(ជប៉ុន)៖ ឯកឧត្តម ទុយ រី ឯកអគ្គរាជទូតកម្ពុជាប្រចាំប្រទេសជប៉ុន មន្រ្តី និងបុគ្គលិកស្ថាន ទូត រួមជាមួយ ឧកញ៉ាបណ្ឌិត លី រិទ្ជ ប្រធានក្រុមការងារប្រចាំខេត្ត កាណាហ្កាវ៉ា ( Kanagawa) និងសមាជិក រមទាំងពុទ្ធបរិស័ទចំណុះជើងវត្តជាច្រើននាក់ បានអញ្ចើញចូលរួមពិធីបុណ្យកាន់បិណ្ឌទី១២ នៅវត្តបារមីគិរីខេមរាភ្នំបីតាធំ នៅខេត្តកាណាហ្កាវ៉ា ប្រទេសជប៉ុន នាព្រឹកថ្ងៃអាទិត្យ ថ្ងៃទី២៩  ខែកញ្ញា ឆ្នាំ២០២៤ ។

ក្នុងពិធីបុណ្យកាន់បិណ្ឌទី១២នេះ ឯកឧត្តម ទុយ រី ឯកអគ្គរាជទូត និងមន្ត្រីនៃស្ថានទូត បាននាំយកនូវទេយ្យទាន គ្រឿងឧបភោគ បរិភោគ និងបច្ច័យមួយចំនួន ទៅវេរប្រគេនព្រះសង្ឃ ដែលគង់ចាំព្រះវស្សា នៅវត្តបារមីគិរីខេមរាភ្នំបីតាធំ ដើម្បីឧទ្ទិសកុសលផលបុណ្យជូនដល់ដួងវិញ្ញាណក្ខន្ធជីដូនជីតា បុព្វការីជន និងញាត្តិការទាំង៧សន្តាន ដែលបានចែកឋានទៅកាន់លោកខាងមុខ ។

ឯកឧត្តម ទុយ រី ឯកអគ្គរាជទូត បានជួបសំណេះសំណាល និងសួរសុខទុក្ខបងប្អូនសមាគមខ្មែរ  កម្មសិក្សាការី និស្សិត ដែលកំពុងរស់នៅធ្វើការក្នុងប្រទេសជប៉ុន និងថ្លែងអំណគុណដល់ បងប្អូន កូនក្មួយ ដែលបានចូលរួមបរិច្ចាគមូលនិធិកសាងហេដ្ឋារចនាសម្ព័ន្ធតាមព្រំដែន ក្នុងគោលបំណងចូលរួមជាមួយរាជរដ្ឋាភិបាលកម្ពុជា នៅក្នុងបុព្វហេតុការពារ និងអភិវឌ្ឍជាតិ ក្នុងស្មារតីសាមគ្គី ថែរក្សា ការពារ សុខសន្តិភាព អធិបតេយ្យ និងបូរណភាពទឹកដី ពិសេសជំរុញការអភិវឌ្ឍនៅតាមតំបន់ព្រំដែន ឱ្យបានកាន់តែរឹងមាំ និងប្រកបដោយចីរភាព ។

ឯកឧត្តមបានបញ្ជាក់ថា ទាំងអស់នេះគឺជាការខិតខំប្រឹងប្រែងរបស់រាជរដ្ឋាភិបាលកម្ពុជា ដឹកនាំដោយសម្ដេអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា និងបន្តអនុវត្តដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបច្ចុប្បន្ន ព្រមទាំងគុណតម្លៃនៃសន្តិភាព ដែលបានមកដោយលំបាក ដូច្នេះប្រជាពលរដ្ឋខ្មែរដែលរស់នៅប្រទេសជប៉ុនទាំងអស់ រួមគ្នាបន្តថែរក្សាការពារ សន្តិភាពនៅកម្ពុជាឲ្យកាន់តែរឹងមាំថែមទៀត ៕

ដោយ / គ្រី សម្បត្តិ