បាត់ដំបង៖បុណ្យភ្ជុំបិណ្ឌរយៈពេលពីរថ្ងៃ គោលដៅទេសចរណ៍ទទួលភ្ញៀវជាង១៣ម៉ឺននាក់
បាត់ដំបង៖ រយៈពេល២ថ្ងៃនៅក្នុងឱកាសនៃពិធីបុណ្យភ្ជុំបិណ្ឌប្រពៃណីជាតិ ឆ្នាំ២០២៤នេះ ចំនួនភ្ញៀវទេសចរនិងប្រជាពលរដ្ឋដែលបានកម្សាន្តនៅខេត្តបាត់ដំបងសរុបជាង១៣ម៉ឺននាក់ ក្នុងនោះភ្ញៀវទេសចរអន្តរជាតិជាង៤០០នាក់។ នេះបើតាមបញ្ជាក់របស់ លោក ហម អរុណ អនុប្រធានមន្ទីរទេសចរណ៍ខេត្តបាត់ដំបង ។
លោកអនុប្រធានមន្ទីរទេសចរណ៍ខេត្តបាត់ដំបង តាមសារជាសំឡេងបានឱ្យដឹងថារយៈពេល២ថ្ងៃនៅក្នុងឱកាសពិធីបុណ្យភ្ជុំបិណ្ឌចាប់ពីថ្ងៃទី១-២ ខែតុលាមានភ្ញៀវទេសចរជាតិ និង អន្តរជាតិបានមកកម្សាន្តនៅតាមតំបន់រមណីយដ្ឋានសំខាន់ៗ និង តាមគោលដៅទេសចរណ៍មួយចំនួនក្នុងខេត្តចំនួន១៣១ ០៣២នាក់ ក្នុងនោះ ទេសចរបរទេសចំនួន៤៦២នាក់។
លោកអនុប្រធានមន្ទីរទេសចរណ៍ខេត្តបាត់ដំបង ដដែលបន្ថែមដឹងថាតួលេខភ្ញៀវក្នុងរយៈពេល២ថ្ងៃនាឱកាសបុណ្យភ្ជុំបិណ្ឌឆ្នាំ២០២៤នេះ ប្រហាក់ប្រហែលនឹងឆ្នាំ២០២៣ដែរ។លោក ហម អរុណ បានបង្ហាញពីការកត់សម្គាល់ក្នុងឆ្នាំ២០២៤នេះ ស្ថានភាពគោលដៅទេសចរណ៍មានការរៀបចំសណ្ដាប់ធ្នាប់បានល្អ ហើយនៅតាមរមណីយដ្ឋានទាំងនោះទៀតសោត ក៏មានការគិតគូរលើសេវាកម្ម ការរក្សានូវតម្លៃម្ហូបអាហារសមរម្យ និងការទទួលបដិសណ្ឋារកិច្ចភ្ញៀវបានល្អ ។ពុំបាតុភាពបង្កភាពថ្នាំងថ្នាក់ ដល់ភ្ញៀវឡើយ។
សូមជម្រាបថា ខេត្តបាត់ដំបងមានរមណីយដ្ឋានវប្បធម៌ប្រវត្តិសាស្រ្ត រមណីយដ្ឋានធម្មជាតិ និងគោលដៅទេសចរណ៍ដ៏ទាក់ទាញចំនួន ១១៥កន្លែង ក្នុងនោះមាន៖ រមណីយដ្ឋានទេសចរណ៍ចំនួន២២កន្លែង, សហគមន៍ទេសចរណ៍និងអេកូទេសចរណ៍ចំនួន៤
កន្លែង,តំបន់គោលដៅទេសចរណ៍ចំនួន៥៤កន្លែង,សារមន្ទីរចំនួន២កន្លែង,ទេសចរណ៍បែបសាសនាចំនួន២៩កន្លែង និង តំបន់គោលដៅកសិ-ទេសចរណ៍ ចំនួន៤កន្លែង៕
អត្ថបទ-រូបភាព៖ អ៊ុក សំអាន បប.
