បរទេស៖ ជាមួយនឹងភាពល្បីល្បាញខ្លាំងលើបន្ទះឈីប AI បុគ្គលិក ៧៦% របស់ក្រុមហ៊ុន Nvidia បានក្លាយជាសេដ្ឋី ហើយម្នាក់ក្នុងចំណោម៣នាក់ មានទ្រព្យជាង២០លានដុល្លារអាមេរិក នេះបើតាមគេហទំព័រព័ត៌មាន Tech Dad ចេញផ្សាយ កាលពីចុងសប្តាហ៍។

កម្មវិធី «ទិញភាគហ៊ុន» ផ្តល់ជូនដល់បុគ្គលិក បញ្ចុះតម្លៃ ១៥% ជាការកត្តាចម្បង។ ការកើនឡើងរបស់ Nvidia នៅក្នុងទីផ្សារបន្ទះឈីប AI បានធ្វើឲ្យតម្លៃភាគហ៊ុនរបស់ក្រុមហ៊ុន មានកំណើន ៣,៧៧៦% តាំងពីដើមឆ្នាំ២០១៩មក ក្នុងនោះ តម្លៃភាគហ៊ុន កើនឡើងពី ១៤ ដុល្លារក្នុងខែតុលា ២០២២ ដល់ជិត ១០៧ដុល្លារ មកដល់ឆ្នាំនេះ។

យ៉ាងណាក៏ដោយ ការងារនៅក្រុមហ៊ុនដែលមានមូលដ្ឋានក្នុងសហរដ្ឋអាមេរិកមួយនេះ ពោរពេញដោយសម្ពាធ ធ្វើការច្រើនម៉ោង ហើយមានការលើកឡើងថា សំណងដែលពួកគេទទួលបាន គឺជា «ខ្នោះមាស» ដែលបានដាក់ពួកគេ នៅក្នុងវប្បធម៌ទាមទារ ឬ ចង់បានប្រាក់ច្រើន ត្រូវធ្វើការច្រើន នេះបើតាម ប្រភពពី Tech Dad ដដែល។

ការដឹកនាំរបស់ លោក Jensen Huang ដែលជានាយកប្រតិបត្តិរបស់ Nvidia ត្រូវបានរិះគន់ ចំពោះការរុញច្រានបុគ្គលិក ឱ្យឈានដល់ដែនកំណត់ ដោយអ្នកខ្លះ ធ្វើការប្រាំពីរថ្ងៃ ក្នុងមួយសប្តាហ៍ និងសំពាធផ្សេងៗទៀត នេះបើតាមរបាយការណ៍របស់ Bloomberg។

យ៉ាងណាមិញ គេហទំព័រស្រាវជ្រាវពីការងារ Glassdoor បានចេញផ្សាយថា ក្រុមហ៊ុន Nvidia បានជាប់ចំណាត់ថ្នាក់លេខ ២ នៅលើបញ្ជី «កន្លែងធ្វើការល្អបំផុត» ក្នុងឆ្នាំ២០២៤ ដែលជាឆ្នាំទីបួន ជាប់ៗគ្នា ក្នុងចំណោមក្រុមហ៊ុនកំពូលៗទាំង៥ នេះបើតាម Tech Dad ដដែល។

គិតត្រឹមខែកញ្ញានេះ ក្រុមហ៊ុនបច្ចេកវិទ្យាដែល CEO ធ្លាប់ធ្វើជាអ្នកលេងចាននិងលាងបង្គន់ឲ្យគេមួយនេះ មានបុគ្គលិកប្រមាណ៣២ម៉ឺននាក់ នៅក្នុងទ្វីបចំនួន៦ រួមទាំង អាស៊ីផងដែរ នេះបើតាមគេហទំព័រ Leadiq៕

ប្រភពពី Tech Dad ប្រែសម្រួល៖ សារ៉ាត