បរទេស៖ អ្នកទេសចរនៅទីក្រុង Malaga ដែលជាគោលដៅពេញនិយមបំផុតមួយ របស់ប្រទេសអេស្ប៉ាញ ប្រឈមនឹងការផាកពិន័យ ៨០០ដុល្លារ ប្រសិនបើត្រូវបានគេរកឃើញថា មិនពាក់អាវ ឬស្លៀកតែខោក្នុង នៅទីសាធារណៈ ក្រោមបទប្បញ្ញត្តិថ្មី ដែលបានចាប់ផ្តើម នៅក្នុងខែកញ្ញា។

ការសម្រេចចិត្តនេះ ត្រូវបានធ្វើឡើង បន្ទាប់ពីការត្អូញត្អែរពីអ្នកស្រុកដែលមិនសប្បាយចិត្តនឹងជនបរទេស ដើរជុំវិញទីក្រុង ក្នុងឈុតប៊ីគីនី ឬ ខោខ្លីៗ។ បន្ថែមពីលើសំលៀកបំពាក់ អាជ្ញាធរក្រុងកំពុងជំរុញអ្នកទស្សនា ឱ្យជៀសវាងនូវអាកប្បកិរិយារំខាន ដូចជា បង្កការរំខាន ការស្រែកច្រៀង ឬ ការលេងភ្លេងខ្លាំងៗ ទៀតផង។

សារព័ត៌មាន Daily Express បានរាយការណ៍ថា អ្នកទេសចរក៏ត្រូវបានលើកទឹកចិត្តឱ្យគោរពទម្លាប់ប្រចាំថ្ងៃ របស់អ្នកស្រុក ជាពិសេស មនុស្សចាស់ កុមារ សិស្ស កម្មករសំខាន់ៗ និងអ្នកជំងឺ ដោយត្រូវមានកម្រិតសំឡេងរំខាន ក្នុងអំឡុងពេលម៉ោងសំខាន់ៗ។

ក្រុង Malaga ល្បីល្បាញដោយសារឆ្នេរដ៏ស្រស់ស្អាត វប្បធម៌រស់រវើក និងកន្លែងធ្វើម្ហូប បានទទួលភ្ញៀវទេសចរណ៍ប្រហែល ១៤លាននាក់ កាលពីឆ្នាំ២០២៣៕

ប្រភពពី VNexpress ប្រែសម្រួល៖ សារ៉ាត