា ឆ្នាំ២០២៤ នៅអាគារទីស្នាក់ការគណៈកម្មាធិការជាតិអូឡាំពិកកម្ពុជា។
នាយកប្រតិបត្តិរូបនេះ បានពន្យល់ទៀតថា ទិវារត់ប្រណាំងពាក់កណ្តាលម៉ារ៉ាតុងនៅសៀមរាប អង្គរវត្តនេះ អាចនិងក្លាយទៅជាព្រឹត្តិប្រពៃណីមួយសម្រាប់កម្ពុជា ដ្បិតការចូលរួមពីមួយឆ្នាំទៅមួយឆ្នាំមានចំនួនអ្នកចូលរួមទាំងភ្ញៀវជាតិ និងអន្តរជាតិកើនឡើងរហូត ។
លោកថា ការចូលរួមគាំទ្រពីប្រមុខរាជរដ្ឋាភិបាលកម្ពុជាបង្ហាញវត្តមានរត់ជាមួយភ្ញៀវជាតិនិងអន្តរជាតិក្នុងព្រឹត្តិការណ៍នេះ និងជំរុញឱ្យការរៀបចំកាន់តែមានលក្ខណៈស្តង់ដារត្រូវតាមបទដ្ឋានរបស់អន្តរជាតិ មានន័យថា ការរត់របស់ភ្ញៀវគឺសុវត្ថិភាព មានការបិទផ្លូវជិតបានល្អ មិនធ្វើឱ្យអ្នករត់មានក្តីបារម្ភ រត់ដោយមានទំនុកចិត្ត និងសប្បាយរីករាយ។
នាយកប្រតិបត្តិខាងលើ បានគូសបញ្ជាក់ទៀតថា វត្តមានការចូលរួមរបស់សម្តេច ធិបតី គឺជាចំណែកមួយ ដែលនឹងជួយឱ្យកម្ពុជាក្លាយជាប្រទេសមានអ្នកចូលរួមរត់ច្រើន និងជាប់ចំណាត់ថ្នាក់ល្អជាលំដាប់ផ្កាយ៥ ដែលជាគោលដៅរបស់កម្ពុជាត្រៀមចូលរួមប្រកួតប្រជែងជាមួយបណ្តាប្រទេសនៅលើពិភពលោក។
សម្រាប់ថវិកាសប្បុរសធម៌ដែលជាថវិកាព្រឹត្តិការណ៍ឆ្នាំ២០២៣ បានផ្តល់ជូនទៅ មន្ទីរពេទ្យកុមារគន្ធបុប្ផាទទួលបាន៥០០០ដុល្លារ. អង្គការ Cambodia Trust ទទួលបាន ២៥០០ដុល្លារ អង្គការជនពិការអន្តរជាតិ (Handicap International) ទទួលបាន ២០០០ដុល្លារ និង អង្គការបេះដូងមាសទទួលបាន ១០៥០០ដុល្លារ សម្រាប់បែងចែកបន្តដល់អង្គការសប្បុរសធម៌ចំនួន៦ផ្សេងទៀត។ ទិវារត់ពាក់កណ្តាលម៉ារ៉ាតុង អង្គរលើកទី២៩នេះមាន៤វិញ្ញាសាគឺ រត់ចម្ងាយ២១គីឡូម៉ែត្រ រត់ចម្ងាយ១០គីឡូម៉ែត្រ រត់ចម្ងាយ៥គីឡូម៉ែត្រ និងរត់កម្សាន្ដ៣គីឡូម៉ែត្រ ខណៈសម្តេចធិបតីនាយករដ្ឋមន្ត្រីនឹងចូលរួមរត់ចម្ងាយ៥គីឡូម៉ែត្រ។
សូមរំលឹកថា ទិវារត់ប្រណាំងពាក់កណ្តាលម៉ារ៉ាតុង នៅអង្គរវត្ត ខេត្តសៀមរាបនេះ បានបង្កើតឡើង នៅក្នុងឆ្នាំ១៩៩៦ ដោយមានអ្នកចូលរួមត្រឹមតែ៣ទៅ៤រយនាក់ប៉ុណ្ណោះ ខណៈឆ្នាំ២០២៤ លើកទី២៩នេះ ត្រូវបានរំពឹងថា អ្នកចូលរួមនឹងមានចំនួនជាង ១ម៉ឺននាក់ ៕
រូបភាព ៖ ជីម ភារ៉ា
អត្ថបទ ៖ ជាវ ចន្ធូ
